ભારત સામેની ત્રીજી ટેસ્ટની પ્રથમ ઇનિંગમાં ન્યૂઝીલેન્ડની ટીમ 235 રનમાં ઓલઆઉટ થઈ ગઈ હતી. શુક્રવારે મુંબઈના વાનખેડે સ્ટેડિયમમાં ન્યૂઝીલેન્ડે ટોસ જીતીને બેટિંગ કરવાનું પસંદ કર્યું હતું. કિવી ટીમ માટે ડેરીલ મિશેલ અને વિલ યંગે અડધી સદી ફટકારી હતી. મિશેલે 129 બોલમાં 82 રન અને યંગે 138 બોલમાં 71 રન બનાવ્યા હતા. ભારત તરફથી રવિન્દ્ર જાડેજાએ 5 અને વોશિંગ્ટન સુંદરે 4 વિકેટ ઝડપી હતી. આકાશ દીપને એક વિકેટ મળી હતી.
ભારત અને ન્યુઝીલેન્ડ વચ્ચે શુક્રવારથી ત્રણ મેચોની ટેસ્ટ શ્રેણીની છેલ્લી મેચ રમાઈ રહી છે. કિવી ટીમે શ્રેણીમાં 2-0થી અજેય સરસાઈ મેળવી લીધી છે. આવી સ્થિતિમાં ટીમ ઈન્ડિયા ક્લીન સ્વીપથી પોતાને બચાવવા મેદાનમાં ઉતરી છે. ન્યુઝીલેન્ડે બેંગ્લોરમાં રમાયેલી પ્રથમ ટેસ્ટ આઠ વિકેટે અને પુણેમાં રમાયેલી બીજી ટેસ્ટ 113 રનથી જીતી હતી. ન્યુઝીલેન્ડનો પ્રથમ દાવ 235 રનમાં સમેટાઈ ગયો હતો. કિવિઝ તરફથી ડેરિલ મિશેલે સૌથી વધુ 82 રન બનાવ્યા હતા. આ સિવાય વિલ યંગે 71 રનની ઇનિંગ રમી હતી. ભારત તરફથી રવિન્દ્ર જાડેજાએ પાંચ અને વોશિંગ્ટન સુંદરે ચાર વિકેટ લીધી હતી. આકાશ દીપને એક વિકેટ મળી હતી.
ટોસ જીતીને પ્રથમ બેટિંગ કરવા ઉતરેલી ન્યુઝીલેન્ડની શરૂઆત ખરાબ રહી હતી. ટીમને પહેલો ઝટકો 15ના સ્કોર પર લાગ્યો હતો. આકાશ દીપે ડેવોન કોનવેને LBW આઉટ કર્યો હતો. તે ચાર રન બનાવી શક્યો હતો. આ પછી કેપ્ટન ટોમ લાથમે વિલ યંગ સાથે 44 રનની ભાગીદારી કરી હતી. આ ભાગીદારી વોશિંગ્ટન સુંદરે તોડી હતી. તેણે લાથમને ક્લીન બોલ્ડ કર્યો હતો. લાથમ 28 રન બનાવીને આઉટ થયો હતો. આ પછી સુંદરે રચિન રવિન્દ્રને પણ ક્લીન બોલ્ડ કર્યો હતો. તે પાંચ રન બનાવી શક્યો હતો. સુંદરે સતત ત્રણ ઇનિંગ્સમાં ત્રીજી વખત રચિનને આઉટ કર્યો હતો.
રચિનના આઉટ થયા બાદ યંગે ડેરિલ મિશેલ સાથે ચોથી વિકેટ માટે 87 રનની ભાગીદારી કરી હતી. આ દરમિયાન યંગે તેની ટેસ્ટ કારકિર્દીની આઠમી અડધી સદી ફટકારી હતી. આ ભાગીદારી રવિન્દ્ર જાડેજાએ તોડી હતી. જાડેજાએ કિવી ઇનિંગ્સની 44મી ઓવરમાં બે વિકેટ ઝડપી હતી. તેણે પહેલા યંગને સ્લિપમાં કેચ આઉટ કરાવ્યો હતો. ત્યારબાદ ટોમ બ્લંડેલ ક્લીન બોલ્ડ થયો હતો. યંગે 71 રનની ઇનિંગ રમી હતી. બ્લંડેલ ખાતું પણ ખોલી શક્યો ન હતો. આ પછી જાડેજાએ ગ્લેન ફિલિપ્સને પણ ક્લીન બોલ્ડ કર્યો હતો. તે 17 રન બનાવી શક્યો હતો.
આ પછી જાડેજાએ આ ઇનિંગમાં બીજી વખત એક ઓવરમાં બે વિકેટ લીધી હતી. તેણે કીવી ઈનિંગ્સની 61મી ઓવરમાં ઈશ સોઢી અને મેટ હેનરીને પેવેલિયન મોકલ્યા હતા. સોઢી એલબીડબ્લ્યુ આઉટ થયો હતો જ્યારે હેનરી ક્લીન બોલ્ડ થયો હતો. સોઢીએ સાત રન બનાવ્યા હતા, જ્યારે હેનરી ખાતું પણ ખોલી શક્યો નહોતો. વોશિંગ્ટન સુંદરે ડેરીલ મિશેલ અને એજાઝ પટેલ (7)ને આઉટ કરીને ન્યૂઝીલેન્ડની ઈનિંગ્સને 235 રનમાં સમેટી દીધી હતી.
