સુરતઃ હાલમાં સુરત શહેરી વિસ્તારમાં મેટ્રો ટ્રેનની કામગીરી કાર્યરત છે. મેટ્રો ટ્રેનની કામગીરી ખાનગી એજન્સી “ગુજરાત મેટ્રો રેલ કોર્પોરેશન લિમિટેડ” ને સોંપવામાં આવી છે પરતું, મેટ્રો ટ્રેનની કામગીરીનું નિયમન કરવાની જવાબદારી મ્યુનિસિપલ કમિશ્નરની હોય છે.
મેટ્રો ટ્રેનની કામગીરી કરનાર એજન્સી દ્વારા સુરત શહેરના રસ્તાઓનું આડેધડ મનસ્વી રીતે ખોદકામ કરવામાં આવ્યું છે તથા સુરત મહાનગરપાલિકાના જાહેરનામા વિના જ મનફાવે તેમ શહેરના મુખ્ય માર્ગો પણ બંધ કરી દેવામાં આવી રહેલ છે. જેને કારણે આ માર્ગો ઉપર ધંધા રોજગાર કરનારાઓને આર્થિક નુકસાન ભોગવવાનો વારો આવ્યો છે તેમજ સામાન્ય જનતાને વાહન-વ્યવહાર માટે પણ મુશ્કેલીઓનો સામનો કરવો પડી રહ્યો છે.
સુરત શહેરમાં મેટ્રો રેલના કામને કારણે છેલ્લા ૧.૫ વર્ષમાં ૨૪ વખત પાણી-ડ્રેનેજ લાઇનમાં ભંગાણ થયા છે. પાણીની લાઇનમાં ૧૨ વખત ભંગાણ થયા બાદ અંદાજીત કૂલ ૩૪ લાખથી વધુનો ખર્ચ છે. જેની સામે આજદિન સુધી ફક્ત અને ફક્ત ૨ લાખ રૂપિયા જ ખર્ચ પેટે ચોપડે નોંધાયેલ છે. આ પ્રક્રિયામાં પણ વિલંબ થવાને કારણે પણ શહેરની જનતાને મુશ્કેલીઓનો સામનો કરવો પડી રહ્યો છે.
મેટ્રો ટ્રેનની કામગીરી કરનાર એજન્સી દ્વારા વારંવાર સુરક્ષા નિયમોનું ઉલ્લંઘન કરવામાં આવી રહેલ છે. જેને કારણે દુર્ઘટનાઓ સર્જાવા પામેલ છે. સદરહુ મેટ્રો ટ્રેનની કામગીરી કરનાર એજન્સી દ્વારા મનસ્વી રીતે કામગીરી કરવામાં આવી રહેલ છે તેમ છતાં સુરત શહેર મ્યુનિસિપલ કમિશ્નર દ્વારા એજન્સી ઉપર કોઈ નિયંત્રણ રાખવામાં આવ્યું નથી. જે રોડ-રસ્તાઓ આડેધડ તોડવામાં આવ્યા છે તે માટે સુરત મહાનગરપાલિકા દ્વારા કોઈ ભવિષ્યનું માળખું પણ તૈયાર કરવામાં આવ્યું નથી. જેથી જે રોડ-રસ્તાઓ તોડવામાં આવી રહેલ છે તે સુરત શહેરમાં લાંબા સમય માટે તેવી જ સ્થિતિમાં રહેશે અને સુરત શહેરની જનતાને મુશ્કેલીઓનો સામનો કરવો પડશે.
સુરત મહાનગરપાલિકા દ્વારા સુરત શહેરની ખાડીઓ અને ડ્રેનેજની સફાઇ માટે કરોડો રૂપિયાનું બજેટ ફાળવવામાં આવે છે એન તે મુજબ ખર્ચ કરવામાં આવે છે. તેમ છતાં હાલમાં ચોમાસાની ઋતુ દરમ્યાન સુરત શહેરના અનેક વિસ્તારમાં ખાડી પૂર આવેલ હતા જેને કારણે સ્થાનિક નાગરિકોને પોતાની ઘરવખરી અને ધંધા-રોજગારને ખૂબ મોટું નુકસાન થવા પામેલ છે.
આમ, ખાડી અને ડ્રેનેજ સફાઈમાં કરોડો રૂપિયા ખર્ચ કરવા છતાં જો સામાન્ય વરસાદમાં ખાડી પૂરની પરિસ્થિતિનું નિર્માણ થતું હોય તેની જવાબદાર મુખ્યત્વે મ્યુનિસપલ કમિશ્નરની રહે છે. જો મ્યુનિસિપલ કમિશ્નર દ્વારા જો ખાડી અને ડ્રેનેજની સફાઈ યોગ્ય રીતે કરાવવામાં ધ્યાન આપવામાં આવેલ હોત તો સામાન્ય જનતાને નુકસાન સહન કરવાનો વારો ન આવ્યો હોત અને સુરત શહેરના મુખ્ય અધિકારી તરીકે હોદ્દા ઉપર બેઠા હોય ત્યારે અધિકારીએ જાહેર જનતાના પ્રશ્નો બાબતે પૂરતું ધ્યાન આપવું એ અધિકારીની કાયદાકીય અને નૈતિક ફરજ છે. જેના ઉપર મ્યુનિસિપલ કમિશનર દ્વારા પૂરતું ધ્યાન આપવામાં આવતું નથી જે ખૂબ જ દુ:ખની બાબત છે. એન ખાડી અને ડ્રેનેજની સાફ સફાઇ પાછળ સુરત શહેરની જનતાના કરોડો રૂપિયા દર વર્ષે ખર્ચ કરવામાં આવે છે. તેમ છતાં સુરત શહેરની જનતાને પરિણામ મળતું નથી અને દર વર્ષે એકસરખી જ સમસ્યાઓનો સામનો કરવો પડે છે.
શહેરના જાગૃત નાગરિકો દ્વારા ટ્રાફિક નિયમોનું ચુસ્તપણે પાલન કરવામાં આવે છે જેથી માર્ગોના ચાર રસ્તાઓ ઉપર સાંજે ૦૫:૦૦ વાગ્યા બાદ કરવામાં આવતા દબાણના કારણે ઠેર ઠેર ટ્રાફિક સમસ્યાનું સર્જન થઈ રહ્યું છે. તેમ છતાં સુરત મહાનગરપાલિકાના અધિકારીઓ દ્વારા સુરત શહેરના માર્ગોના ચાર રસ્તાઓ ઉપરથી દબાણો દૂર કરવામાં આવ્યા નથી અને અધિકારીઓ મુકપ્રેક્ષણ બની ગયેલ છે. આમ, હાલના સુરત મ્યુનિસિપલ કમિશ્નર દ્વારા પોતાના જ
મ્યુનિસિપલ કમિશનર ફરજમાં બેદરકારી દાખવી રહ્યાં છેઃ દર્શન નાયક
કોંગ્રેસના પ્રદેશ મહામંત્રી દર્શન નાયકે આ મામલે મુખ્યમંત્રીને રજૂઆત કરી છે. નાયક કહે છે કે, સુરત શહેરના સામાન્ય નાગરિક તરીકે સુરત શહેરની સામાન્ય જનતાના હિતમાં અમો આ પત્ર દ્વારા સુરત શહેર વિસ્તારમાં થતાં કામોની સમીક્ષા કરવા અને સુરત મહાનગરપાલિકાના મ્યુનિસિપલ કમિશ્નર દ્વારા પોતાની ફરજમાં બેદરકારી દાખવવામાં આવી રહેલ હોય તની સામે સત્યતા તપાસવા માટે એક તપાસ સમિતિ બનાવી સુરત શહેરની જનતાના હિતમાં જરૂરી કાર્યવાહી કરવા વિનંતી કરીએ છીએ. ઉપરાંત, જો અમારી આ લેખિત ફરિયાદ અન્વયે સુરત શહેરની જનતાના હિતમાં યોગ્ય પગલાંઓ લેવામાં નહીં આવે તો અમોને ના-છૂટકે મે. ગુજરાત હાઇકોર્ટમાં જવાબદાર અધિકારીઓ અને વિભાગો વિરુદ્ધ કાયદેસરની કાર્યવાહી કરવાની ફરજ પડશે. જેની ખાસ નોંધ લેવાવી જોઈએ.
