નવી દિલ્હીઃ પાકિસ્તાન માટે આ ખૂબ જ મુશ્કેલ સમય છે. તેનું ક્રિકેટ બોર્ડ ચેમ્પિયન્સ ટ્રોફી 2025 માટે સ્ટેડિયમ તૈયાર કરવા માટે હજારો કરોડ રૂપિયા ખર્ચી રહ્યું છે, પરંતુ હજુ પણ એ નિશ્ચિત નથી કે ભારતીય ટીમ પાકિસ્તાનનો પ્રવાસ કરશે કે નહીં. જો ભારતીય ટીમ પાકિસ્તાનનો પ્રવાસ નહીં કરે તો એશિયા કપની જેમ ચેમ્પિયન્સ ટ્રોફી પણ હાઇબ્રિડ મોડલમાં રમાય તેવી પૂરી સંભાવના છે. જો આમ થશે તો પાકિસ્તાનને આર્થિક રીતે ભારે નુકસાન સહન કરવું પડશે.
આ દરમિયાન શાંઘાઈ કોઓપરેશન ઓર્ગેનાઈઝેશન (SCO) સમિટના બહાને પાકિસ્તાનને ભારત સાથે ક્રિકેટ પર વાત કરવાનો મોકો મળ્યો. ભારતના વિદેશ મંત્રી એસ. જયશંકર જ્યારે પાકિસ્તાનની મુલાકાતે ગયા ત્યારે પાકિસ્તાનના ગૃહમંત્રી મોહસિન નકવી, જેઓ પાકિસ્તાન ક્રિકેટ બોર્ડના પ્રમુખ પણ છે, પણ તેમને ત્યાં મળવા આવ્યા હતા. રિપોર્ટ અનુસાર તેણે ચેમ્પિયન્સ ટ્રોફી 2025 માટે અરજી કરી છે. તેમણે વિનંતી કરી હતી કે સરકાર ભારતીય ટીમને પાકિસ્તાનના પ્રવાસની મંજૂરી આપે.
ઇસ્લામાબાદમાં ભારતીય વિદેશ મંત્રી એસ. જયશંકર અને તેમના પાકિસ્તાની સમકક્ષ ઇશાક ડાર વચ્ચે બે અલગ-અલગ પ્રસંગો પર અનૌપચારિક વાતચીત થઈ હતી. પાકિસ્તાનના માહિતી મંત્રી અતાઉલ્લા તરારએ કહ્યું કે જયશંકરની ઈસ્લામાબાદ મુલાકાતે સંબંધો પરનો બરફ ઓગળ્યો છે. અહેવાલો અનુસાર, પાકિસ્તાનના વડા પ્રધાન શેહબાઝ શરીફના નિવાસસ્થાને SCO પ્રતિનિધિઓ માટે આયોજિત રાત્રિભોજન દરમિયાન જયશંકર અને ડાર વચ્ચે એક અલગ બેઠક થઈ હતી.
નોંધનીય છે કે, 2012-13 બાદ ભારત-પાકિસ્તાનના ક્રિકેટ સંબંધો ખતમ થઈ ગયા હતા. તેની પાછળનું કારણ સરહદ પર આતંકવાદી ગતિવિધિઓમાં પાકિસ્તાનની સતત સંડોવણી છે. આ સિવાય કાશ્મીર મુદ્દા અને આતંકવાદ પ્રત્યે પાકિસ્તાનની સહિષ્ણુતાને લઈને બંને પાડોશી દેશો વચ્ચેના સંબંધો તણાવપૂર્ણ રહે છે.
