ભારતે ત્રીજી T20માં બાંગ્લાદેશને 133 રને હરાવી દીધું છે. હૈદરાબાદના રાજીવ ગાંધી સ્ટેડિયમમાં શનિવારે પ્રથમ બેટિંગ કરતા ભારતે 6 વિકેટ ગુમાવીને 297 રન બનાવ્યા હતા. જવાબમાં બાંગ્લાદેશ 7 વિકેટે 164 રન જ બનાવી શકી હતી. ત્રીજી T20 જીતીને ભારતે 3 મેચની શ્રેણી 3-0થી જીતી લીધી છે. ભારત તરફથી સંજુ સેમસને 40 બોલમાં સદી ફટકારી હતી, તે 111 રન બનાવીને આઉટ થયો હતો. સેમસને રિશાદ હુસૈનની ઓવરમાં સતત 5 સિક્સર ફટકારી હતી. તેણે એક સિક્સર ફટકારીને પોતાની ફિફ્ટી અને ફોર ફટકારીને તેની સદી પૂરી કરી હતી.
બાંગ્લાદેશ સામેની ત્રીજી ટી-20 મેચમાં ભારતીય બેટ્સમેનોએ એવું પ્રદર્શન કર્યું છે જે આવનારા વર્ષો સુધી યાદ રહેશે. ભારત તરફથી સંજુ સેમસન, સૂર્યકુમાર યાદવ, હાર્દિક પંડ્યાએ તોફાની ઇનિંગ્સ રમી હતી. આ ખેલાડીઓના કારણે જ ટીમ ઈન્ડિયાએ 297 રનનો પહાડ જેવો સ્કોર બનાવ્યો હતો. ટીમ ઈન્ડિયાના ખેલાડીઓએ મેદાનમાં પ્રવેશતાની સાથે જ રનનો વરસાદ કર્યો હતો. આ પછી બાંગ્લાદેશી બેટ્સમેનો ખરાબ રીતે ફ્લોપ થયા અને ટીમ 20 ઓવરમાં 164 રન જ બનાવી શકી અને ભારતીય ટીમ 133 રને જીતી ગઈ.
મેચમાં ભારતની દરેક ચાલ સફળ રહી હતી અને બોલરો અને બેટ્સમેનોએ ટીમ માટે શાનદાર પ્રદર્શન કર્યું હતું. ટીમ ઈન્ડિયાએ જીત મેળવતાની સાથે જ શ્રેણી 3-0થી ક્લીન સ્વીપ કરી લીધી હતી. ટી20 ક્રિકેટના ઈતિહાસમાં ટીમ ઈન્ડિયા સૌથી વધુ વખત 200થી વધુનો સ્કોર બનાવનારી ટીમ બની ગઈ છે. ટીમે ટી20 ક્રિકેટમાં 37 વખત 200થી વધુનો સ્કોર બનાવ્યો છે. બીજા સ્થાને સમરસેટની ટીમ છે, જેણે T20 ક્રિકેટમાં 36 વખત 200 પ્લસ સ્કોર બનાવ્યો છે, ચેન્નાઈ સુપર કિંગ્સ ટીમ 35 વખત અને RCBની ટીમ 33 વખત છે. ટીમ ઈન્ડિયાએ હવે આ તમામ ટીમોને પાછળ છોડીને પ્રથમ સ્થાન મેળવી લીધું છે.
સેમસને રિશાદ સામે સતત 5 સિક્સર ફટકારી
ભારતના વિકેટકીપર બેટ્સમેન સંજુ સેમસને લેગ સ્પિનર રિશાદ હુસૈન સામે ઇનિંગની 10મી ઓવરમાં સતત 5 સિક્સર ફટકારી હતી. સેમસન પહેલા જ બોલ પર સિક્સર ચૂકી ગયો હતો, તેણે પછી ઓવરના બાકીના તમામ બોલ પર સિક્સર ફટકારી ઓવરમાંથી 30 રન બનાવ્યા હતા.
સેમસનને તેની શાનદાર ઇનિંગ્સ માટે પ્લેયર ઓફ ધ મેચનો એવોર્ડ આપવામાં આવ્યો હતો. જોકે પ્લેયર ઓફ ધ સિરીઝનો એવોર્ડ 31 વર્ષીય સ્ટાર ઓલરાઉન્ડર હાર્દિક પંડ્યાએ જીત્યો હતો. હાર્દિકે શુક્રવારે 11 ઓક્ટોબરે તેનો 31મો જન્મદિવસ ઉજવ્યો હતો. તેના માટે આનાથી સારી ભેટ બીજી કોઈ હોઈ શકે નહીં.
