મુંબઈઃ બોલિવૂડના ‘હીરો નંબર 1’ ગોવિંદા સાથે મંગળવારે મોટો અકસ્માત થયો હતો. અભિનેતા પોતાની લાયસન્સવાળી રિવોલ્વરની સફાઈ કરી રહ્યો હતો ત્યારે અકસ્માતે ફાયરિંગ થયું હતું અને એક ગોળી તેના ઘૂંટણમાં વાગી હતી. ડોક્ટરે ગોવિંદાના પગમાંથી ગોળી કાઢી નાખી છે. અભિનેતા હોસ્પિટલના ICUમાં દાખલ કરવામાં આવ્યા છે. તેની હાલત હવે ઠીક છે.
ગોવિંદાનું નિવેદન નોંધવામાં આવ્યું નથી
ગોવિંદાના મેનેજર શશિ સિન્હાએ જણાવ્યું હતું કે મુંબઈ પોલીસે ગોવિંદાની પુત્રી ટીનાનું નિવેદન નોંધ્યું છે. પરંતુ હજુ સુધી ગોવિંદાનું નિવેદન નોંધવામાં આવ્યું નથી. ગોવિંદાની તબિયત સુધર્યા બાદ તેમનું નિવેદન નોંધવામાં આવશે. મુંબઈ પોલીસના અધિકારીઓ મંગળવારે સાંજે હોસ્પિટલ પહોંચ્યા હતા. તેમણે ગોવિંદા સાથે વાત કરી હતી. તેમની સાથે બનેલી ઘટનાની પ્રાથમિક માહિતી મેળવી હતી. પરંતુ હજુ સુધી અભિનેતાનું સત્તાવાર નિવેદન નોંધવામાં આવ્યું નથી.
ગોવિંદાએ વૉઇસ મેસેજ રિલિઝ કર્યો
ગોવિંદાએ ICUમાંથી ચાહકો માટે પોતાનો વૉઇસ મેસેજ પણ રિલીઝ કર્યો હતો. અભિનેતાએ ઓડિયોમાં પોતાની હેલ્થ અપડેટ આપી હતી. અભિનેતાએ કહ્યું હતું, હું હવે ખતરાની બહાર છું. ગોળી ભૂલથી વાગી હતી. બાબાના આશીર્વાદ. હું મારા ડૉક્ટરોનો આભાર માનું છું. હું મારા ચાહકોનો પણ આભારી છું. તમારા બધાના આશીર્વાદ, તમારા માતા-પિતાના આશીર્વાદ અને બાબાની કૃપાથી જે ગોળી વાગી હતી તે દૂર થઈ ગઈ છે. હું આપ સૌનો આભાર માનું છું.
ગોવિંદાને ગોળી કેવી રીતે લાગી?
અભિનેતા સાથે આ અકસ્માત મંગળવારે સવારે લગભગ 4.45 વાગ્યે થયો હતો. મળસ્કે અભિનેતા કોલકાતા જઈ રહ્યો હતો. ઘરની બહાર નીકળતા પહેલા ગોવિંદાએ પોતાની રિવોલ્વર સાફ કરીને કેસમાં રાખતો હતો. ત્યારે તેના હાથમાંથી બંદૂક સરકીને જમીન પર પડી હતી. આ દરમિયાન ફાયરિંગ થયું હતું અને એક ગોળી અભિનેતાના પગમાં વાગી હતી.
ફાયરિંગનો અવાજ સાંભળીને ઘરમાં હાજર લોકો દોડી ગયા હતા અને તાત્કાલિક કાર્યવાહી કરી હતી. ગોવિંદાને તાત્કાલિક હોસ્પિટલ લઈ જવામાં આવ્યો હતો. આ ઘટના બની ત્યારે ગોવિંદાની પત્ની સુનીતા ઘરે હાજર ન હતી. તે કોલકાતામાં હતી. ગોવિંદાને 1-2 દિવસ સુધી હોસ્પિટલમાં ડોક્ટરોની દેખરેખ હેઠળ રાખવામાં આવશે.
કાશ્મીરા ગોવિંદાને મળી
મુશ્કેલ સમયમાં ગોવિંદાના પરિવારના સભ્યો તેને હોસ્પિટલમાં મળવા આવ્યા હતા. કાશ્મીરા શાહ તેના મામા સસરા ગોવિંદાને મળી હતી. જોકે, કૃષ્ણા અભિષેક વિદેશમાં હોવાના કારણે હોસ્પિટલ જઈ શક્યા ન હતા. ગોવિંદાના શૂટિંગના સમાચાર સાંભળીને તમામ ચાહકો પરેશાન થઈ ગયા હતા. બધાએ અભિનેતાના ઝડપથી સ્વસ્થ થવાની પ્રાર્થના કરી છે.
ગોવિંદા હિન્દી સિનેમાના મોટા સુપરસ્ટાર
ગોવિંદા 90ના દાયકાના સુપરસ્ટાર હતા. કોમેડી જોનરમાં તેની બરાબરી નથી. આજે પણ તે પોતાના ડાન્સ, એક્સપ્રેશન અને કોમેડીથી ચાહકોનું મનોરંજન કરે છે. તેણે ‘દુલ્હે રાજા’, ‘હીરો નંબર 1’ અને ‘કુલી નંબર 1’ જેવી ઘણી આઇકોનિક ફિલ્મોમાં કામ કર્યું છે.
અભિનેતા ઉપરાંત ગોવિંદા હવે રાજકારણી પણ છે. માર્ચમાં ગોવિંદા મહારાષ્ટ્રના મુખ્યમંત્રી એકનાથ શિંદેની શિવસેના પાર્ટીમાં જોડાયા હતા. હવે તે ફિલ્મોમાં ભાગ્યે જ જોવા મળે છે. રિયાલિટી શોમાં ઘણીવાર પત્ની અને બાળકો સાથે સ્પોટ જોવા મળે છે.
