વડાપ્રધાન નરેન્દ્ર મોદીએ અમેરિકન ટેક કંપનીઓના સીઈઓ સાથેની રાઉન્ડ ટેબલ બેઠકમાં ભાગ લીધો હતો. ગૂગલના સીઈઓ સુંદર પિચાઈ સહિત અનેક દિગ્ગજ લોકોએ અહીં ભાગ લીધો હતો. મોદીની ત્રણ દિવસીય યુએસ મુલાકાતના બીજા તબક્કા દરમિયાન રવિવારે લોટે ન્યૂયોર્ક પેલેસ હોટેલમાં આ બેઠક થઈ હતી. આ મીટિંગમાં AI, ક્વોન્ટમ કમ્પ્યુટિંગ અને સેમિકન્ડક્ટર્સ જેવી અત્યાધુનિક ટેક્નોલોજી પર કામ કરતી 15 અગ્રણી યુએસ કંપનીઓના સીઈઓએ હાજરી આપી હતી. આ બેઠક ખૂબ જ સફળ રહી હતી.
સુંદર પિચાઈએ આ અવસરે કહ્યું કે મીટિંગ ઘણી સફળ અને સારી રહી. વડાપ્રધાન ડિજિટલ ઈન્ડિયા વિઝન સાથે ભારતને સંપૂર્ણ રીતે બદલવા પર ધ્યાન કેન્દ્રિત કરી રહ્યાં છે. પિચાઈએ કહ્યું કે પીએમ મોદી મેક ઇન ઇન્ડિયા, ડિઝાઇન ઇન ઇન્ડિયા પર સતત ભાર આપી રહ્યા છે. ભારતમાં અમારા Pixel ફોનનું ઉત્પાદન કરવા બદલ અમને ગર્વ છે. ગૂગલના સીઈઓએ કહ્યું કે વડા પ્રધાન ખરેખર એ વિશે વિચારી રહ્યા છે કે AI ભારતને બદલવામાં કેવી રીતે મદદ કરશે, જેથી ભારતના લોકોને તેનો લાભ મળી શકે.
તેમણે અમને પડકાર ફેંક્યો છે કે અમે ભારત માટે એપ બનાવવા પર ધ્યાન કેન્દ્રિત કરીએ, જેથી તે સ્વાસ્થ્ય સંભાળ, શિક્ષણ અને કૃષિ ક્ષેત્રે મદદ કરી શકે. પીએમ ભારતના ઈન્ફ્રાસ્ટ્રક્ચર વિશે પણ વિચારી રહ્યા છે. તે ભારતમાં ડેટા સેન્ટર્સ, પાવર, એનર્જી અને રોકાણ વિશે વિચારે છે જેથી ભારત પરિવર્તન તરફ આગળ વધી શકે.
ભારત માટે ઘણું બધું કરવાની ઈચ્છા
પિચાઈએ કહ્યું કે અમને ભારત સાથે ભાગીદારી કરવાનો ગર્વ છે. અમે ભારતમાં AI માં ભારે રોકાણ કરી રહ્યા છીએ. અમે આમાં વધુ રોકાણ કરવાનું વિચારી રહ્યા છીએ. અમે ભારતમાં કેન્દ્ર સરકાર અને રાજ્ય સરકાર સાથે ભાગીદારીમાં સતત ઘણા કાર્યક્રમો ચલાવીએ છીએ. અમે કૃષિ અને આરોગ્ય મંત્રાલય સાથે પણ કાર્યક્રમો ચલાવી રહ્યા છીએ. અમે ભારત માટે ઘણું બધું કરવા ઈચ્છીએ છીએ. તેમણે કહ્યું કે પીએમ હંમેશા અમને ભારત માટે વધુ કરવા માટે પડકાર આપે છે. AIની મદદથી સર્જાયેલી તકો અંગે તેમનું વિઝન સ્પષ્ટ છે.
