વડા પ્રધાન નરેન્દ્ર મોદી તેમના યુએસ પ્રવાસના પ્રથમ દિવસે શનિવારે (21 સપ્ટેમ્બર) રાષ્ટ્રપતિ બિડેનના હોમ સ્ટેટ ડેલાવેર પહોંચ્યા હતા. અહીં તેમણે યુએસ પ્રેસિડેન્ટ જો બિડેન, ઓસ્ટ્રેલિયન પીએમ એન્થોની અલ્બેનીઝ અને જાપાનીઝ પીએમ ફ્યુમિયો કિશિદા સાથે બપોરે 1:30 વાગ્યે (ભારતીય સમય મુજબ) ક્વાડ (Quadrilateral Security Dialogue) સમિટમાં હાજરી આપી હતી. મીટિંગ પછી, ક્વાડ નેતાઓના ફોટોશૂટમાં બિડેનને યુએસ ચૂંટણી પછી સંગઠનના અસ્તિત્વ વિશે પ્રશ્નો પૂછવામાં આવ્યા હતા. આના પર બિડેને પીએમ મોદીના ખભા પર હાથ રાખ્યો અને કહ્યું કે ચૂંટણી પછી પણ ક્વાડ અસ્તિત્વમાં રહેશે.
અગાઉ ક્વાડ સમિટ ડેલાવેરમાં પ્રેસિડેન્ટ બિડેનની હાઈસ્કૂલમાં યોજાઈ હતી. બેઠક દરમિયાન પીએમ મોદીએ ચીનનું નામ લીધા વગર કહ્યું કે અમે કોઈના વિરુદ્ધ નથી. મુક્ત અને સર્વસમાવેશક ઈન્ડો-પેસિફિક અમારી પ્રાથમિકતા છે. ક્વાડ ભાગીદારી અને સહકાર માટે છે અને આ સંગઠન લાંબા સમય સુધી રહેશે. આ પછી ઓસ્ટ્રેલિયાના વડા પ્રધાન એન્થોની અલ્બેનિસે ક્વાડ સભ્યોને સંબોધિત કર્યા હતા. તેમણે કહ્યું કે આવતા વર્ષે પીએમ મોદી ક્વાડ સમિટનું આયોજન કરશે. હું એ ક્ષણની રાહ જોઈ રહ્યો છું. ક્વાડનો ઇતિહાસ લાંબો નથી. એટલે કે તે પરંપરાઓથી બંધાયેલો નથી. અમે જે પ્રદેશનું પ્રતિનિધિત્વ કરીએ છીએ (ઇન્ડો પેસિફિક) તે સૌથી ઝડપથી વિકસતો પ્રદેશ છે.
આ અવસરે બિડેને કહ્યું કે અમે લોકશાહી દેશ છીએ જે જાણે છે કે કામ કેવી રીતે કરવું. ક્વાડને વધુ અસરકારક બનાવવા માટે મેં મારા કાર્યકાળની શરૂઆતમાં તમારો સંપર્ક કર્યો હતો. આજે 4 વર્ષ પછી અમે પહેલા કરતા વધુ વ્યૂહાત્મક રીતે એક થયા છીએ. આ પછી બિડેને ક્વાડ દેશોના કોસ્ટ ગાર્ડ્સ વચ્ચે સહયોગ વધારવાની જાહેરાત કરી હતી. તેમણે કહ્યું કે હવેથી દક્ષિણ પૂર્વ એશિયાના દેશોના વિદ્યાર્થીઓને પણ ક્વાડ દ્વારા આપવામાં આવતી ફેલોશિપમાં સામેલ કરવામાં આવશે.
બિડેને મોદીને ગળે લગાવીને આવકાર્યા હતા
સમિટ પહેલા પીએમ મોદીએ શનિવારે રાત્રે રાષ્ટ્રપતિ બિડેન સાથે તેમના ડેલાવેર સ્થિત નિવાસસ્થાને મુલાકાત કરી હતી. બિડેને મોદીને ગળે લગાવીને આવકાર્યા હતા. આ પછી બંને વચ્ચે લગભગ એક કલાક સુધી દ્વિપક્ષીય બેઠક થઈ. બિડેને પીએમ મોદીની યુક્રેન અને પોલેન્ડની મુલાકાતની પ્રશંસા કરી હતી.
આ સિવાય બિડેને સંયુક્ત રાષ્ટ્રમાં ભારતના કાયમી સભ્યપદને પણ સમર્થન આપ્યું હતું. બંને નેતાઓ વચ્ચે ડ્રોન ડીલ પર પણ ચર્ચા થઈ હતી. બિડેને ભારત સાથેની આ ડીલને આવકારી છે. ભારત યુએસ પાસેથી 31 MQ-9B SKY ગાર્ડિયન અને SEA ગાર્ડિયન ડ્રોન ખરીદવાની પ્રક્રિયામાં છે. આ ડ્રોનની કિંમત લગભગ 3 અબજ ડોલર છે. મીડિયા રિપોર્ટ્સ અનુસાર મોદી અમેરિકા પહોંચવાના કલાકો પહેલા જ વ્હાઇટ હાઉસે ખાલિસ્તાન સમર્થકોને હોસ્ટ કર્યા હતા. અમેરિકી સરકારે તેમને ખાતરી આપી છે કે તેઓ શીખ કાર્યકરોને અન્ય દેશોમાં થતા દમનથી બચાવશે.
