ક્રિકેટની રમતમાં મોટા મોટા વિવાદો જોવા મળ્યા છે. હવે કેરેબિયન પ્રીમિયર લીગ (CPL 2024)માં અમ્પાયર દ્વારા નિર્ણય બદલવાનો મુદ્દો ઇન્ટરનેટ પર ખૂબ વાયરલ થઈ રહ્યો છે. વાસ્તવમાં CAPLમાં Trinbago Knight Riders (TKR) vs Antigua and Barbuda Falcons (ABF) ની મેચમાં પાકિસ્તાની ખેલાડી ઇમાદ વસીમે તેની વિરુદ્ધના નિર્ણય પર નારાજગી વ્યક્ત કરવાનું શરૂ કર્યું હતું. જ્યારે તે અણનમ રહ્યો હતો ત્યારે તેને મેદાનની બહાર મોકલી દેવામાં આવ્યો હતો પરંતુ થોડા સમય બાદ તેને પાછો બોલાવવામાં આવ્યો હતો.
આ મેચમાં ABFની ટીમ 135 રનના લક્ષ્યનો પીછો કરી રહી હતી. દસમી ઓવરના પહેલા બોલ પર સુનીલ નારાયણે હસન ખાનને 36 રનના સ્કોર પર સ્ટમ્પ કરાવ્યો હતો. બીજા જ બોલ પર ઇમાદ વસીમ સામે LBW માટે અપીલ કરવામાં આવી હતી જેને અમ્પાયરે નોટઆઉટ જાહેર કરી હતી. જ્યારે પાકિસ્તાની ખેલાડી વસીમ કહી રહ્યો હતો કે બોલ પહેલા તેના બેટ પર વાગ્યો હતો. નાઈટ રાઈડર્સના કેપ્ટન કિરોન પોલાર્ડે સમીક્ષા માટે સંકેત આપ્યો. સમીક્ષા બાદ ગ્રાઉન્ડ અમ્પાયરે પોતાનો નિર્ણય બદલ્યો અને ઈમાદ વસીમને આઉટ જાહેર કર્યો.
નિર્ણય બદલ્યા બાદ ઇમાદ વસીમ અમ્પાયર પાસે ગયો અને કહ્યું કે બોલ પહેલા બેટમાં વાગ્યો હતો. વસીમને મેદાન છોડવાની ફરજ પડી હતી અને તેના ચહેરા પર નિરાશા સ્પષ્ટ દેખાતી હતી. દરમિયાન જ્યારે એબીએફ ટીમના સહાયક કોચ કર્ટલી એમ્બ્રોઝ રિપ્લે જોયા પછી ડગઆઉટમાંથી બહાર આવ્યા ત્યારે તેમણે ગુસ્સાથી ઈશારો કર્યો અને પૂછ્યું કે શું અમ્પાયરોની આંખે પાટા બાંધ્યા છે. પીછો કરતી ટીમની અપીલ બાદ ગ્રાઉન્ડ અમ્પાયરે પોતાનો નિર્ણય બદલ્યો અને ઈમાદ વસીમને ફરીથી રમવા માટે બોલાવ્યો.
વસીમના પરત ફર્યા બાદ નાઈટ રાઈડર્સના કેપ્ટન કીરોન પોલાર્ડે ગ્રાઉન્ડ અમ્પાયર સાથે દલીલ કરવાનું શરૂ કર્યું હતું. નાઈટ રાઈડર્સના કોચ ફિલ સિમોન્સે પણ ડગ આઉટમાંથી કેટલાક સંકેતો આપ્યા હતા. આ કારણોસર લગભગ 12 મિનિટ સુધી મેદાનમાં અંધાધૂંધી મચી ગઈ હતી. વસીમને એકવાર શૂન્યના સ્કોર પર આઉટ જાહેર કરવામાં આવ્યો હતો પરંતુ તેણે વાપસી કરીને 27 બોલમાં 36 રનની મેચ વિનિંગ ઇનિંગ રમીને ફાલ્કન્સને જીત અપાવી હતી.
