કોલકાતાની આર.જી. કાર હોસ્પિટલમાં બળાત્કાર અને હત્યાનો ભોગ બનેલી ૩૧ વર્ષીય તાલીમાર્થી ડોક્ટરે ગોલ્ડ મેડલ જીતવાનું સપનું જોયું હતું. દરજી પિતાએ તેમની દીકરીને ભણાવવા માટે દિવસરાત મહેનત કરી હતી. દીકરીએ પણ અભ્યાસમાં કોઈ કસર છોડી નહોતી. પરિવારે જીવનભર સંઘર્ષ કર્યો હતો. પુત્રીએ કોલકાતાના ગીચ વસ્તીવાળા ઉપનગર સોદેપુરથી આર.જી. કાર હોસ્પિટલ સુધી મુસાફરી કરી. હવે પરિવારનું ઋણ ચૂકવવાનો વારો દીકરીનો હતો પણ તેણે પોતાનાં માતાપિતાનું સપનું સાકાર કર્યા વિના જ આ દુનિયા છોડી દીધી છે.
સેમિનાર હોલમાં લેડી ડોક્ટર સાથે બળાત્કાર અને હત્યાની ઘટના બાદ શંકાના દાયરામાં રહેલા ભૂતપૂર્વ પ્રિન્સિપાલ સંદીપ ઘોષની મુસીબતો વધી શકે છે. આવી સ્થિતિમાં સંદીપ ઘોષ વારંવાર આર.જી. કાર મેડિકલ કોલેજના પ્રિન્સિપાલ કેમ બની રહ્યા હોવાની આશંકા વ્યક્ત કરવામાં આવી રહી છે. સીબીઆઈના સ્ટેટસ રિપોર્ટમાં સંદીપ ઘોષ અંગેનાં કેટલાંક તથ્યો સામે આવી શકે છે. સંદીપ ઘોષ પર હોસ્પિટલમાં ભંડોળની ઉચાપત સાથે માનવ અંગોની હેરફેરનો ગંભીર આરોપ પણ છે.
કોલકાતાની આર.જી. કાર મેડિકલ કોલેજમાં બનેલી જઘન્ય ઘટનામાં પૂર્વ પ્રિન્સિપાલ સંદીપ ઘોષની ભૂમિકા શંકાસ્પદ માનવામાં આવી રહી છે. સંદીપ ઘોષ સમક્ષ અનેક સવાલો છે જેમાં મુખ્ય છે કે લેડી ડોક્ટરને સતત ૩૬ કલાક ડ્યુટી પર કેમ મૂકવામાં આવ્યાં? બીજો મુખ્ય પ્રશ્ન એ છે કે આરોપી સંજય રોયને હોસ્પિટલમાં આસાનીથી કેવી રીતે પ્રવેશ મળ્યો? સંદીપ ઘોષને ફેબ્રુઆરી, ૨૦૧૧ માં સરકાર દ્વારા પ્રથમ વખત આર.જી. કાર મેડિકલ કોલેજના પ્રિન્સિપાલ તરીકે નિયુક્ત કરવામાં આવ્યા હતા. આ પછી ૩૧ મે, ૨૦૨૩ ના રોજ સંદીપ ઘોષની આર.જી. કાર હોસ્પિટલમાંથી પ્રથમ વખત ટ્રાન્સફર કરવામાં આવી હતી, પરંતુ ૨૪ કલાકની અંદર સંદીપ ઘોષને પુનઃસ્થાપિત કરવામાં આવ્યા હતા. આ પછી આ વર્ષે સપ્ટેમ્બરમાં સંદીપ ઘોષની ફરી એક વાર મુર્શિદાબાદ મેડિકલ કોલેજમાં બદલી કરવામાં આવી હતી.
જો કે, રહસ્યમય રીતે એક મહિનાની અંદર સંદીપ ઘોષ આર.જી. કાર મેડિકલ કોલેજના આચાર્ય તરીકે પાછા ફર્યા હતા. આ કેસનાં મૂળ ખૂબ ઊંડાં છે. મહિલા ડોક્ટર પર બળાત્કાર એટલા માટે કરવામાં આવ્યો હતો કે આ એક સામાન્ય ઘટના હોવાનું જણાય. મેડિકલ કોલેજમાં લાંબા સમયથી સેક્સ અને ડ્રગ્સ રેકેટ ચલાવવાનો પણ આરોપ છે. ૨૩ વર્ષ પહેલાં ૨૦૦૧માં કોલેજની હોસ્ટેલમાં થયેલા એક વિદ્યાર્થીના મોતની કડીઓ પણ આ કેસ સાથે જોડાવા લાગી છે. એક રાજકીય પક્ષના એક વરિષ્ઠ નેતાએ દાવો કર્યો છે કે તેમની પાસે ડોક્ટરોના વોટ્સએપ ગ્રુપના સ્ક્રીનશોટ છે, જે હોસ્પિટલમાં સેક્સ અને ડ્રગ રેકેટ ચાલતું હોવાનો ખુલાસો કરે છે. તેમાં અન્ય પાર્ટીના વરિષ્ઠ નેતા અને તેમના ભત્રીજાનો ઉલ્લેખ છે. આ સુરાગ બાદ પૂછપરછ દરમિયાન મેડિકલ કોલેજના ચાર લોકોનાં નામ સામે આવ્યાં છે. તેની અંદર ત્રણ ડોક્ટર અને એક હાઉસ સ્ટાફ છે. એવો દાવો કરવામાં આવે છે કે ચારેય રાજકીય પક્ષ સાથે સંકળાયેલાં છે અને હોસ્પિટલમાં સેક્સ અને ડ્રગ રેકેટ ચલાવતાં હતાં.
આર.જી. કાર મેડિકલ કોલેજ અને હોસ્પિટલમાં મેડિકલ વેસ્ટના નિકાલ અને કેટલીક દવાઓ અને સામાનના સપ્લાયનું કામ મેનેજમેન્ટની નજીકની વ્યક્તિને આપવામાં આવ્યું હતું, પરંતુ સપ્લાય શરતો મુજબ કરવામાં આવી રહી ન હતી. પીડિતાને આ વાતની જાણ હતી. આ પણ હત્યા પાછળનું કારણ હોવાની શંકા છે. હોસ્પિટલના એક ડૉક્ટરનો દાવો છે કે પીડિતાએ પહેલાં સ્વાસ્થ્ય ભવનમાં આ અંગે ફરિયાદ કરી હતી. જો કે આરોપીઓના પ્રભાવને કારણે તેમની સામે કોઈ કાર્યવાહી થઈ ન હતી. તાલીમાર્થી તબીબ પુરાવા સાથે સમગ્ર મામલો સોશ્યલ મિડિયા પર જાહેર કરવાની યોજના બનાવી રહી હતી. ૯ ઓગસ્ટના રોજ મેડિકલ કોલેજના સેમિનાર હોલમાં તાલીમાર્થી ડોક્ટરનો મૃતદેહ મળી આવ્યો હતો. પોસ્ટમોર્ટમ રિપોર્ટમાં બળાત્કારની પુષ્ટિ થઈ હતી. રિપોર્ટ અનુસાર તેના પ્રાઈવેટ પાર્ટ પર ઊંડો ઘા હતો. ગળું દબાવવાને કારણે થાઇરોઇડનું કાર્ટિલેજ તૂટી ગયું હતું. પેટ, હોઠ, આંગળીઓ અને ડાબા પગ પર ઈજાનાં નિશાન હતાં.
આર.જી. કાર મેડિકલ કોલેજનાં વિદ્યાર્થીઓએ ભૂતપૂર્વ પ્રિન્સિપાલ સંદીપ ઘોષ પર આરોપ લગાવ્યો છે કે સંદીપ ઘોષને અહીં શું થઈ રહ્યું છે તેની જાણ હતી. એવો આરોપ છે કે આર.જી. કાર મેડિકલ કોલેજ અને હોસ્પિટલમાં પોસ્ટમોર્ટમ માટે આવતા મૃતદેહોનાં શરીરમાંથી અંગો પણ કાઢી લેવામાં આવતાં હતાં અને તેમનું લાખો રૂપિયામાં વેચાણ કરવામાં આવતું હતું. ૨૦૦૧માં આર.જી. કાર મેડિકલ કોલેજની હોસ્ટેલમાં સૌમિત્ર બિસ્વાસના મૃત્યુની ઘટનાને પોલીસે આત્મહત્યા જાહેર કરી હતી, પરંતુ પરિવારજનોએ તેને હત્યા ગણાવી હતી. સેક્સ રેકેટનો પર્દાફાશ થવાના ડરથી આ હત્યા કરવામાં આવી હતી. સૌમિત્રના સમયમાં સેક્સ વર્કરોને હોસ્ટેલમાં લાવવાનું સામાન્ય હતું. તેના દ્વારા વિદ્યાર્થિનીઓને બ્લેકમેલ કરવામાં આવતી હતી.
પીડિતાના પિતાએ પણ હોસ્પિટલ પ્રશાસન પર સવાલો ઉઠાવતાં કહ્યું કે સવારે ૩ વાગ્યાથી સવારે ૧૦ વાગ્યા સુધી જ્યારે તેમની સાથે આ ઘટના બની ત્યારે તે ફરજ પરની ડૉક્ટર હોવા છતાં કોઈને તેની જરૂર નહોતી. તેમણે સમગ્ર હોસ્પિટલના મેનેજમેન્ટ પર શંકા વ્યક્ત કરી હતી. ટીએમસીનાં સાંસદ મહુઆ મોઇત્રાએ મહિલા ડૉક્ટરના પ્રાઈવેટ પાર્ટમાં ૧૫૦ ગ્રામ વીર્ય મળ્યા હોવાનો ઈન્કાર કર્યો છે. તેમનું કહેવું છે કે મિડિયામાં ખોટા સમાચાર ફેલાવવામાં આવી રહ્યા છે. મહુઆએ કહ્યું કે તે વીર્યનું વજન નથી પરંતુ મહિલાના પ્રાઈવેટ પાર્ટનું વજન ૧૫૦ ગ્રામ હતું.
આ ઘટના સાથે સંબંધિત એક ઓડિયો વાયરલ થતાં કેસમાં નવો વળાંક આવ્યો છે. આ ઓડિયો આર.જી. કાર હોસ્પિટલના ઈન્ટર્ન અને અન્ય હોસ્પિટલના પીજીટી ડોક્ટર વચ્ચેની વાતચીતનો છે. આમાં ઈન્ટર્નએ દાવો કર્યો છે કે વાસ્તવિક વાર્તા કંઈક બીજી છે. આ એક ડ્રામા છે અને ઘટનાના અસલી ગુનેગારો ખુલ્લેઆમ ફરે છે. ઓડિયો ક્લિપમાં એવું પણ સંભળાય છે કે આરોપી સંજય રોયને બલિનો બકરો બનાવવામાં આવ્યો છે. ડોક્ટર મહિલા પર એક નહીં પરંતુ બે-ત્રણ લોકોએ ગેન્ગરેપ કર્યો હતો. આ ઓડિયો ક્લિપમાં અનેક પ્રકારના અવાજ આવી રહ્યા છે.
આના દ્વારા દાવો કરવામાં આવી રહ્યો છે કે આ ઘટનામાં ઘણાં લોકો સામેલ હતાં. કોલકાતામાં બળાત્કાર અને હત્યાની દુર્ઘટના કરતાં પણ વધુ ગંભીર દુર્ઘટના તેના પર ઢાંકપિછેડો કરવાના રાજ્ય સરકારના પ્રયાસો છે. દુર્ઘટનાની રાત્રે ૧૧ વાગ્યે હોસ્પિટલની બહાર શાંતિપૂર્ણ પ્રદર્શન થઈ રહ્યું હતું. તે જ સમયે, રાત્રે ૧૨.૪૦ વાગ્યે, કેટલાક વિરોધ કરી રહેલાં લોકો હોસ્પિટલની અંદર પ્રવેશ્યાં હતાં અને તેમણે હોસ્પિટલના ઈમરજન્સી વોર્ડમાં તોડફોડ કરી હતી. ઈમરજન્સી વોર્ડમાં તૈનાત તબીબોને માર મારવામાં આવ્યો હતો. પોતાનો જીવ બચાવવા માટે વિદ્યાર્થીઓએ પોતાને રૂમમાં બંધ કરી દીધા હતા. દેખાવકારોએ પોલીસ, આરએએફ પર પથ્થરમારો કર્યો. પોલીસનાં વાહનોમાં તોડફોડ કરવામાં આવી હતી. બેરિકેડ તોડી નાખવામાં આવ્યાં હતાં. પથ્થરમારામાં અનેક પોલીસકર્મીઓ ઘાયલ થયાં છે.
પોલીસે દેખાવકારો પર ટીયર ગેસના સેલ છોડ્યા હતા. પોલીસ કમિશનર આર.જી.કાર રાત્રે ૨ વાગે હોસ્પિટલ પહોંચ્યા હતા. બીજી તરફ ભાજપે આરોપ લગાવ્યો છે કે પુરાવાનો નાશ કરવા માટે હોસ્પિટલમાં તોડફોડ કરવામાં આવી હતી. લોકોને ટ્રક દ્વારા હોસ્પિટલ બોલાવવામાં આવ્યાં હતાં. વિરોધને ડામવા માટે ડિમોલિશન હાથ ધરવામાં આવ્યું હતું. પોલીસે બદમાશોને કોઈ પણ પ્રતિબંધ વિના અંદર જવા દીધાં હતાં. ઈમરજન્સી વોર્ડમાં તોડફોડ કરવામાં આવી હતી. ડોક્ટરો અને સ્ટાફને માર મારવામાં આવ્યો હતો. ભાજપનું કહેવું છે કે મમતા સરકાર આ ઘટનાને રફેદફે કરવામાં વ્યસ્ત છે.– આ લેખમાં પ્રગટ થયેલાં વિચારો લેખકનાં પોતાના છે.
