નવી દિલ્હી: NDA સંસદીય દળના નેતા તરીકે ચૂંટાયા બાદ નરેન્દ્ર મોદી ભાજપના વરિષ્ઠ નેતા લાલકૃષ્ણ અડવાણીના ઘરે પહોંચ્યા હતા. અહીં તેઓ લાલકૃષ્ણ અડવાણીને મળ્યા અને તેમની તબિયત વિશે પૂછપરછ કરી હતી. ત્યાર બાદ NDAના નેતાઓએ રાષ્ટ્રપતિને મળીને સરકાર બનાવવાનો દાવો રજૂ કર્યો હતો. તેમણે પોતાના સમર્થક સાંસદોનો પત્ર રાષ્ટ્રપતિ દ્રૌપદી મુર્મુને સોંપ્યો.
મોદી આગામી તા. 9 જૂને સાંજે 6 વાગ્યે રાષ્ટ્રપતિ ભવનમાં ત્રીજી વખત વડાપ્રધાન તરીકે શપથ લઈ શકે છે. સમાચાર છે કે મોદીની સાથે સમગ્ર કેબિનેટ શપથ લઈ શકે છે.
આ અગાઉ આજે સવારે જૂની સંસદ ભવનના સેન્ટ્રલ હોલમાં મળેલી એનડીએની બેઠકમાં એનડીએના તમામ 293 સાંસદો, રાજ્ય સભાના સાંસદો અને તમામ રાજ્યોના મુખ્યમંત્રી અને નાયબ મુખ્યમંત્રી હાજર રહ્યાં હતાં. રક્ષામંત્રી રાજનાથ સિંહે વડાપ્રધાન પદ માટે નરેન્દ્ર મોદીના નામનો પ્રસ્તાવ મુક્યો હતો. અમિત શાહે તેને ટેકો આપ્યો અને નીતિન ગડકરીએ મંજૂરી આપી હતી. જેડીએસ પ્રમુખ કુમાર સ્વામીએ પ્રસ્તાવને ટેકો જાહેર કર્યો હતો.
ત્યાર બાદ એનડીએના સાથી પક્ષ ટીડીપીના ચીફ ચંદ્રબાબુ નાયડુએ બધાને અભિનંદન આપતા કહ્યું હતું કે, ચૂંટણી પ્રચારના 3 મહિના દરમિયાન વડાપ્રધાને આરામ કર્યો નથી. તેમણે એ જ ભાવનાથી શરૂઆત કરી અને એ જ ભાવના સાથે અંત પણ કર્યો. જેડીયુ ચીફ અને બિહારના મુખ્યમંત્રી નીતિશ કુમારે મોદીના નામનું સમર્થન કરતા કહ્યું કે, હું ઈચ્છતો હતો કે તેઓ આજે જ શપથ લે.
એનડીએની બેઠકમાં વડાપ્રધાન નરેન્દ્ર મોદીએ કહ્યું, મને નવી જવાબદારી આપવા બદલ આભાર. મારું એક જ ધ્યેય છે- ભારત માતા અને દેશનો વિકાસ. તેમણે કહ્યું કે, મારા જીવનની મારી દરેક ક્ષણ દેશના નામે છે. હું દેશવાસીઓમાટે 24X7 ઉપલબ્ધ છું. આપણે સાથે મળીને દેશને વિકાસના પંથે આગળ લઈ જવાનો છે. તમે જેટલો પ્રેમ આપ્યો છે. તમે જેટલો વિશ્વાસ વ્યક્ત કર્યો છે, હું તમારી આશાઓ અને આકાંક્ષાઓને પૂર્ણ કરવામાં કોઈ કસર છોડીશ નહીં. મારા માટે જન્મ માત્ર અને માત્ર વન લાઇફ વન મિશન અને તે છે મારી ભારત માતા. આ મિશન 140 કરોડ દેશવાસીઓના સપનાને સાકાર કરવા માટે સમર્પિત છે.
તમને જણાવી દઈએ કે ભારતીય જનતા પાર્ટી (BJP)ના નેતૃત્વમાં નેશનલ ડેમોક્રેટિક એલાયન્સ (NDA)એ ત્રીજી વખત બહુમતી મેળવી છે. એનડીએ ગઠબંધનને 292 બેઠકો મળી છે. જો કે, ભાજપ એકલા બહુમતીના આંક (272)ને સ્પર્શી શક્યું ન હતું અને માત્ર 240 બેઠકોથી સંતોષ માનવો પડ્યો હતો. વિપક્ષી ભારતીય બ્લોકને 234 બેઠકો મળી છે.
