દિલ્હીના મુખ્યમંત્રી અરવિંદ કેજરીવાલે રવિવારે AAP સાંસદો, ધારાસભ્યો અને નેતાઓ સાથે બીજેપી હેડક્વાર્ટર ખાતે વિરોધ પ્રદર્શન કર્યું હતું. તેઓ બપોરે 12 વાગે આમ આદમી પાર્ટી (AAP) કાર્યાલય પહોંચ્યા અને અડધા કલાક પછી પાર્ટીના નેતાઓ સાથે 800 મીટર દૂર બીજેપી હેડક્વાર્ટર તરફ કૂચ કરી હતી. જો કે કોઈપણ મોટા નેતાની ધરપકડ કર્યા વિના બપોરે 1:30 વાગ્યાની આસપાસ વિરોધનો અંત આવ્યો હતો. પોલીસે કેટલાક AAP સમર્થકોની અટકાયત કરી હતી જેમને થોડા સમય બાદ છોડી દેવામાં આવ્યા હતા.
દિલ્હીના મુખ્યમંત્રી અરવિંદ કેજરીવાલે પ્રદર્શન કરવા માટે બીજેપી હેડક્વાર્ટર તરફ કૂચ કરી હતી. તેમની સાથે પાર્ટીના નેતાઓ, સાંસદો અને ધારાસભ્યો પણ બીજેપી હેડક્વાર્ટર પહોંચ્યા હતા. વિરોધ પ્રદર્શનને જોતા અગાઉથી જ પોલીસે ભાજપ હેડક્વાર્ટરની બહાર સુરક્ષા વધારી દીધી હતી અને કલમ 144 લાગુ કરી હતી. ડીડીયુ રોડ પર પણ સવારે 11 થી બપોરના 2 વાગ્યા સુધી વાહન વ્યવહાર બંધ રહ્યો હતો. જે પ્રદર્શન પૂરું થયા બાદ ફરી શરૂ કરવામાં આવ્યો હતો.
આ પહેલાં કેજરીવાલ બપોરે 12 વાગે પાર્ટી કાર્યાલય ખાતે કાર્યકર્તાઓને સંબોધન કર્યુ હતું. તેમણે કહ્યું કે ભાજપે આપણને ખતમ કરવા માટે ત્રણ યોજનાઓ બનાવી છે. પ્રથમ- ચૂંટણી પછી પાર્ટીના ખાતા ફ્રીઝ કરવામાં આવશે. બીજું- પાર્ટીના મોટા નેતાઓની ધરપકડ કરવામાં આવશે. ત્રીજું- પાર્ટી ઓફિસ ખાલી કરાવવામાં આવશે.
પ્રદર્શનને જોતા પોલીસે કડક સુરક્ષા વ્યવસ્થા ગોઠવી હતી. ભાજપ કાર્યાલયની બહાર કલમ 144 લાગુ કરવામાં આવી હતી. તેમજ પ્રવેશ અને બહાર નીકળવાના માર્ગો પર બેરિકેડીંગ કરવામાં આવ્યું હતું. 18 મેના રોજ અરવિંદ કેજરીવાલે સ્વાતિ માલીવાલ પર હુમલો કરવાના આરોપમાં તેમના પીએ બિભવ કુમારની ધરપકડ બાદ એક વીડિયો જાહેર કરીને બીજેપી હેડક્વાર્ટર ખાતે પ્રદર્શનની જાહેરાત કરી હતી. બીજી તરફ સ્વાતિ માલીવાલે AAPના પ્રદર્શનની વચ્ચે પોસ્ટ કરી હતી જેમાં તેણે લખ્યું હતું કે જેઓ એક સમયે નિર્ભયા માટે ન્યાયની માંગ કરતા હતા તેઓ હવે આરોપી (બિભવ કુમાર)ને સમર્થન આપી રહ્યા છે.
સીએમ કેજરીવાલ તેમના ઘરે પહોંચ્યા
આમ આદમી પાર્ટીના નેતાઓ અને સમર્થકોના વિરોધનો અંત આવ્યા બાદ સીએમ કેજરીવાલ તેમના ઘરે પહોંચી ગયા છે. જ્યાં દિલ્હી પોલીસ સ્વાતિ માલીવાલ સાથે મારપીટના મામલામાં કેજરીવાલના ઘરે તપાસ કરવા પહોંચી હતી. પોલીસે અહીંથી સીસીટીવી ફૂટેજ અને ડીવીઆરની કોપી લીધી હતી.
