લોકસભા ચૂંટણીનું (Loksabha Election) બ્યુગલ વાગી ગયું છે અને પ્રથમ તબક્કાનું મતદાન (Voting) પણ થઈ ગયું છે. આ દરમિયાન પશ્ચિમ બંગાળના સીએમ મમતા બેનર્જીનો એક વીડિયો સામે આવ્યો છે જેમાં તે એક જાહેર રેલીમાં ડાન્સ કરતા જોવા મળી રહ્યા છે. પશ્ચિમ બંગાળના માલદામાં સીએમ મમતા બેનર્જીએ સ્ટેજ પર ડાન્સ કર્યો હતો અને ડ્રમ વગાડ્યું હતું. જણાવી દઈએ કે પ્રથમ તબક્કાની ચૂંટણીમાં થયેલ હિંસા બાદ મમતા બેનર્જીની નારાજગી વચ્ચે ચૂંટણી પંચે બીજા તબક્કામાં માટે બંગાળમાં સીએપીએફ ફોર્સ વધારી દીધી છે.
લોકસભા ચૂંટણીના પ્રથમ તબક્કામાં કૂચબિહાર સહિત ઉત્તર બંગાળની ત્રણ બેઠકો પર મતદાન દરમિયાન થયેલી હિંસામાંથી બોધપાઠ લઈને ચૂંટણી પંચે હવે રાજ્યમાં સેન્ટ્રલ આર્મ્ડ પોલીસ ફોર્સ (Central Armed Police Force) (CAPF)ની તૈનાતી વધારવાનો નિર્ણય લીધો છે. ચૂંટણીનો બીજા તબક્કામાં સેન્ટ્રલ ફોર્સની 303 કંપનીઓ તૈનાત કરવામાં આવશે. મમતા બેનર્જીની નારાજગી વચ્ચે પંચે આ નિર્ણય લીધો હતો. આ પહેલા શુક્રવારે મમતાએ CAPFના સંદર્ભમાં લખેલા પત્રને લઈને ચૂંટણી પંચ પર નિશાન સાધ્યું હતું. એક ચૂંટણી રેલીમાં મુખ્યમંત્રી મમતા બેનર્જીએ પૂછ્યું હતું કે તમે રાજ્ય પોલીસને બાયપાસ કરીને ચૂંટણી કેવી રીતે કરાવી શકો છો?
મમતા બેનર્જી અવારનવાર પોતાના નિવેદનોને કારણે ચર્ચામાં રહે છે. તાજેતરમાં તેમણે ભાજપ પર જોરદાર નિશાન સાધ્યું હતું અને કહ્યું હતું કે જો ભાજપને સત્તામાં આવતા અટકાવવામાં નહીં આવે તો લોકશાહી ખતરામાં આવશે. કૂચ બિહારમાં એક રેલીને સંબોધતા તેમણે કહ્યું હતું કે સત્તામાં આવ્યા બાદ ભાજપ લોકોના ખાવા-પીવાની ટેવ પણ નક્કી કરશે. તમને સવારની ચા સાથે ગૌમૂત્ર અને બપોરના ભોજન સાથે ગાયનું છાણ ખાવાનું કહેવામાં આવશે. તેમનું ફરી સત્તામાં આવવું એ દરેક વ્યક્તિની સ્વતંત્રતા માટે ખતરો છે. બંગાળના સીએમએ કહ્યું કે તેઓ નક્કી કરશે કે તમે શું ખાશો. ભાજપનો ઉદ્દેશ્ય લોકોના જીવનના દરેક પાસાઓને નિયંત્રિત કરવાનો છે. તમે શું ખાઓ છો, ક્યાં જાઓ છો, કેટલી ઊંઘો છો અને કોને મળો છો તેના પર પણ તેઓ નજર રાખશે.
મમતા બેનર્જીએ દાવો કર્યો હતો કે જો તમારે દેશની લોકશાહી અને સ્વતંત્રતા બચાવવી હોય તો ભાજપ શાસન હટાવો. તો જ દેશને બચાવી શકાશે. જો આ પાર્ટી ચૂંટણી જીતીને સત્તા પર આવશે તો દેશમાં ચૂંટણી નહીં થાય. તેઓ દેશમાં વન લીડર, વન નેશન, વન સ્પીચ અને વન ફૂડ ઈચ્છે છે.
