વડોદરા: ભાજપાના નેતાઓ કોઈક ના કોઈક મુદ્દે વિવાદમાં આવી રહ્યા છે. ત્યારે શહેર ભાજપાના યુવા મોરચાના પ્રમુખ પાર્થ પુરોહિતનો જાહેરમાં ઢીશુમ ઢિશુમનો વિડીયો વાયરલ થયો છે. યુવા નેતા અને બાઈક ચાલક રસ્તા વચ્ચે જ બાખડ્યા હતા અને જેના કારણે ટ્રાફિક જામ જોવા મળ્યો હતો. જાહેરમાં થયેલ મારામારીમાં ટ્રાફિક પોલીસે દરમિયાનગીરી કરી બંનેને છુટા પાડયા હતા. જો કે આ અંગે કોઈ પણ પ્રકારની ફરિયાદ નોંધવામાં આવી નથી.
હાલમાં નવરાત્રી પર્વ ચાલી રહ્યો છે ત્યારે શહેર ભાજપના યુવા મોરચાના પ્રમુખ પાર્થ પુરોહિત પોતાના પરિવાર સાથે ગરબે ઘુમવા જઈ રહ્યા હતા. દરમિયાન અક્ષરચોક નજીક આગળ ચાલતા એક બાઈક ચાલક હોર્ન મારવા છતાં વચ્ચેથી હટતો ન હતો. અને ત્યાર બાદ સામાન્ય અકસ્માત બાદ તેને માર્ગમાં જ બાઈક ઉભી કરી દીધી હતી. મૌલિક પંચાલ નામના આ વ્યક્તિ તેમજ ભાજપાના પાર્થ પુરોહિત વચ્ચે રસ્તા વચ્ચે જ ઝપાઝપી ચાલુ થઇ ગઈ હતી. જો કે યુવા ભાજપાના પ્રમુખે જાહેરમાં જ લુખ્ખાગીરી શરુ કરી દીધી હતી અને પક્ષને પણ ન માફક મારપીટ ઉપર ઉતરી આવ્યા હતા.
એક તબક્કે તેને આખો માર્ગ માથે લીધો હતો. અને જાણે પોતાનું સામ્રાજ્ય હોય તે પ્રકારનું વર્તન કરી રહ્યો હતો. આ મારામારીના આ દ્રશ્યો ત્યાંથી પસાર થઇ રહેલા વાહનચાલકે ઉતારી લીધા હતા. મારામારીના પગલે ટ્રાફિક પણ જામ થઇ ગયો હતો. જો કે ત્યાર બાદ ટ્રાફિક પોલીસે દરમિયાનગીરી કરી બંનેને છોડાવ્યા હતા. જો કે પાર્થ પુરોહિત પોલીસ સાથે પણ ક્ષણિક ઝપાઝપી ઉપર ઉતારી આવ્યો હતો.
પોતે જ સર્વસ્વ હોવાનો ખોપો ધરાવતા પાર્થે પોલીસની વર્દીની પણ મર્યાદા ન રાખી હોવાનું જાણવા મળ્યું છે. ત્યાર બાદ પોલીસ દ્વારા મૌલિક પંચાલને પોલીસ મથકે લઇ જવામાં આવ્યો હતો. જો કે આ અંગે કોઈ પણ પોલીસ ફરિયાદ નોંધાવવામાં આવી નથી. આ ઘટનામાં પાર્થ પુરોહિતને મોં ના ભાગે મૌલિક પંચાલે પાંચ જેવા હથિયારથી માર મારતા તેઓને હોઠ ઉપર 13 ટાંકા આવ્યા હતા.
મને માર માર્યા બાદનો વિડીયો વાયરલ થયો
હું મારી પત્ની સાથે ગરબા રમવા જઈ રહ્યો હતો દરમિયાન એક બાઈક ચાલાક આગળ ચાલી રહ્યો હતો અને હટતો ન હતો. મેં ઘણા હોર્ન માર્યા છતાં હટ્યો ન હતો અને ત્યાર બાદ તેને બાઈક આદિ મૂકી દઈ ગાળાગાળી કરવા લાગ્યો. મેં તેને રોકતા તેને મને ફેંટ મારી અને મોં ઉપર ગંભીર ઈજાઓ પહોંચાડી હતી. આ વિડીયો જે સામે આવ્યો છે તે ત્યાર બાદનો વિડીયો છે. બાઈક ચાલકે મને માર માર્યો છે મેં કોઈ શરૂઆત કરી નથી. – પાર્થ પુરોહિત, પ્રમુખ, યુવા ભાજપા, વડોદરા શહેર
આવા લુખ્ખા તત્વોને ભાજપા કેમ છાવરે છેની ચર્ચા
પાર્થ પુરોહિત અગાઉ પણ અનેક વિવાદોમાં આવી ચુક્યો છે. તેની સામે અનેક રજૂઆતો પણ કરવામાં આવી હતી. અગાઉ પણ સંગમ ચાર રસ્તા નજીક કાર પાર્કિંગ બાબતે મારામારી થઇ હતી. પાર્થ લજપતરાય નગરમાં જ રહેતા પાડોશી સાથે પણ આ કાર પાર્કિંગ મુદ્દે મારામારી કરી ચુક્યો છે જો કે તે સમયે પણ તેની સામે કોઈ પગલાં ભરવામાં આવ્યા ન હતા. તેના વિરુદ્ધ અનેક રજૂઆતો કરાઈ છે છતાં પાર્ટી દ્વારા આવા લુખ્ખા તત્વોને છાવરવામાં આવી રહ્યા હોવાનું પણ યુવા ભાજપામાં જ ચર્ચાઈ રહ્યું છે. પોતાને તીસ માર ખાં સમજતા અને પક્ષના જોરે ભાજપાની સરકારમાં પોતે જ સર્વસ્વ હોવાનું અભિમાન રાખતા આવા તત્વો સામે પક્ષ કુણું વલણ કેમ રાખે છે તેમ પણ ચર્ચાઈ રહ્યું છે.
