નવી દિલ્હી: ચારેય તીર્થોમાં સર્વોપરિ માનવામાં આવતી બાબા અમરનાથ યાત્રા (Amarnath Yatra 2023) શરૂ થઈ ગઈ છે. અમરનાથ યાત્રાની પ્રથમ ટુકડીને લેફ્ટનન્ટ ગવર્નર અને અમરનાથ શ્રાઈન બોર્ડના (Amarnath Shrine Board) અધ્યક્ષ મનોજ સિંહાએ ફ્લેગ ઓફ કર્યુ હતું. તીર્થયાત્રીઓનો પ્રથમ સમૂહ દક્ષિણ કાશ્મીર (Kashmir) હિમાલયમાં ભગવાન શિવના 3,880 મીટર ઉંચા ગુફા મંદિરની મુલાકાત લેશે. 62 દિવસની આ યાત્રા 1 જુલાઈથી કાશ્મીરથી બે રૂટથી શરૂ થશે. દરવર્ષે આ યાત્રા દરમિયાન સમગ્ર જમ્મુ બેઝ કેમ્પમાં (Jammu Base Camp) તમામ શ્રદ્ધાળુઓ બર્ફાની બાબાની ભક્તિમાં લીન જોવા મળે છે.
અમરનાથ ગુફાનો રસ્તો પહેલગામ અને બાલતાલથી છે
મળતી માહિતી મુજબ શ્રી બાબા અમરનાથ જીની ગુફા સુધી પહોંચવાનો પહેલો રસ્તો પહેલગામ છે અને બીજો રસ્તો બાલતાલ છે. જો આપણે દંતકથાઓ અને પુરાણોની વાત કરીએ તો તેમાં પહેલગામના રૂટનો ઉલ્લેખ કરવામાં આવ્યો છે, જ્યારે બાલતાલનો રૂટ એકદમ સરળ છે અને જે યાત્રીઓ લાંબો સમય ચાલી શકતા નથી તેઓ મોટાભાગે બાલતાલનો માર્ગ પસંદ કરે છે.
હેલ્મેટ પહેરવું જરૂરી, શ્રાઈન બોર્ડ તરફથી મફત સુવિધા
અમરનાથ યાત્રાને આ વખતે તમાકુ મુક્ત જાહેર કરવામાં આવી છે. એટલે કે હવે બાલતાલ અને પહેલગામ રૂટ પર તમાકુ અથવા તમાકુથી બનેલી અન્ય વસ્તુઓનું વેચાણ થશે નહીં. યાત્રા દરમિયાન પ્રથમ વખત ભૂસ્ખલન ગ્રસ્ત વિસ્તારોમાંથી પસાર થતી વખતે ભક્તોએ પથ્થરોથી બચવા માટે હેલ્મેટ પહેરવું જરૂરી રહેશે. ભક્તો શનિવારે પરંપરાગત બાલતાલ અને પહેલગામ માર્ગે પવિત્ર ગુફા તરફ આગળ વધશે. બાલતાલ રૂટ પર લગભગ અઢીથી ત્રણ કિલોમીટરના પટમાં મુસાફરોએ હેલ્મેટ પહેરવી પડશે. શ્રાઈન બોર્ડ દ્વારા આ સુવિધા વિનામૂલ્યે આપવામાં આવશે. બાલતાલ રૂટથી જતી બેચ હિમલિંગની મુલાકાત લીધા બાદ શનિવારે જ પરત ફરશે. અત્યાર સુધીમાં 3 લાખથી વધુ યાત્રાળુઓએ નોંધણી કરાવી છે. 62 દિવસની આ યાત્રા 1 જુલાઈથી શરૂ થશે.
જરૂરિયાતની બધી જ ચીજવસ્તુઓ ઉપલબ્ધ
આ યાત્રા દરમિયાન યાત્રાળુઓને સિમને કારણે ફોન બંધ, ગરમ કપડાંનો અભાવ જેવી મુ્શ્કેલીઓ ભોગવવી પડતી હતી. જો કે આ વખતે શ્રદ્ધાળુઓ માટે સારા સમાચાર એ છે કે બાલતાલમાં જ વ્યક્તિ 350 થી 550 રૂપિયામાં એક મહિનાની વેલિડિટી સાથે સિમ ખરીદી શકે છે. એટલું જ નહિ તે તરત ચાલુ પણ થઈ જાય છે. આ સાથે રેઈનકોટ, છત્રીઓ તેમજ ગરમ કપડાં અને ટ્રેકિંગ એસેસરીઝ પણ આસપાસ ઉપલબ્ધ છે. જંક-ફ્રાઈડ ફૂડના વેચાણ પર પ્રતિબંધ રહેશે. પરંતુ બંને માર્ગો પર 120 લંગર છે. જેથી શ્રદ્ધાળુઓને વધુ મુશ્કેલીઓનો સામનો ન કરવો પડે.
આ વર્ષની યાત્રા રેકોર્ડ તોડી શકે છે
મળતી માહિતી મુજબ આ વખતે લગભગ ત્રણ લાખ મુસાફરોએ પોતાનું રજિસ્ટ્રેશન કરાવ્યું છે, જ્યારે એવું પણ અનુમાન કરવામાં આવી રહ્યું છે કે આ વખતે મુસાફરીનો રેકોર્ડ તૂટી શકે છે. જો કે વર્ષ 2022ની વાત કરીએ તો તે સમયે માત્ર 44 દિવસની મુસાફરી હતી, જ્યારે ખરાબ હવામાનને કારણે 20 દિવસની મુસાફરીને ઘણી અસર થઈ હતી.
