મુંબઈ: ભારતીય શેરબજાર આજે ઐતિહાસિક ટોચે પહોંચી ગયું છે. નેશનલ સ્ટોક એક્સચેન્જ એ તેના જૂના ઓલ ટાઈમ હાઈના રેકોર્ડને પાછળ છોડીને નવી ઊંચાઈ હાંસલ કરી છે.
નિફ્ટી બુધવારે પ્રી-ઓપનમાં 18900 ની ઉપર ખુલ્યો હતો. અગાઉ નિફ્ટી 18,887.60 પોઈન્ટની સર્વકાલીન ઊંચી સપાટી હતી. નિફ્ટીએ 142 સેશન બાદ આ ઈતિહાસ રચ્યો છે. તમને જણાવી દઈએ કે, નિફ્ટીએ અગાઉ ઑક્ટોબર 2021માં 18,887 પૉઇન્ટની સર્વકાલીન ઊંચી સપાટી બનાવી હતી.
સેન્સેક્સ પણ 63701.78ની નવી ઓલ ટાઈમ હાઈ પર ખુલ્યો. અગાઉ 22 જૂન, 2023 ના રોજ સેન્સેક્સ 63601.71 ના નવા સર્વકાલીન ઉચ્ચ સ્તરે ખુલ્યો હતો. ત્યારે નિફ્ટીએ 18908.15 ના સર્વકાલીન ઉચ્ચ સ્તરેથી તેના દિવસના વેપારની શરૂઆત કરી હતી. આ પહેલા મંગળવારનો દિવસ અમેરિકી શેરબજાર માટે શાનદાર રહ્યો હતો.
ડાઉ જોન્સ, નાસ્ડેક અને એસએન્ડપી વધુ ઉછાળા સાથે બંધ થયા હતા. જેના કારણે ભારતીય બજારને આજે બુધવારે નવા રેકોર્ડ બનાવવાની તાકાત મળી છે. નોંધપાત્ર રીતે, છેલ્લા કેટલાક સત્રોથી, નિફ્ટી સતત ઓલ-ટાઇમ હાઈ બનાવવાનો પ્રયાસ કરી રહ્યો હતો. પરંતુ આખરે આજે નિફ્ટી અગાઉના તમામ રેકોર્ડ તોડીને નવી ટોચે પહોંચી ગયો છે. આ દરમિયાન સ્મોલકેપ અને મિડકેપ ઈન્ડેક્સમાં જોરદાર તેજી જોવા મળી રહી છે.
હાલમાં ભારતીય શેરબજાર નવી ઊંચાઈએ ટ્રેડ થઈ રહ્યું છે. સવારે 9.40 વાગ્યે સેન્સેક્સ 63600 પોઈન્ટની નજીક હતો. જ્યારે નિફ્ટી 18900 ની આસપાસ રહે છે. દરમિયાન અદાણી એન્ટરપ્રાઈઝ અને અદાણી પોર્ટના શેરમાં નિફ્ટી-50માં તેજી જોવા મળી રહી છે. આ સિવાય ટાઇટન, JSW સ્ટીલ અને બજાજ ફાઇનાન્સના શેર પણ દોઢ ટકા સુધી મજબૂત છે.
જોકે ખાનગી બેંકોના શેરમાં મામૂલી દબાણ છે. નિષ્ણાતોનું માનવું છે કે આગામી સમયમાં નિફ્ટીનો ટ્રેન્ડ મજબૂત જોવા મળી રહ્યો છે. વૈશ્વિક બજારમાંથી મળી રહેલા સકારાત્મક સંકેતોની સાથે નિફ્ટીએ મજબૂતી મેળવી છે, જેની મદદથી તેણે ઐતિહાસિક ઊંચાઈ હાંસલ કરી છે
