ટીવી શો પાપડ પોળ, ભાકરવાડી અને ‘રોકી હેન્ડસમ’ જેવી ફિલ્મોમાં જોવા મળેલા અભિનેતા સુનીલ વિશરાણી છેલ્લા બે દાયકાથી પોતાની વર્સેટિલિટીથી દર્શકોનું મનોરંજન કરી રહ્યા છે. તેની સાથેના તાજેતરના ઇન્ટરવ્યુ દરમિયાન, તેણે તેના સંઘર્ષ વિશે રસપ્રદ વાતો શેર કરી.
તમે ઘણી બધી બોલિવૂડ ફિલ્મો કરી છે અને એમાં તમે ઉત્તમ ભૂમિકાઓ ભજવી છે, આ સિવાય તમે ગુજરાતી નાટક ટીવી સિરિયલો અને ફિલ્મોમાં અદભુત ભૂમિકા ભજવી છે, તમે અત્યાર સુધી ભજવેલા તમામ પાત્રોમાંથી કોઈ એવું પાત્ર છે જે તમને હંમેશા યાદ રહેશે?
હિન્દી ફિલ્મોની વાત કરીએ તો ઘનચક્કર નામની એક ફિલ્મ હતી જેમાં ઈમરાન હાશ્મી અને વિદ્યા બાલન સ્ટારકાસ્ટ હતા.આ ફિલ્મના ઓડિશન ચાલતા હતા ત્યારે ફિલ્મના આસિસ્ટન્ટ ડાયરેક્ટર હતા જેનું નામ અનમોલ હતું, તેણે મને બોલાવ્યો. ઓડિશન માટે, તેણે મને ચાર પાત્ર વિશે જણાવ્યું અને કહ્યું કે તમારે આ ચાર પાત્ર પર ઓડિશન આપવાનું છે અને આ ચાર પાત્રોને અલગ-અલગ કહેવાના છે, એક પછી એક તમારે ઓડિશન આપવાનું છે, જેમાંથી દિગ્દર્શકને એક પાત્ર ગમ્યું. ત્યારપછી 15 દિવસ પછી મને આસિસ્ટન્ટ ડાયરેક્ટરનો ફોન આવ્યો કે ટ્રેનમાં મારામારી કરનારના પાત્ર માટે તમને ફાઈનલ કરવામાં આવ્યા છે. એ વખતે મારી એક સિરિયલ ચાલી રહી હતી.
તેથી દિવસ દરમિયાન તેનું શૂટિંગ હતું અને રાત્રે ઘનચક્કરનું શૂટિંગ કરવાનું હતું. કારણ કે ટ્રેનમાં શુટીંગ હતું એટલે પરવાનગી રાત્રે જ આપવામાં આવે છે. આ સમગ્ર દ્રશ્ય ટ્રેનની અંદર જ હતું. હું 7 દિવસનું શૂટિંગ કરી રહ્યો હતો, આખો દિવસ સિરિયલનું શૂટિંગ કરવું અને રાત્રે ફિલ્મનું શૂટિંગ કરવું મારા માટે એક પડકાર હતો. સિરિયલના શૂટિંગમાં બહુ ઓછો આરામ મળે છે. ફિલ્મના શૂટિંગમાં આરામ છે પરંતુ તે વચ્ચે આરામ મળે છે. પછી , જ્યારે આ પાત્ર પડદા પર આવ્યું ત્યારે હું એટલો ખુશ હતો કે મેં વિચાર્યું ન હતું કે તે આટલું સારું આવશે. કારણ કે ફિલ્મોનો અનુભવ મારા માટે બહુ ઓછો હતો. ફિલ્મ કલાકાર તરીકેનો મારો અનુભવ ઘણો ઓછો હતો. ત્યાર બાદ ફરીથી ઓફિસમાં ચેક લેવા માટે બોલાવ્યા તો ડાયરેક્ટર પોતે અંદરથી બહાર આવ્યા અને કહ્યું કે તમે બહુ સારું કામ કર્યું છે. ત્યારે મને લાગ્યું કે હું એ ફિલ્મ માટે હું જીત્યો છું!
તમે ગુજરાતી ફિલ્મો અને હિન્દી ટીવી શોમાં જાણીતો ચહેરો છો, પરંતુ જીવનમાં તમારો સંઘર્ષ શું રહ્યો છે અને તે સંઘર્ષમાંથી સૌથી યાદગાર ક્ષણ કઈ છે જેને તમે કાયમ માટે યાદ રાખવા માંગો છો?
સંઘર્ષ દરેકના જીવનમાં હોય છે, તે માત્ર અભિનેતાઓના જીવનમાં જ નથી, જેમ કે તમે પત્રકાર છો તો તમારે સંઘર્ષ તો કર્યો જ હશે. નવા પત્રકારથી આજે તમે જ્યાં છો ત્યાં સુધી પહોંચવા માટે તમે સંઘર્ષ કર્યો હશે. પરંતુ મને મારા પરિવાર, મારા માતા-પિતા અને મારા ભાઈનો ઘણો સપોર્ટ મળ્યો હતો, જ્યારે હું કૉલેજ દરમિયાન થિયેટર એક્ટિવિટી કરતો હતો, ત્યારે તેમનો સપોર્ટ ઘણો રહ્યો છે. હું તમને બીજી એક રસપ્રદ વાત કહું કે મેં 4 વર્ષની ઉંમરે થિયેટરમાં પગ મૂક્યો હતો. અને જ્યારે તમે નાની ઉંમરે સ્ટેજ પર જાઓ છો, ત્યારે આત્મવિશ્વાસનું સ્તર અલગ હોય છે, તમે સંઘર્ષ હંમેશા આત્મવિશ્વાસથી શરૂ કરો છો. નવા કલાકાર સ્ટેજ પર લોકોની સામે આવે ત્યારે કેમેરા સામે રજૂ કરવાનો ડર હોય છે. પરંતુ હું નાનપણથી જ સ્ટેજ પર કામ કરું છું અને અમારા ઘરમાં સંગીતનું વાતાવરણ છે, આ બધી પ્રવૃત્તિઓ શાળા સમયથી ચાલતી હતી.
કોલેજકાળમાં શોખ માટે કામ કરતો, શાળા-કોલેજમાં નાટક, સંગીત, ડાન્સ કરતો. પણ ઘરની આવક કરવી છે, ઘર પણ ચલાવવું હતું. પહેલા માતા-પિતા સાથ આપતા હતા. ઘરની આવક મારા પક્ષેથી ન આવી એટલે કોઈ જરા પણ બોલ્યું નહિ. કારણ કે એક સારો સુખી પરિવાર હતો. જ્યારે મેં પહેલીવાર ગુજરાતી નાટકોમાં અભિનય શરૂ કર્યો ત્યારે મને પ્રતિ સો માત્ર રૂ.75 મળતા હતા. અને જ્યારે અમે દોઢ મહિના સુધી રિહર્સલ કરતા હતા ત્યારે અમને તેના માટે કોઈ પૈસા મળતા ન હતા. તેને માત્ર ચા-નાસ્તો જ મળતો અને પોતાના ખર્ચે જ આવવું પડતું. આ મારો પ્રારંભિક સંઘર્ષ હતો જે હું હંમેશા યાદ રાખીશ અને હજુ પણ સારી સ્ક્રિપ્ટ પર કામ કરવા માટે સારા પાત્ર અને સારા પ્રોજેક્ટ સાથે કામ કરવા માટે સંઘર્ષ કરવો પડે છે, હું માનું છું કે અભિનેતાના જીવનમાં હંમેશા સંઘર્ષ હોય છે અને સંઘર્ષ આપણને ઘણું શીખવે છે! •
