આ એક વર્ષમાં આલિયા ભટ્ટ યા કેટરીના કૈફ જ નહીં બીજી કેટલીક અભિનેત્રીઓ પણ પરણી ગઈ અને તેમાં એક મૌની રોય છે. લગ્ન પછી આવતી પહેલી દિવાળીનો મહિમા બધાને જ હોય છે. જેની ફિલ્મો રજૂ થઈ હોય અને સફળ ગઈ હોય તેમના માટે તો દિવાળી ખાસ બની જતી હોય છે. આલિયા ભટ્ટ કદાચ વધારે ઉત્સાહથી દિવાળી મનાવશે અને કેટરીના કૈફ તેના વિકી કૌશલ સાથેના લગ્નજીવનમાં એકદમ ગોઠવાય ગઈ લાગે છે. માથે સિંદૂર લગાડી, લાલ સાડીમાં પતિ સાથે ફોટો પડાવતા તે એકદમ ભારતીય પત્ની બની ગઈ છે.
બાકી તેની ઈમેજ આવી નહોતી. એક અર્થમાં તે સલમાનને જવાબ આપી રહી છે કે તે મારી સાથે સંબંધ રાખ્યો પણ તેને લગ્નમાં ફેરવ્યો નહીં જ્યારે વિકીએ મને ટૂંકા સમયના સંબંધમાં લગ્નનું ગૌરવ આપ્યું. એવું લાગે છે કે આ વર્ષે જે પરણ્યા તેમાં કેટરીના-વિકી, આલિયા-રણબીરના લગ્નજીવનમાં વધુ નિકટતા અનુભવાય છે. મૌની રોય અને તેના પતિ નાંબીયારને આપણે બહુ જાણતા નથી. મૌની રોય હજુ ફિલ્મની એક્ટ્રેસ તરીકે ચર્ચાવા માંડી હતી અને પરણી ગઈ. આ એક વર્ષમાં જે અભિનેત્રીઓ પરણી તેમાં સૌથી વધારે ફિલ્મો આલિયા અને કેટરીના પાસે છે.
આમાં કેટરીના-સલમાનની ‘ટાઈગર-3’ને કદાચ વધારે અપેક્ષાથી પ્રેક્ષકો જોશે. આ કારણે જ આવતી દિવાળીએ તે રિલીઝ થશે એવી જાહેરાત આ દિવાળીએ કરી દેવામાં આવી છે. આ એક વર્ષ દરમ્યાન લોકોના મનમાં કેટરીના-સલમાનના વિત્યા સંબંધની ઉત્તેજના રહેશે ખરી? સલમાન આ ફિલ્મનું ખૂબ માર્કેટીંગ કરી રહ્યો છે અને તેમાં કેટરીના તો સાયલન્ટ છે. એ ફિલ્મના પ્રમોશનમાં કેટરીના પ્રોફેશનલ શરતો મુજબ ચોક્કસ ભાગ લેશે પણ હવે વાત બદલાઈ ચુકી છે. આલિયા હમણાં તેની આવનારી ફિલ્મો વિશે બહુ વાત કરતી નથી.
ફિલ્મોમાં આવ્યા પછી તેણે મોટો બ્રેક લિધો નથી એટલે બાળકના જન્મ પછી પણ તે ખાસ્સી મેટર્નિટી લિવ ભોગવશે. આ દરમ્યાન ‘જી લે જરા’ અને ‘રોકી ઔર રાનીકી પ્રેમ કહાની’માં કઈ વહેલી રજૂ થશે તેનો ઈંતેજાર રહેશે. આલિયાએ હમણાં કેટલાય વખતથી કોઈ નવી ફિલ્મ સ્વીકારી નથી. તેના મા બન્યા પછીના સમયમાં કઈ ફિલ્મનું શૂટિંગથી રજાઓ પુરી કરશે તેની રાહ જોવાશે. પણ મૌની રોય તો લગ્ન પછી કારકિર્દીમાં સાવ જ ધીમી પડી ગઈ છે. ટી.વી. સિરીયલે તેને નાગીન તરીકે ખૂબ જ ફેમસ કરી તેવી ફેમસ ફિલ્મોના કામથી નથી થઈ. હમણાં ‘બ્રહ્માસ્ત્ર’ પણ તેને એવી કાંઈ ચર્ચામાં લાવી દીધી નથી. અત્યારે તે એક સિંહાલા ફિલ્મ ‘માયા જાલા’માં કામ કરે છે અને ‘પેન્ટહાઉસ’ ફિલ્મમાં તે છે તો ખરી પણ ફિલ્મ બહુ ધીમી રીતે આગળ વધી રહી છે. અત્યારે તે ‘ડાન્સ ઈન્ડિયા ડાન્સ લિટલ માસ્ટર્સ-5’માં જજ તરીકે આવે છે. એવું લાગે છે કે લગ્ન પછી જેની કારકિર્દી ધીમી પડી ગઈ હોય તેમાં મૌની છે. ખેર! તે કદાચ પતિ સુરજ નાંબીયાર સાથે દૂબઈમાં દિવાળી ઉજવશે. •
