22 ઓગસ્ટથી ઝી ફાઈવ પર ‘સંજોગ’ ટી.વી. સિરીયલ શરૂ થઈ રહી છે.અગાઉ ‘સાથ નિભાના સાથિયા’, ‘સસુરાલ સિમર કા’, ‘શક્તિ અસ્તિત્વ કે અહેસાસ કી’, ‘સ્વરાગિની’ અને ‘સિલસિલા પ્યાર કા’ જેવી સિરીયલો બનાવનાર રશ્મિ શર્માની જ આ સિરીયલ છે આ પ્રોડકશન હાઉસની ‘સ’ બહુ લકી લાગે છે. ‘સંજોગ’માં શેફાલી શર્મા અમૃતા રાજીવ કોઠારીની મુખ્ય ભૂમિકામાં છે. આ પહેલાં ‘બની ઇશ્ક દા કલમા’માં બની, ‘તુમ ઐસે હી રહના’માં ડો. રિયા અગ્રવાલ ‘દિયા ઔર બાતી હમ’માં લાલિમા અગ્રવાલ અને ‘તેરે બીન’માં વિજય આકાશ સિંહની ભૂમિકા ભજવી ચુકેલી શેફાલી હિન્દી સિરીયલોમાં જરૂર જામી છે પણ હિન્દી ફિલ્મો તેનાથી દૂર રહે છે. હા, તમિલ, તેલુગુ, પંજાબી ફિલ્મમાં તે જરૂર કામ કરી ચુકી છે.
અમૃતસરમાં જન્મેલી શેફાલી શર્મા ફેશન ડિઝાઈનીંગ કરવા માંગતી હતી પણ કોર્સ પૂરો ન કરી શકી કારણ કે અભિનયમાં તે રોકાઇ ગઇ. હવે તે ટી.વી. સિરીયલોની ફેવરિટ એકટ્રેસ છે એટલે બીજુ કશું વિચારતી પણ નથી પણ હા, હિન્દી ટી.વી. સિરીયલોમાં તે વિત્યા છ વર્ષથી દૂર હતી તે ‘સંજોગ’થી ફરી ટીવી ભેગી થઇ છે. વરુણ શેઠી નામનો એકટર કે જે હવે ક્રિએટિવ હેડ છે તેને પરણેલી શેફાલીની ‘તુફાન સીંઘ’ નામની પંજાબી ફિલ્મ સેન્સર બોર્ડે રજૂ થવા દીધી નહોતી. એ ફિલ્મમાં તુફાન સીંઘ ટેરરિસ્ટ હોય છે જે ભ્રષ્ટ પોલીસ અને નેતાઓની હત્યા કરવા નીકળી પડે છે. જો કે એ ફિલ્મ ઓસ્ટ્રેલિયા, UK, ન્યુઝીલેન્ડમાં રજૂ થયેલી તો સારું કમાઈ શકેલી. શેફાલી શર્મા પોતાને અભિનેત્રી તરીકે મર્યાદિત રાખે છે ને જાહેર પ્રતિક્રિયાથી બચે છે. ‘સંજોગ’માં તે અને કામ્યા પંજાબી પ્રભાવક ભૂમિકામાં દેખાશે. શેફાલી શર્મા આ સિરીયલમાં માની ભૂમિકા ભજવે છે તેને જયારે પૂછાયું કે, ‘છ વર્ષ સુધી ટીવી પર કેમ ન દેખાય? તો કહે કે પંજાબી ફિલ્મોમાં બિઝી હતી અને ટીવી પર મને જે પ્રકારની ભૂમિકા કરવાનું કહેવાતું તે ગમતી નહોતી એટલે છ વર્ષ લાગી ગયા. પણ ‘સંજોગ’ એક સરસ સિરીયલ છે શેફાલી કહે છે તે ખરેખ સાચું છે કે નહીં તે તો હવે પ્રેક્ષકો જ કહેશે. પણ તેના આવવાથી આ સિરીયલ લોકોને જોવા જેવી તો લાગશે જ.
