અરબ સાગરમાં ડિપ્રેશનના લીધે રાજયમાં ત્રણ દિવસથી વરસાદી માહોલ જામ્યો છે. હવામાન વિભાગ અનુસાર હજુ આગામી ચારથી પાંચ દિવસ સુધી વરસાદ વરસે તેવી સંભાવના છે. દરમિયાન આજે સોમવારે તા. 27 ઓક્ટોબરની સવારે અમરેલી, ગીર-સોમનાથ, બોટાદ અને દીવમાં ભારે વરસાદ વરસ્યો હતો. સૌથી વધુ અમરેલીના રાજુલામાં સવારે બે કલાકમાં 6 ઈંચ વરસાદ ખાબકતા સર્વત્ર જળબંબાકારની સ્થિતિ સર્જાઈ છે.
આજે સવારના 6થી 8 વાગ્યા સુધીનો રાજ્યના 121 તાલુકામાં માવઠું વરસ્યું છે. બે કલાકમાં સૌથી વધુ વરસાદ અમરેલીના રાજુલામાં 6 ઈંચ તો સૌથી ઓછો પાટણના સમીમાં 1 મિમી વરસાદ નોંધાયો છે. અમરેલી પંથકમાં ભારે વરસાદની પગલે ચોમાસા જેવી કપરી સ્થિતિ જોવા મળી રહી છે. નદીઓ બે કાંઠે વહેવાની સાથે જ ગામમાં પણ નદીની જેમ પાણી વહી રહ્યાં છે.
અમરેલી, રાજુલા અને જાફરાબાદ પંથકમાં ભારે વરસાદને પગલે સોમનાથ-ભાવનગર નેશનલ હાઈવે પર પાણી ફરી વળતાં વાહનચાલકોને ભારે હાલાકી થઈ રહી છે. તો બીજી તરફ રાજુલાના ધાતરવાડી ડેમ-2ના પાણી ગામોમાં પ્રવેશતા ધારાનાનેસ ગામ સંપર્ક વિહોણું બન્યું છે. અહીં નદીના પ્રવાહમાં એક બોલેરો તણાઈ છે. ધરારાનાનેશમાં પૂરના કારણે વીજપોલ ધરાશયી થયો છે, જેનો લાઈવ વીડિયો પણ સામે આવ્યો છે.
આ 8 જિલ્લામાં વરસાદનું રેડ એલર્ટ
હવામાન વિભાગ દ્વારા આજે રાજ્યના 7 જિલ્લામાં વરસાદને લઈને રેડ એલર્ટ આપવામાં આવ્યું છે, જેમાં ગીર સોમનાથ, અમરેલી, દીવ, સુરત, ભરૂચ, બોટાદ, જુનાગઢ, રાજકોટનો સમાવેશ થાય છે. જ્યારે પોરબંદર, અમદાવાદ, સુરેન્દ્રનગર, વડોદરા, આણંદ, ખેડા, નર્મદા, છોટા ઉદેપુર, પંચમહાલ, દાહોદ, મહિસાગર, અરવલ્લી, ગાંધીનગર, સાબરકાંઠા, મહેસાણા, તાપી, ડાંગ, નવસારી, વલસાડ, દમણ અને દા.ન.હવેલીમાં ઓરેન્જ એલર્ટ આપ્યું છે. બાકીના જિલ્લામાં યલો એલર્ટ જાહેર કરાયું છે.
