નવી દિલ્હી: વડાપ્રધાન નરેન્દ્ર મોદી(Pm Modi)એ આજે 5G સેવા શરૂ કરી અને તેની સાથે જ આજથી દેશના 13 શહેરોમાં 5G સેવા શરૂ થઈ ગઈ છે. 5G સેવા શરૂ કરતા પહેલા PM મોદીએ દિલ્હીના પ્રગતિ મેદાન ખાતે ઈન્ડિયન મોબાઈલ કોંગ્રેસ (IMC)ની 6ઠ્ઠી આવૃત્તિનું ઉદ્ઘાટન કર્યું હતું.અહીં રિલાયન્સ ઈન્ડસ્ટ્રીઝ લિમિટેડ (RIL)ના ચેરમેન મુકેશ અંબાણી અને રિલાયન્સ જિયોના ચેરમેન આકાશ અંબાણીએ PM મોદીનું અભિવાદન કર્યું હતું. તેમજ 5G સેવાઓ વિશે સંપૂર્ણ ડેમો (Demo)આપ્યો હતો. જ્યાં પીએમ મોદીએ 5G સેવાઓનો જાતે અનુભવ કર્યો હતો.
વિદ્યાર્થીઓએ 5Gનો આ રીતે અનુભવ કર્યો
ભારતમાં 5G ટેક્નોલોજીની સંભવિતતા દર્શાવવા માટે, દેશના ત્રણ મોટા ટેલિકોમ ઓપરેટરો Jio, Vodafone અને Airtel વડાપ્રધાન સમક્ષ એક એક યુઝ કેસનું ડેમોંસટ્રેશન કર્યું હતું. જેમાં જિયોએ તેના ડેમોમાં 4 શાળાઓને એકસાથે કનેક્ટ કરી. મુંબઈની એક શાળાના શિક્ષકે ત્રણ અલગ-અલગ જગ્યાના વિદ્યાર્થીઓને ભણાવ્યા. PMએ અમદાવાદની રોપરા પ્રાથમિક શાળાના વિદ્યાર્થી સાથે વાત કરી હતી. વોડાફોન આઈડિયાએ 5G ની મદદથી દિલ્હી મેટ્રોની નિર્માણાધીન ટનલમાં કામદારોની સલામતીના ઉપયોગના કેસનું નિદર્શન કર્યું. પીએમ મોદીએ ટનલમાં કામ કરી રહેલા લોકો સાથે પણ વાત કરી. એરટેલે તેના ડેમોમાં ઉત્તર પ્રદેશના વિદ્યાર્થીઓને સામેલ કર્યા હતા. વિદ્યાર્થીઓને વર્ચ્યુઅલ અને ઓગમેન્ટેડ રિયાલિટીની મદદથી સોલાર સિસ્ટમ વિશે શીખવવામાં આવ્યું હતું. તેઓ સ્ટુડન્ટ હોલોગ્રામ દ્વારા સ્ટેજ પર દેખાયા અને પીએમ સાથે પોતાના શીખવાના અનુભવ શેર કર્યા હતા.
PM મોદીએ પોતે 5G સેવાઓનો અનુભવ કર્યો
વડા પ્રધાન નરેન્દ્ર મોદીએ શનિવારે 5G લૉન્ચ સાથે યુરોપમાં કારની ટેસ્ટ ડ્રાઇવ કરી હતી. વડાપ્રધાન મોદીએ નવી દિલ્હીના પ્રગતિ મેદાનમાં બેસીને 5G ટેક્નોલોજીની મદદથી યુરોપમાં કાર ચલાવી હતી. કેન્દ્રીય મંત્રી પીયૂષ ગોયલે વડાપ્રધાન મોદીનો ફોટો ટ્વીટ કરીને લખ્યું કે, ‘ભારત દુનિયા ચલાવી રહ્યું છે’.
5G દેશને દરેક ક્ષેત્રમાં પ્રગતિ તરફ લઈ જશે
PM એ કહ્યું કે શા માટે આપણા દેશને દરેક ક્ષેત્રમાં પ્રગતિ તરફ લઈ જવા માટે 5G નો ઉપયોગ ન કરવો. જેઓ સૌથી વધુ ઉત્સાહથી 5G જોઈ રહ્યા છે તે યુવાનો છે, યુવા પેઢી છે. રોજગારીની કેટલી નવી તકો ઉભી થવા જઈ રહી છે. મને ખાતરી છે કે આપણા ઉદ્યોગો અને યુવાનો આ દિશામાં સાથે મળીને કામ કરશે. પીએમ મોદીએ કહ્યું કે હું સરકારના લોકોને દિલ્હીમાં 5જી સંબંધિત આ 5 દિવસીય પ્રદર્શન જોવા માટે પણ કહીશ. હું શાળાના બાળકોને પણ આ પ્રદર્શન ધ્યાનથી જોવાનું કહીશ.
