વાયુસેનાના વડા એર ચીફ માર્શલ એ પી સિંહે ઓપરેશન સિંદૂર દરમિયાન પાકિસ્તાનને થયેલા નુકસાન અંગે મોટો ખુલાસો કર્યો. બેંગલુરુમાં આયોજિત એર ચીફ માર્શલ એલએમ કાત્રે લેક્ચર દરમિયાન તેમણે કહ્યું કે ઓપરેશન સિંદૂર હેઠળ ભારતીય વાયુસેનાની વાયુ સંરક્ષણ સપાટીથી હવામાં પ્રહાર કરતી મિસાઇલ સિસ્ટમે પાકિસ્તાનના 5 ફાઇટર જેટ અને એક AWACS વિમાનને તોડી પાડ્યું હતું.
તેમણે કહ્યું કે S-400 એર ડિફેન્સ સિસ્ટમે આ પાકિસ્તાની વિમાનોને તોડી પાડ્યા હતા, જેમાં AEW&C/ELINT વિમાનને 300 કિલોમીટરના અંતરેથી નિશાન બનાવવામાં આવ્યું હતું.
S-400 ગેમ ચેન્જર હતું
પહેલગામ ઘટના પછી પાકિસ્તાનમાં આતંકવાદી ઠેકાણાઓ સામે કરવામાં આવેલી કાર્યવાહીના પુરાવા પણ એર ચીફ માર્શલ સિંહે રજૂ કર્યા. તેમણે કહ્યું કે બધા લક્ષ્યો પહેલાથી નક્કી કરવામાં આવ્યા હતા. ઇમારતોને ઓળખી કાઢવામાં આવી હતી અને ચોક્કસ રીતે નિશાન બનાવવામાં આવ્યા હતા.
હુમલા પહેલા અને પછીની સેટેલાઇટ ઈમેજના આધારે નુકસાનનું મૂલ્યાંકન કરવામાં આવ્યું હતું. તેમણે કહ્યું કે આ મિશનમાં ઈન્ટર સર્વિસ કો-ઓર્ડિનેશન અને અત્યાધુનિક આર્મ્સ સિસ્ટમને કારણે ઓપરેશન સફળ રહ્યું અને દુશ્મનને ભારે નુકસાન થયું.
આ પહેલી વાર છે જ્યારે ભારતીય વાયુસેનાએ ઓપરેશન સિંદૂર દરમિયાન પાકિસ્તાનને થયેલા નુકસાન અંગે સત્તાવાર રીતે નિવેદન આપ્યું છે. એર ચીફ માર્શલ એપી સિંહે જણાવ્યું હતું કે S-400 સિસ્ટમ તાજેતરમાં જ વાયુસેનામાં સામેલ કરવામાં આવી હતી અને તે સમગ્ર ઓપરેશનમાં ગેમ-ચેન્જર સાબિત થઈ હતી. તેની રેન્જ પાકિસ્તાની વિમાનોને ભારતીય સરહદની નજીક આવતા અને તેમના લાંબા અંતરના ગ્લાઇડ બોમ્બનો ઉપયોગ કરતા અટકાવતી હતી.
પહલગામનો જવાબ આપવો જરૂરી હતો…: એર ચીફ માર્શલ
પહેલગામ હુમલાનો ઉલ્લેખ કરતા એર ચીફ માર્શલ સિંહે કહ્યું, ‘આપણે બધા જાણીએ છીએ કે પહેલગામની દુર્ભાગ્યપૂર્ણ ઘટનામાં કેટલા નિર્દોષ લોકો માર્યા ગયા. દેશ માટે જવાબ આપવો જરૂરી હતો. આ સંદેશ ફક્ત લોન્ચપેડ પૂરતો મર્યાદિત ન હોવો જોઈએ પરંતુ આતંકવાદી નેતૃત્વને પણ પડકારવો જોઈએ.
આ વિચારને ધ્યાનમાં રાખીને, અન્ય એજન્સીઓ સાથે, અમે નવ સ્થળોને નિશાન બનાવવાનો નિર્ણય લીધો.’તેમણે કહ્યું કે આ કાર્યવાહીમાં બહાવલપુર અને મુરીદકે સ્થિત બે આતંકવાદી મુખ્યાલયોને નિશાન બનાવવામાં આવ્યા હતા. તેમણે મુરીદકેમાં લશ્કર-એ-તૈયબાના મુખ્યાલય પર હુમલા પહેલા અને પછીના સેટેલાઇટ ફોટા પણ બતાવ્યા, જેમાં આતંકવાદી નેતૃત્વના રહેણાંક વિસ્તાર અને મીટિંગ હોલને ચોકસાઈથી નષ્ટ કરવામાં આવ્યા હતા.
એપી સિંહના જણાવ્યા મુજબ, આ મિશનમાં કુલ આઠ એજન્સીઓ અને ત્રણેય સેનાઓએ ભાગ લીધો હતો. સાત લક્ષ્યો સરહદની નજીક હતા, જ્યારે બે આતંકવાદી નેતૃત્વના ગઢની અંદર હતા. શસ્ત્રોમાંથી સીધા જ વિડિઓ ફૂટેજમાં હુમલાઓની પુષ્ટિ થઈ હતી.
તેમણે કહ્યું, આ ખૂબ જ સારી રીતે વિચારીને અને આયોજિત કાર્યવાહી હતી જેમાં અમે દિવસ અને લક્ષ્ય નક્કી કર્યું. પરિણામ એ આવ્યું કે પાકિસ્તાનને સ્પષ્ટ સંદેશ ગયો કે ભારત ફક્ત સરહદ પારના લોન્ચપેડ જ નહીં પરંતુ આતંકવાદી માળખાના હૃદય પર પણ હુમલો કરી શકે છે.
