વેનેઝુએલામાં અમેરિકાના સૈન્ય હુમલાએ વૈશ્વિક રાજકારણમાં ભારે હલચલ મચાવી દીધી છે. રાજધાની કારાકાસ પર કરવામાં આવેલા ભીષણ હવાઈ હુમલા બાદ વેનેઝુએલાના પ્રમુખ નિકોલસ માદુરોની ધરપકડ કરવામાં આવી છે. અમેરિકી સત્તાવાળાઓ માદુરોને ન્યૂયોર્ક લઈ ગયા હોવાનું જાણવા મળ્યું છે. અમેરિકા દ્વારા આ સમગ્ર કાર્યવાહીનું નામ ‘ઓપરેશન એબ્સોલ્યુટ રિઝોલ્વ’ રાખવામાં આવ્યું છે.
અમેરિકી એરસ્ટ્રાઈકમાં ભારે નુકસાન થયું છે.વેનેઝુએલા સરકારના એક અધિકારીએ જણાવ્યું છે કે કારાકાસમાં થયેલા હુમલામાં નાગરિકો અને સૈનિકો સહિત ઓછામાં ઓછા 40 લોકોના મોત થયા છે. અધિકારીએ સુરક્ષા કારણોસર પોતાનું નામ જાહેર કરવાનું ટાળ્યું હતું.
હુમલા બાદ પ્રમુખ નિકોલસ માદુરોને લઈ આવતું વિમાન ન્યૂયોર્કના સ્ટુઅર્ટ એર નેશનલ ગાર્ડ બેઝ પર લેન્ડ થયું હતું. લેન્ડિંગ પછી કડક સુરક્ષા વચ્ચે માદુરોને વિમાનમાંથી ઉતારવામાં આવ્યા હતા.
પ્રત્યક્ષદર્શીઓ અનુસાર રનવે પર મોટી સંખ્યામાં અમેરિકી ફેડરલ એજન્ટો તૈનાત હતા. આ પહેલા અમેરિકાના પ્રમુખ ડોનાલ્ડ ટ્રમ્પે એક તસવીર શેર કરી હતી. જેમાં માદુરોને હાથકડી પહેરેલી અને આંખો પર પટ્ટી બાંધેલી હાલતમાં એક અમેરિકી યુદ્ધજહાજ પર બતાવવામાં આવ્યા હતા.
અમેરિકી અધિકારીઓના જણાવ્યા પ્રમાણે આ ઓપરેશન દરમિયાન 150થી વધુ સૈન્ય વિમાનોનો ઉપયોગ કરીને વેનેઝુએલાની એર ડિફેન્સ સિસ્ટમને નિષ્ક્રિય કરવામાં આવી હતી. ત્યારબાદ હેલિકોપ્ટર મારફતે સ્પેશિયલ ઓપરેશન્સ ફોર્સને માદુરોના ઠેકાણા સુધી પહોંચાડવામાં આવી. સ્થાનિક સમય મુજબ રાત્રે 2 વાગ્યે હુમલો શરૂ થયો હતો અને અંદાજે 2 કલાક 20 મિનિટમાં સમગ્ર કાર્યવાહી પૂર્ણ કરવામાં આવી હતી.
આ ઘટનાને લઈ વિશ્વના અનેક દેશોમાં કડક પ્રતિક્રિયા જોવા મળી રહી છે. લેટિન અમેરિકા, યુરોપ, રશિયા અને ચીન સહિતના દેશોએ અમેરિકાના આ પગલાની નિંદા કરી છે અને પરિસ્થિતિને વધુ ગંભીર ન બને તે માટે તણાવ ઘટાડવાની અપીલ કરી છે.
