ગાંધીનગર: ગુજરાતમાં આજે ફરીથી ગરમીનો પારો 3 ડિગ્રી ઊંચે ગયો છે, જેના પગલે ભૂજ, રાજકોટ અને અમરેલીમાં આજે 39 ડિગ્રી ગરમી નોંધાવવા પામી છે. જયારે સૌરાષ્ટ્રના કેશોદમાં 15 ડિગ્રી ઠંડી નોંધાવવા પામી છે. જો કે હવે ગુજરાતમાં 5 ડિગ્રી ગરમી વધી શકે છે. તેવી ચેતવણી હવામાન વિભાગ દ્વારા ઈશ્યુ કરી દેવાઈ છે.
હવામાન વિભાગના વૈજ્ઞાનિકોના જણાવ્યા અનુસાર, આગામી પાંચ દિવસની અંદર ગરમીનો પારો 3થી 5 ડિગ્રી ઊંચે જશે, એટલું જ નહીં રાજયમાં 5 ડિગ્રી ગરમીના પ્રમાણમાં વધારો જોવા મળશે એટલે કે 41 ડિગ્રી સુધી ગરમી જઈ શકે છે.
આ ઉપરાંત હવામાન વિભાગ દ્વારા આગામી 5 દિવસ માટે રાજકોટ, કચ્છ, બનાસકાંઠા, અમરેલી અને ભાવનગરમાં હિટ વેવની સાથે હાઈ ટેમ્પરેચરની ચેતવણી ઈશ્યુ કરી દેવાઈ છે. ગરમીનો પારો આ જિલ્લામાં અચાનક ઊંચે જઈ શકે છે. લીંબુ પાણી અને છાશ તથા સતત પાણી પીવાની સલાહ અપાઈ છે.
હવામાન વિભાગના જણાવ્યા અનુસાર, રાજયના અન્ય શહેરો પૈકી અમદાવાદમાં 38 ડિ.સે., ડીસામાં 37 ડિ.સે., ગાંધીનગરમાં 38 ડિ.સે., વલ્લભ વિદ્યાનગરમાં 36 ડિ.સે., વડોદરામાં 37 ડિ.સે., સુરતમાં 36 ડિ.સે., ભૂજમાં 39 ડિ.સે., નલિયામાં 35 ડિ.સે., કંડલા પોર્ટ પર 35 ડિ.સે., કંડલા એરપોર્ટ પર 37 ડિ.સે., અમરેલીમાં 39 ડિ.સે., ભાવનગરમાં 35 ડિ.સે., રાજકોટમાં 39 ડિ.સે., મહુવા 37 ડિ.સે. અને કેશોદમાં 38 ડિ.સે. મહત્તમ તાપમાન નોંધાવવા પામ્યુ હતું. કેશોદમાં 15 ડિગ્રી લઘુતમ તાપમાન નોંધાવવા પામ્યું હતું.
