સોમવારે મોડી રાત્રે પાકિસ્તાનના કરાચીમાં આવેલી માલીર ડિસ્ટ્રિક્ટ જેલમાંથી કુલ 216 કેદીઓ ભાગી ગયા હોવાની માહિતી સામે આવી છે. પાકિસ્તાની મીડિયા રિપોર્ટ્સ અનુસાર પોલીસ અને જેલ અધિકારીઓએ જણાવ્યું હતું કે શહેરમાં સતત હળવા ભૂકંપના આંચકાને કારણે સર્જાયેલી અંધાધૂંધી વચ્ચે કેદીઓ ભાગી ગયા હતા. ઘણા કેદીઓ પહેલાથી જ તેમના બેરેકની બહાર હતા. આ કેદીઓએ અંધાધૂંધીનો લાભ લીધો અને જેલ સ્ટાફ પર દબાણ કર્યું. ત્યાર બાદ હિંસક અથડામણ સર્જાઈ હતી, જેનો લાભ લઈ કેદીઓ ભાગી ગયા હતા.
માલિર જિલ્લા જેલ જ્યાંથી કેદીઓનું જૂથ ભાગી ગયું હતું તેને સામાન્ય રીતે ‘બચ્ચા જેલ’ તરીકે પણ ઓળખવામાં આવે છે. જેલ પરિસરની અંદર અને આસપાસ ભારે ગોળીબારના અહેવાલ મળ્યા હતા, જેના કારણે નજીકના રહેણાંક વિસ્તારોમાં ભયનો માહોલ ફેલાયો હતો.
પોલીસ અને રેન્જર્સે વિસ્તારને ઘેરી લેતા રાષ્ટ્રીય ધોરીમાર્ગ સહિત અનેક માર્ગો અસ્થાયી રૂપે બંધ કરી દેવામાં આવ્યા હતા. પત્રકારો સાથે વાત કરતા , એસએસપી માલિર કાશિફ આફતાબ અબ્બાસીએ જણાવ્યું હતું કે, પોલીસ અને અર્ધલશ્કરી દળોની મોટી ટુકડી થોડીવારમાં જેલમાં પહોંચી ગઈ હતી અને નજીકના વસાહતો, હાઇવે અને ગામડાઓને સીલ કરી દીધા હતા. માલિરની મસ્જિદોમાંથી જાહેરાતો કરવામાં આવી હતી, જેમાં ભાગી ગયેલા કેદીઓને પકડવામાં જાહેર સહયોગની અપીલ કરવામાં આવી હતી, સમા ટીવીએ અહેવાલ આપ્યો હતો.
ડીઆઈજી જેલ હસન સાહેતુ અને ડાયરેક્ટર જનરલ રેન્જર્સ સિંધ મેજર જનરલ મુહમ્મદ શમરેઝે પણ જેલની મુલાકાત લીધી હતી અને સુરક્ષા વ્યવસ્થાની સમીક્ષા કરી હતી.
અહેવાલો અનુસાર જ્યારે ભૂકંપ આવ્યો ત્યારે સર્કલ નંબર 4 અને 5 ના 600 થી વધુ કેદીઓ આંતરિક જેલ પ્રક્રિયાઓને કારણે તેમના બેરેકની બહાર બેઠા હતા. ત્યારબાદ થયેલી અંધાધૂંધીથી ટૂંક સમયમાં રમખાણો જેવી પરિસ્થિતિ સર્જાઈ ગઈ, જેના કારણે જેલ ‘યુદ્ધક્ષેત્ર’માં ફેરવાઈ ગઈ. અધિકારીઓના મતે, જેલ ‘યુદ્ધક્ષેત્ર’માં ફેરવાઈ ગઈ. નિયંત્રણ મેળવવાના પ્રયાસમાં, જેલ સત્તાવાળાઓએ ગોળીબાર કર્યો.
એન્કાઉન્ટર દરમિયાન બે ફ્રન્ટિયર કોર્પ્સ (FC) કર્મચારીઓ સહિત ઓછામાં ઓછા પાંચ સુરક્ષા કર્મચારીઓ ઘાયલ થયા. એક કેદીનું મૃત્યુ થયું અને ત્રણ અન્ય ઘાયલ થયા. ઘાયલોને સારવાર માટે જિન્ના પોસ્ટગ્રેજ્યુએટ મેડિકલ સેન્ટરમાં દાખલ કરવામાં આવ્યા. સિંધના ગૃહમંત્રી ઝિયા-ઉલ-હસન લંજરે જેલની કોઈપણ દિવાલ તોડવામાં આવી હોવાનો ઇનકાર કર્યો હતો.
