જાંબુઘોડા:
જાંબુઘોડા અભ્યારણમાં આવેલા ઝંડ હનુમાન મંદિરે ચૈત્ર સુદ પૂનમ અને શ્રી હનુમાન જન્મોત્સવને લઇ હજારોની સંખ્યામાં ભક્તોએ દાદાના દર્શનનો લાભ લીધો હતો.
જાણવા મળ્યા મુજબ આજરોજ શનિવાર અને ચૈત્ર સુદ પૂનમના રોજ હનુમાન જયંતિને લઈ જાંબુઘોડા અભયારણ્યમાં અને ડુંગરોની હારમાળાઓ વચ્ચે બિરાજેલા ઝંડ હનુમાન દાદાના મંદિરે હજારોની સંખ્યામાં ભાવિક ભક્તોનો ઘસારો જોવા મળ્યો હતો. હનુમાન જન્મોત્સવને લઈ ઝંડ હનુમાન મંદિરે ત્રણ દિવસ પહેલાથી જ હનુમાન જયંતીની તડામાર તૈયારીઓ મંદિર ટ્રસ્ટ દ્વારા શરૂ કરવામાં આવી હતી. જ્યારે રાત્રિના 12:00 કલાકે હનુમાનજીની ભવ્ય આરતી કરવામાં આવી હતી. જેનો ખુબ જ મોટી સંખ્યામાં ભક્તોએ લાભ લીધો હતો. જ્યારે હનુમાન જયંતીને લઈ રાત્રીથી જ મોટી સંખ્યામાં ઝંડ હનુમાન મંદિરે ભક્તોનો ભારે ધસારો જોવા મળ્યો હતો. શનિવારના રોજ હનુમાન જયંતીને લઈ વહેલી સવારથી જ મોટી સંખ્યામાં ભક્તોનો ધસારો જોવા મળી રહ્યો હતો.
ઝંડ હનુમાન મંદિર ખાતે દર્શન અર્થે આવતા ભક્તો માટે ત્રણ ભંડારાઓનું આયોજન પણ કરવામાં આવ્યું હતું .આજે હનુમાન જયંત ને લઈ ઝંડ હનુમાન ખાતે ભક્તોનું કીડિયારું ઉભરાતા ઝંડ હનુમાન પરિસર માં મેળા જેેવો માહોલ જોવા મળ્યો હતો. હનુમાન જયંતીના શુભ દિવસે હનુમાન ભક્તો દ્વારા દાદાના દરબારમાં પોતાનું મસ્તક નમાવી દાદાના દર્શન કરી ધન્યતા અનુભવી હતી.
