22માર્ચથી 24માર્ચ દરમિયાન મહત્તમ તાપમાનમાં 2 થી 3ડિગ્રી સુધીનો વધારો જોવા મળી શકે છે
શુક્રવારે શહેરનું મહત્તમ તાપમાન 36.4ડિગ્રી સે., લઘુત્તમ તાપમાન 23.2ડિગ્રી સે. સુધી નોંધાયું હતું જ્યારે હવામાં ભેજનું પ્રમાણ 14%રહેવા પામ્યું હતું
(પ્રતિનિધિ) વડોદરા તા. 21
શનિવાર થી ત્રણ દિવસ સુધી સમગ્ર ગુજરાતમાં ગરમીનો પ્રકોપ જોવા મળે તેવી હવામાન શાસ્ત્રીઓ દ્વારા આગાહી કરવામાં આવી છે. તા.22 માર્ચથી મહત્તમ તાપમાનમાં 2 થી 3ડિગ્રી સુધીનો વધારો જોવા મળશે. મધ્ય ગુજરાત સહિત ઉત્તર ગુજરાતમાં ગરમીનો કહેર જોવા મળે તેવી શક્યતા વ્યક્ત કરી છે.
હાલમાં માર્ચ મહિનો જેમ જેમ આગળ વધી રહ્યો છે તેમ તેમ ગરમીનો પારો ઉંચકાઈ રહ્યો છે સમગ્ર ગુજરાતમાં ગરમીનો પ્રકોપ જોવા મળી રહ્યો છે ત્યારે હવે હવામાન શાસ્ત્રી અશોક પટેલ દ્વારા ત્રણ દિવસ એટલે કે તા 22 માર્ચ ને શનિવાર થી તા.24 માર્ચ સોમવાર સુધી ગરમીને લઇને અગમચેતી રાખવા ચેતવણી જાહેર કરી છે. તા.22માર્ચથી ગરમીનો પારો ઉંચકાશે જેમાં મહત્તમ તાપમાનમાં 2 થી 3ડિગ્રી સુધીનો વધારો જોવા મળશે. શનિવાર થી સોમવાર ત્રણ દિવસ મહત્તમ તાપમાન 39.0 થી 41.5 ડિગ્રી સેલ્સિયસ સુધી જવાની શક્યતા છે ત્યારબાદ એક થી દોઢ ડિગ્રી જેટલું તાપમાન ઘટી શકે છે આ દરમિયાન હિટવેવની શક્યતા રહેલી છે ખાસ કરીને ઉત્તર ગુજરાત અને મધ્ય ગુજરાતમાં ગરમીનો પ્રકોપ જોવા મળી શકે છે. શુક્રવારે શહેરનું મહત્તમ તાપમાન 36.4 ડિગ્રી સેલ્સિયસ નોંધાયું હતું જ્યારે લઘુત્તમ તાપમાન 23.2ડિગ્રી સેલ્સિયસ રહ્યું હતું સાથે જ હવામાં ભેજનું પ્રમાણ 14% રહેવા પામ્યું હતું. હાલમાં શહેરમાં ગરમીમાં થોડીક રાહત રહેવા પામી છે પરંતુ શનિવાર થી સોમવાર સુધી ફરી એકવાર ગરમીનો આકરો રાઉન્ડ જોવા મળશે જેમાં તાપમાનનો પારો 40ડિગ્રી સેલ્સિયસ ને વટાવી જશે ગત સપ્તાહે હિટવેવ બાદ તાપમાન 4.5 ડીગ્રી જેટલું નીચું આવ્યું હતું જેના કારણે ઉત્તર ગુજરાતમાં સૌરાષ્ટ્ર સહિત તાપમાન થોડું ઘટ્યું હતું પરંતુ ફરી એકવાર હિટવેવ સાથે શનિવાર થી સોમવાર દરમિયાન આકરી ગરમીનો અનુભવ ઉત્તર ગુજરાત અને મધ્ય ગુજરાતમાં લોકોને થવા સંભવ છે હાલમાં પણ જે રીતે ગરમી પડી રહી છે તેના કારણે બપોરે શહેરના રોડ રસ્તાઓ સૂમસામ બની જાય છે લોકો કામ વિના બહાર નિકળવાનું ટાળી રહ્યાં છે. લોકો ઠંડા પીણાં અને રસઘર નો સહારો લેતા નજરે પડે છે તે જ રીતે તાપથી બચવા માટે ટોપી ચશ્મા, હાથમોજા સાથે જ છત્રીનો ઉપયોગ કરી રહ્યા છે.
