પશુ પક્ષીના પિંજરાઓની પાછળ અને આગળના ભાગે વૃક્ષો પડતાં પશુ-પક્ષીઓને કોઈ નુકસાન ન થયું
મોર્નિંગ વોકર્સને પણ મંગળવારે સવારે એન્ટ્રી અપાઈ નહીં
વડોદરા: વડોદરામાં સોમવારની મોડી સાંજે 80 કીમીની ઝડપે જોરદાર વાવાઝોડું ત્રાટક્યું હતું. જેના લીધે શહેરમાં 100 થી વધુ વૃક્ષો પડી ગયા હતા. કમાટીબાગ ખાતે આવેલા પ્રાણીસંગ્રહાલયમાં પણ 12 વૃક્ષો પડ્યા હતા. જોકે આના કારણે પશુ પક્ષીઓને કશું નુકસાન થયું નથી.
વડોદરામાં સોમવારે સાંજે વાવાઝોડું ત્રાટક્યું ત્યારે પ્રાણીસંગ્રહાલય બંધ થઈ ગયું હતું. મુલાકાતીઓ પણ હતા નહીં. પક્ષીઓ પિંજરામાં હતા. જ્યારે મોટા જાનવરો નાઈટ હાઉસની અંદર જતા રહ્યા હતા. જે 12 વૃક્ષ પડ્યા છે તે પિંજરાઓની પાછળ અથવા આગળના ભાગે પડ્યા હોવાથી ૫શુ પક્ષીઓને કોઈ નુકસાન થયું નથી. પક્ષીઘર, વાઘખાનું વગેરે વિસ્તારમાં ઝાડ પડ્યા હતા. આજે સવારે પડી ગયેલા ઝાડ કટીંગ કરી રસ્તો ખુલ્લો કરવાની કામગીરી શરૂ કરવામાં આવી હતી. ગયા વર્ષે પણ 13 મેના રોજ 80 કીમીની સ્પીડે વાવાઝોડું આવ્યું ત્યારે પણ પ્રાણીસંગ્રહાલયમાં કેટલાક વૃક્ષો પડી ગયા હતા. કમાટીબાગના ઘણા લાંબા સમયથી બંધ રહેલા જર્જરિત બ્રિજ પાસે પણ તોતિંગ વૃક્ષ પડી જતા તેને હટાવવાની કામગીરી ચાલુ કરવામાં આવી હતી.
વાવાઝોડાના પગલે કમાટી બાગમાં તારાજી સર્જાઇ હતી જેને પગલે સવારે બગીચામાં કોઈ મોર્નિંગ વોકર્સ પ્રવેશ નહીં આપીને દરવાજા બંધ કરી દેવાયા હતા. જ્યારે ઝૂ ક્યુરેટરે પણ બગીચામાં આવી શકાય તેમ નહીં હોવાનું જણાવીને આડક્તરી રીતે પોતાના હાથ ઊંચા કરી દીધા હતા.
