અગ્નિશમન સેવા માટે BRONTO SKYLIFTના મરામત ખર્ચ સહીત પાણી પુરવઠા, ગટરલાઇન, ઓડિટ રિપોર્ટ અને આઉટસોર્સિંગ બાબતના વિવિધ કામોને મંજૂરી અપાવવાની તૈયારી
વડોદરા મહાનગરપાલિકા દ્વારા ૨૫ એપ્રિલ, ૨૦૨૫ના રોજ યોજાનારી સ્થાયી સમિતિની બેઠકમાં કુલ ૧૦ કામોની દરખાસ્ત રજૂ કરવામાં આવી રહી છે. આમાંથી બે કામો અગાઉ મુલત્વી રાખવામાં આવ્યા હતા અને હવે ફરી મંજૂરી માટે રજૂ કરાયા છે. મહત્વનું છે કે, અગ્નિશમન અને તાત્કાલિક સેવાના BRONTO SKYLIFT વાહનની મરામત બાબતની વિવાદિત દરખાસ્ત પણ ફરી રજૂ કરવામાં આવી છે. બેઠકમાં ગટરલાઇનના કામો માટે બે મહત્વપૂર્ણ દરખાસ્તો રજૂ થઇ છે. વહીવટી વોર્ડ નં-૧૨ના બિલ મઢી અને ચાપડ રોડ વિસ્તારમાં નવા વરસાદી ગટર લાઇનના કામ માટે રૂ. ૭૨ લાખ કરતાં વધુના ખર્ચે ઇજારદાર “સ્નેહલ કન્સ્ટ્રક્શન”ના ભાવપત્રોને મંજૂરી આપવાની ભલામણ કરવામાં આવી છે.
અગ્નિશમન અને તાત્કાલિક સેવા વિભાગ દ્વારા વડોદરા શહેર માટે ત્રણ માસ માટે ૨૦૦ તાલીમબદ્ધ રેસ્ક્યુર વોલન્ટિયર્સની ભરતી કરવાની દરખાસ્ત રજૂ કરવામાં આવી છે. સાથે જ, ૪૪ મીટર ઊંચાઈ ધરાવતા BRONTO SKYLIFT મશીનના મરામત માટે અંદાજે રૂ. ૪૫.૯૫ લાખના ખર્ચને મંજૂરી આપવા ભલામણ કરાઈ છે. ઓડિટ વિભાગ તરફથી પોસ્ટ ઓડિટની વિગતો દરખાસ્તમાં સામેલ છે. સાથે જ, ચીફ ઓડિટર એચ.એમ. રાવને ૯ દિવસની રજા મંજૂર કરવાની ભલામણ પણ અહીં સમાવિષ્ટ છે.
પાણી પુરવઠા શાખામાંથી રજૂ થયેલી દરખાસ્ત મુજબ પૂર્વ ઝોનના આજવા રોડ વિસ્તારમાં ૩૦૦ મીમી વ્યાસની પાણી લાઇન નાંખવાનું કામ અંદાજે રૂ. ૪૫.૪૮ લાખના ખર્ચે કરવાની દરખાસ્ત રજૂ કરાઈ છે. આ દરખાસ્ત અગાઉ મુલત્વી રાખવામાં આવી હતી, જે હવે ફરી સમિતિ સમક્ષ રજૂ કરાઈ છે. સોલિડ વેસ્ટ મેનેજમેન્ટ વિભાગની દરખાસ્ત મુજબ ૧૫મા નાણાંપંચ હેઠળ મળેલા રૂ. ૨૭૮.૩૦ કરોડના ફંડમાંથી કુલ ૪૨ કામોની મંજૂરી આપવાની અને તેમાં ફેરફાર કે નવા કામો ઉમેરવાની સત્તા મ્યુનિસિપલ કમિશ્નરને આપવાની ભલામણ પણ દરખાસ્તમાં સામેલ છે.
શ્રી સયાજીબાગ ઝૂ વિભાગ દ્વારા ઝૂના પ્રાણીઓ માટે શાકભાજી અને ફળફળાદી ખરીદવા રૂ. ૭૬.૨૭ લાખના ભાવે દરખાસ્ત રજૂ કરવામાં આવી છે. ખરીદીની પ્રક્રિયા બે વર્ષના ઇજારાના આધારે કરવામાં આવશે. સામાન્ય વહીવટ વિભાગની દરખાસ્ત અનુસાર વડોદરા મહાનગરપાલિકા દ્વારા વિવિધ વિભાગોમાં પાટાવાળા પૂરા પાડવા માટે હાલના ઇજારાને ત્રણ મહિના સુધી વધારવાની ભલામણ કરવામાં આવી છે.
