એક સપ્તાહમાં ગાય સંબંધિત ત્રીજો અકસ્માત; અગાઉ બાઇક સવારનું સ્થળ પર જ મોત, છૂટા પશુઓની સમસ્યા ઉગ્ર બની
વડોદરા: વડોદરા શહેરમાં રસ્તા વચ્ચે ફરતી અથવા બેઠેલી ગાયોના કારણે સર્જાતા અકસ્માતોની ઘટનાઓમાં સતત વધારો નોંધાઇ રહ્યો છે. કિશનવાડી વિસ્તારમાં ગધેડા માર્કેટ ચાર રસ્તા પાસે આજે વહેલી સવારે એક આવી ઘટના બની હતી, જેમાં રિક્ષા ચાલક ગંભીર રીતે ઇજાગ્રસ્ત થયો હતો અને તેને સારવાર માટે સયાજી હોસ્પિટલમાં ખસેડવામાં આવ્યો હતો.
તુલસીવાડી વિસ્તારમાં રહેતા 44 વર્ષીય શેખ મહંમદ રફિકમીંયા રવિવારે સવારે સાડા સાત વાગ્યે પોતાનો રિક્ષો લઇ કિશનવાડી વિસ્તારમાંથી પસાર થઈ રહ્યા હતા. તે સમય દરમિયાન રસ્તા વચ્ચે અચાનક ગાય આવી જતા રિક્ષાનું નિયંત્રણ બગડી ગયું હતું. આ અકસ્માતમાં રફિકમિયાના કપાળ અને પગમાં ઇજા પહોંચી હતી. હોસ્પિટલ સૂત્રોના જણાવ્યા અનુસાર હાલ તેમનો હાલત સુધરતી દિશામાં છે.
ગાયોના કારણે અકસ્માત સર્જાવાની આ એક જ સપ્તાહમાં ત્રીજી ઘટના છે. અઠવાડિયા અગાઉ, ન્યુ સમા રોડ પર મંગલ દર્શન સોસાયટીમાં રહેતા સંદીપ સત્યેન્દ્રસિંહ નેગી નામના યુવાનનું મોત થયું હતું. તે મોડીરાત્રે બાઇક લઇને ઘરે જઈ રહ્યો હતો ત્યારે નિઝામપુરા મહેસાણા નગર ગરબા ગ્રાઉન્ડની સામે રોડ વચ્ચે બેઠેલી ગાય સાથે અથડાતા તેનું સ્થળ પર જ મૃત્યુ થયું હતું.
તે સિવાય, માંજલપુર વિસ્તારમાં રહેતા યુવક ભાવિન પટેલ ગઇકાલે સોમા તળાવ ચાર રસ્તા નજીકથી બુલેટ લઇને પસાર થઇ રહ્યા હતા, ત્યારે રસ્તા વચ્ચે આવી ગયેલી ગાયને બચાવવા જતા ઇજાગ્રસ્ત થયો હતો.
સ્થાનિક નાગરિકોનો આક્ષેપ છે કે, શહેરના અનેક વિસ્તારોમાં રસ્તા વચ્ચે ગાય અને છૂટા પશુઓ બેસી રહે છે છતાં મનપા દ્વારા તેડી સેન્ટરની કામગીરી અસરકારક રીતે નથી થતી. છૂટા પશુઓના કારણે નગરજનોને રોજ ઝંખના સહન કરવી પડે છે અને અનેક વખત જાનહાનિના બનાવો બન્યાં હોવા છતાં તંત્ર ઉચિત પગલાં લેતું નથી એવી ફરિયાદ પણ ઉઠાવવામાં આવી છે.
