14 જેટલા કામોનો સર્વાનુમતે ઠરાવ કરી ગણતરીની મીનીટમાં સામાન્ય સભા સમેટાઈ ગઈ
દાહોદ :
દાહોદ નગરપાલિકાના સભા ખંડ ખાતે આજરોજ વર્ષ ૨૦૨૫-૨૬ના વર્ષનું બજેટ સત્ર તેમજ સાથે ત્રિમાસિક સામાન્ય સભાનું આયોજન કરવામાં આવ્યું હતું. આ બજેટ સભામાં રૂ. ૧૧,૬૫,૪૫,૮૦૧નું પુરાંતવાળા બજેટની જાહેરાતની સાથે સાથે સામાન્ય સભામાં ૧૪ જેટલા કામોનો સર્વાનુમતે ઠરાવ કરી ગણતરીની મીનીટમાં સામાન્ય સભા સમેટાઈ ગઈ હતી.
દાહોદ નગરપાલિકા ખાતે સભા ખંડમાં આજરોજ બજેટની સાથે સાથે ત્રિમાસીક સામાન્ય સભા મળી હતી. આ બજેટ અને સામાન્ય સભામાં લગભગ તમામ હોદ્દેદારો હાજર રહ્યાં હતાં. બજેટમાં વર્ષ ૨૦૨૫-૨૬ના વર્ષ બજેટમાં રૂા.૧,૩૩,૮૫,૬૭,૬૭૬ની આવત અંદાજીત થનાર છે. તેમાં ઉઘડતી સિલક રૂા.૪૬,૯૦,૫૬,૬૨૨ ઉમેરતા કુલ ૧,૮૦,૭૬,૨૪,૨૯૮ થાય છે. જેની સામે નગરપાલિકામાં જુદા જુદા વિભાગોમાં રકમની ફાળવણી કરતાં તેમજ કામોને અગ્રતા આપતા રૂા.૧,૬૯,૧૦,૭૮,૪૯૭નો ખર્ચ અંદાજવામાં આવ્યો છે. આમ, અંદાજપત્રમાં આવક અને ખર્ચની જાેગવાઈઓને ધ્યાનમાં લેતાં રૂા.૧૧,૬૫,૪૫,૮૦૧નું પુરાંતવાળુ બજેટ જાહેર કરવામાં આવ્યું હતું. સાથે સાથે ત્રિમાસીક સામાન્ય સભા પણ જાેડે જાેડે યોજાઈ હતી . જેમાં ૧૪ જેટલા કામોને સર્વાનુમતે મંજુર કરી બહાલી આપવામાં આવી હતી. આ કામોમાં કારોબારી સમિતિમાં થયેલા ઠરાવો, નિવૃત કર્મચારીઓને મળવાપાત્ર નિવૃતિ પુર્વેના મળવાપાત્ર લાભો આપવા, લોકમની અરજી બાબતે યોગ્ય ઠરાવ તેમજ દાહોદ નગરપાલિકામાં વય નિવૃતિના કારણે, મહત્વની ખાલી પડેલ જગ્યાઓ પર ભરતી કરવા બાબતે યોગ્ય ઠરાવ સર્વાનુમતે પસાર કરવામાં આવ્યો હતો.
——————————————–
