ડ્રાઈવરની બેદરકારી કે સત્તાનો દુરુપયોગ? વોર્ડ 12 ની કચરા ગાડી કોર્પોરેશનની હદ વટાવી ચાંપડ કેવી રીતે પોહચી અનેક સવાલો ઉભા થયા
વડોદરા મ્યુનિસિપલ કોર્પોરેશન ના વોર્ડ નં. 12 ની કચરા ઉપાડવાની ગાડીના ડ્રાઈવરની બેદરકારીને કારણે આજે એક મોટી દુર્ઘટના સર્જાઈ હતી. ખરાબ ડ્રાઈવિંગના કારણે ગાડી રોડ પર પલટી ખાઈ ગઈ હતી, જેમાં એક સફાઈ મજૂરને ઈજા પહોંચી હોવાના સમાચાર પ્રાપ્ત થયા છે. જોકે, આ અકસ્માત બાદ અનેક સવાલો ઉભા થયા છે, કારણ કે આ ગાડી કોર્પોરેશનની હદ બહાર ‘ચાંપડ’ ગામે પહોંચી હતી.
મળતી માહિતી મુજબ, વોર્ડ નં. 12 ની કચરાની ગાડી આજે રાબેતા મુજબના રૂટ પર હોવાને બદલે શહેરની હદની બહાર ચાંપડ ગામ તરફ જઈ રહી હતી. ડ્રાઈવર ગાડી અત્યંત બેદરકારીપૂર્વક હંકારી રહ્યો હોવાથી ગાડી પરનો કાબૂ ગુમાવ્યો હતો અને ગાડી રોડ પર જ પલટી મારી ગઈ હતી. આ અકસ્માતમાં ગાડીમાં સવાર એક મજૂરને શરીરે ઈજાઓ પહોંચી છે.
આ અકસ્માતે વહીવટી તંત્રની પોલ ખોલી દીધી છે. વોર્ડ 12 ના રહીશોએ આ બાબતે ઉગ્ર રોષ વ્યક્ત કરતા સવાલ ઉઠાવ્યો છે કે, વડોદરા કોર્પોરેશનના ડિઝલ અને સાધનોનો ઉપયોગ શહેરની સફાઈ માટે કરવાનો હોય છે, તો પછી આ ગાડી કોના આદેશથી VMC ની હદ વટાવીને ચાંપડ ગામ સુધી ગઈ હતી?
શહેરમાં અનેક વિસ્તારોમાં કચરો ઉઠાવવાની સમસ્યાઓ છે, ત્યારે સરકારી ગાડીઓનો હદ બહાર ઉપયોગ થવો એ ગંભીર બાબત છે. શું આ ગાડીનો ઉપયોગ કોઈની ભલામણ પર ખાનગી સફાઈ માટે થયો હતો? ઈજાગ્રસ્ત મજૂરની હાલત અને ગાડીને થયેલા નુકસાન માટે જવાબદાર કોણ? આવા અનેક પ્રશ્નો હાલ લોકમુખે ચર્ચાઈ રહ્યા છે.
