ડભોઇ:;ડભોઈ નગરપાલિકાની નવી વોર્ડ રચના જાહેર થતા જ સ્થાનિક રાજકારણમાં અચોક્કસતા અને ગૂંચવાડાની સ્થિતિ ઊભી થઈ છે. વોર્ડની સીમાઓ, નંબર અને અનામત શ્રેણીમાં થયેલા ફેરફારોએ અત્યાર સુધી સ્થિર ગણાતી રાજકીય ગણતરીઓને હલાવી દીધી છે. પરિણામે અનેક રાજકીય મુરતિયા અને વર્તમાન નગરસેવકો નવા રાજકીય વાસ્તવિકતા સમજી રહ્યા છે.
વોર્ડ સીમા અને નંબર બદલાવથી રાજકીય અસંતુલન
નવી રચનામાં કેટલાક વોર્ડની ભૌગોલિક સીમાઓ બદલી દેવામાં આવી છે તો કેટલાક વોર્ડના નંબર પણ બદલાયા છે. અગાઉનો વોર્ડ નં. 3 હવે 5 બન્યો છે, જ્યારે વોર્ડ નં. 5ને 3માં ફેરવવામાં આવ્યો છે. તે ઉપરાંત વોર્ડ નં. 6ને વોર્ડ નં. 8માં સમાવાતા સ્થાનિક નેતાઓ માટે પોતાનું મતબેંક સમજવી મુશ્કેલ બની છે.
વેગા કજાપુરને વોર્ડ નં. 2માં અને તરસાણા–ટિંબી વિસ્તારને વોર્ડ નં. 3માં સામેલ કરવામાં આવતાં જૂની ઓળખ અને વિકાસ આધારિત રાજકીય દાવાઓ નબળા પડ્યા છે.
36 બેઠકોમાં 50% સ્ત્રી અનામત : નવા ચહેરાઓ માટે તક
કુલ 9 વોર્ડ અને 36 બેઠકો ધરાવતી ડભોઈ નગરપાલિકામાં અડધા જેટલી એટલે કે 18 બેઠકો સ્ત્રી અનામત રહેશે. આ અનામત વિતરણ મુજબ 9 સામાન્ય, 5 ઓબીસી, 3 અનુસૂચિત આદિજાતિ અને 1 અનુસૂચિત જાતિ સ્ત્રી બેઠકનો સમાવેશ થાય છે. પુરુષ બેઠકોમાં પણ સમાન રીતે 18 બેઠકો ફાળવવામાં આવી છે, જેનાથી ઘણા વર્તમાન પુરુષ નગરસેવકો માટે રાજકીય ભવિષ્ય અનિશ્ચિત બન્યું છે.
‘સેફ સીટ’ની ધારણા તૂટી, મોનોપોલી વોર્ડ નિશાન પર
વિશ્લેષકોનું માનવું છે કે નવી વોર્ડ રચનામાં લાંબા સમયથી એક જ જૂથ અથવા વ્યક્તિની પકડ ધરાવતા ‘મોનોપોલી’ વોર્ડને ખાસ કરીને ટાર્ગેટ કરવામાં આવ્યા છે. જેના કારણે અત્યાર સુધી સલામત ગણાતી બેઠકો હવે જોખમી બની ગઈ છે. ઘણા સંભવિત ઉમેદવારોને પોતાનો વોર્ડ બદલવાની ફરજ પડશે એવી શક્યતા દેખાઈ રહી છે.
મતદારોની વહેચણી : અસમાનતા ચર્ચાનો વિષય
ડભોઈના કુલ 54,895 મતદારોને વોર્ડ મુજબ વહેંચવામાં આવ્યા છે. જેમાં વોર્ડ નં. 8માં સૌથી વધુ 6,646 મતદારો છે જ્યારે વોર્ડ નં. 7માં માત્ર 5,489 મતદારો હોવા અંગે અસમાનતાની ચર્ચા ચાલી રહી છે. આ મતદારોના તફાવતને લઈ આવનાર સમયમાં વાંધાઓ ઉઠે તેવી શક્યતા નકારી શકાતી નથી.
ગોડફાધર રાજકારણ ફરી સક્રિય
નવી વોર્ડ રચના એટલી જટિલ બની છે કે ઘણા રાજકીય મુરતિયા અને નવા ઉમેદવારો હવે વોર્ડની સમજ મેળવવા માટે અનુભવી રાજકીય ગોડફાધરોના માર્ગદર્શન પર નિર્ભર બન્યા છે. આ સ્થિતિ દર્શાવે છે કે આવનાર નગરપાલિકા ચૂંટણીમાં માત્ર લોકપ્રિયતા નહીં, પરંતુ વ્યૂહરચના અને સંગઠન શક્તિ મહત્વની ભૂમિકા ભજવશે.
ચૂંટણીમાં નવાજુનીના સંકેત
સારાંશરૂપે, ડભોઈની નવી વોર્ડ રચનાએ રાજકીય ગણિત ફરીથી ગોઠવી દીધું છે. ઘણા જૂના સમીકરણો તૂટ્યા છે અને નવા ચહેરાઓ માટે તક ઊભી થઈ છે. આવનારી નગરપાલિકા ચૂંટણીમાં મોટા ફેરફારો અને નવાજુની જોવા મળશે તેવું હાલના રાજકીય સંકેતો સ્પષ્ટ કરે છે.
