વોર્ડ નં. 15 ની કચેરીએ વિરોધ, ‘પાણી નહિ, તો વેરો નહિ’ ના નારા
વડોદરાના ગોરવા વિસ્તારમાં પીવાના પાણીની ગંભીર સમસ્યા સામે સ્થાનિકોએ ભારે આક્રોશ વ્યક્ત કર્યો છે. અનેક સોસાયટીઓમાં લોકો શૂદ્ધ પીવાના પાણી માટે હેરાન થઈ રહ્યા છે. આ પ્રશ્નને લઈને અનેક વખત તંત્રને રજુઆત કરવામાં આવી હોવા છતાં કોઇ ઉકેલ આવ્યો નથી. પરિસ્થિતિ એટલી ગંભીર બની છે કે, સ્થાનિકોએ નળના બદલે માટલાં સાથે રસ્તા પર ઉતરી વિરોધ નોંધાવ્યો. પાણીની સમસ્યાના ઉકેલ માટે માંગણી કરતી જનતાને અનસુનિ કરવામાં આવતા હવે રહીશોએ લોકશાહીનું દબાણ વાપરવાનો નિર્ણય લીધો છે. ગોરવામાં કેટલીક જગ્યાએ ચૂંટણી બહિષ્કારના બેનરો લગાવવામાં આવ્યા છે. સ્થાનિકોના મતે, ચૂંટણી સમયે નેતાઓ વોટ માંગવા માટે દરવાજા ખખડાવે છે, પરંતુ જ્યારે લોકો મુશ્કેલીમાં હોય ત્યારે તેઓ આવતા નથી.
સ્થાનિકોનું કહેવું છે કે “વોટ લેવા માટે બધા નેતાઓ આવી જાય છે, પણ ચૂંટણી જીત્યા પછી કોઈ જોવા આવતું નથી.” વધુમાં સ્થાનિકો દ્વારા આક્ષેપ કરવામાં આવ્યો છે કે, ડ્રેનેજનું ગંદું પાણી પીવાના પાણીમાં મિક્સ થઈને લોકોના આરોગ્ય સાથે ચેડા કરી રહ્યું છે. આ સ્થિતિને લીધે અનેકવાર બિમારીઓ પણ ફેલાઈ રહી છે.
માત્ર ગોરવા જ નહીં, પણ શહેરના પૂર્વ વિસ્તારમાં પણ પાણીની સમસ્યા તીવ્ર બની છે. પાણીના પ્રશ્ને રહિશો વોર્ડ નં. 15 ની કચેરીએ એકઠા થયા અને તંત્ર સામે નારાબાજી કરી. ‘પાણી નહિ, તો વેરો નહિ’ જેવા નારા લગાવીને તેમણે તંત્રને ચેતવણી આપી કે, જો તાત્કાલિક ઉકેલ લાવવામાં નહીં આવે, તો તેઓ મ્યુનિસિપલ ટેક્સ ભરવાનું બંધ કરી દેશે. હાલ ઉનાળાની શરૂઆત જ થઈ છે અને પાણીની સ્થિતિ હાલાકીભરી બની ગઈ છે. જો સમયસર ઉકેલ લાવવામાં નહીં આવે, તો ભર ઉનાળાનામાં સમસ્યા વધુ ગંભીર બની શકે છે.
