( પ્રતિનિધિ )વડોદરા,તા.1
વડોદરામાં ગરમીના તાપમાનમાં વધારો જોવા મળ્યો છે. રવિવારે શહેરનું મહત્તમ તાપમાન 33.2 ડિગ્રી અને લઘુતમ તાપમાન 18.6 ડિગ્રી સાથે સવારે હવામાં ભેજનું પ્રમાણ 74 ટકા અને સાંજે 37 ટકા નોંધાયું હતું. માર્ચ મહિનાથી હવે ખરા ઉનાળાની શરૂઆત થઈ ગઈ છે. હવામાન વિભાગની આગાહી મુજબ માર્ચમાં જ તાપમાન 40 ડિગ્રી સુધી પહોંચી શકે છે. સામાન્ય રીતે એપ્રિલમાં જોવા મળતી ગરમીએ આ વર્ષે થોડી વહેલી જ દસ્તક આપી છે. રાજ્યમાં મહત્તમ તાપમાન 35 ડિગ્રીની આસપાસ નોંધાઈ શકે છે. આગામી પાંચ દિવસ સુધી ઉકળાટ ભર્યું વાતાવરણ રહેશે અને તાપમાનમાં પણ એક થી બે ડિગ્રીનો વધારો નોંધાઈ શકે છે. હાલમાં હીટવેવના દિવસોની સંખ્યા સામાન્ય કરતાં વધુ રહી શકે છે. માર્ચના પ્રથમ અઠવાડિયામાં જ ગરમીનો માહોલ ઘેરાતો હોવાથી બપોરના સમયે લોકો માટે બહાર નીકળવું મુશ્કેલ બની શકે છે. આગામી દિવસોમાં તાપમાનમાં વધુ વધારો થાય તો રાજ્યમાં હીટવેવ શરૂ થઈ શકે છે. લોકો માટે આ વર્ષે ગરમી વધુ કઠિન સાબિત થવાની શક્યતા છે. આ વર્ષે ગરમી રેકોર્ડ તોડે તેવી પણ શક્યતા વ્યક્ત કરવામાં આવી છે.
