વડોદરા :
વડોદરાના ન્યૂ વી.આઈ.પી. રોડ પર આવેલા ક્રિસ્ટલ પ્રમુખ કોમર્શિયલ હબના બિલ્ડર મનીષ પટેલ અને તેની પત્ની રૂપલ પટેલ વિરુદ્ધ વધુ બે ઠગાઈની ફરિયાદો નોંધાઈ છે. બે વેપારીઓએ કુલ પાંચ દુકાનો માટે રૂ.1.05 કરોડમાં બુકિંગ કરાવી તેમાંમાંથી રૂ.87.54 લાખ ચૂકવી દીધા હોવા છતાં બિલ્ડર દંપતીએ આજદિન સુધી ન તો દુકાનોનો કબજો આપ્યો છે કે ન તો વેચાણના દસ્તાવેજ કરી આપ્યા છે.
પ્રથમ બનાવમાં વડોદરા શહેરના વારસિયા વિસ્તારની નવયુગ સોસાયટીમાં રહેતા ધર્મેશ જેઠાનંદ લોહાણાએ ફરિયાદ નોંધાવી છે. તેમની ફરિયાદ મુજબ વર્ષ 2015માં કેયા બિલ્ટેક એલએલપીના ભાગીદાર બિલ્ડર મનીષ મહેન્દ્ર પટેલે ખોડીયારનગર ચાર રસ્તા પાસે, અર્થ આઈકોનની સામે ન્યૂ વી.આઈ.પી. રોડ પર ક્રિસ્ટલ પ્રમુખ કોમર્શિયલ હબ નામની દુકાનો તથા ઓફિસોની સ્કીમ લોન્ચ કરી હતી. આ સ્કીમમાં ધર્મેશભાઈ અને તેમના ભાઈ કમલેશભાઈએ ગ્રાઉન્ડ ફ્લોર ઉપર જી/એફ-87, 88, 89 અને 90 નંબરની કુલ ચાર દુકાનો રૂ.86 લાખમાં ખરીદવાનું નક્કી કર્યું હતું. બુકિંગ સહિત અલગ-અલગ તારીખે ચેક દ્વારા રૂ.70.53 લાખ ચૂકવ્યા હોવા છતાં બિલ્ડરે ન તો દુકાનોનું બાંધકામ પૂરું કર્યું છે કે ન તો કબજો તથા દસ્તાવેજ આપી રહ્યા છે. ચૂકવેલ રકમ પણ પરત આપવામાં આવી નથી.
આ મામલે મનીષ મહેન્દ્ર પટેલ અને તેની પત્ની રૂપલ પટેલ (રહે. સિલ્વર પાર્ક, કરોડીયા રોડ તથા સાયન પનાસા, નટુભાઈ સર્કલ, રસકોર્સ, વડોદરા) દ્વારા છેતરપિંડી કરવામાં આવી હોવાનો આક્ષેપ કરવામાં આવ્યો છે.
બીજા બનાવમાં વારસિયા ધોબી તળાવ પાસે આવેલી સિંધિ ગવર્મેન્ટ સોસાયટીમાં રહેતા વેપારી વિક્કી નારાયણદાસ મંગલાણી (ઉ.વ. 47)એ ફરિયાદ નોંધાવી છે. તેમણે પણ વર્ષ 2015માં ક્રિસ્ટલ પ્રમુખ કોમર્શિયલ હબની સ્કીમમાં ગ્રાઉન્ડ ફ્લોર ઉપર એફ-10 નંબરની દુકાન રૂ.29.14 લાખમાં બુક કરાવી હતી અને રૂ.17.01 લાખ ચૂકવી દીધા હતા. બિલ્ડરે બાંધકામ પૂરું થયા બાદ કબજો અને પાકો વેચાણ દસ્તાવેજ આપવાની ખાતરી આપી હતી, પરંતુ આજદિન સુધી ન તો દુકાનનો કબજો મળ્યો છે કે ન તો દસ્તાવેજ.
આ બંને ફરિયાદોના આધારે મહાઠગ બિલ્ડર મનીષ પટેલ અને તેની પત્ની રૂપલ પટેલ વિરુદ્ધ ઠગાઈનો ગુનો નોંધાઈ વધુ તપાસ હાથ ધરવામાં આવી છે.
