પોસ્ટ માસ્ટરે ‘સાવચેતીના ભાગરૂપે તપાસ’ હોવાનું જણાવી અફવાઓ પર વિરામ મૂક્યો
આણંદ:
સુરત સ્થિત મુખ્ય પોસ્ટ ઓફિસને ઈમેલ દ્વારા બોમ્બથી ઉડાવી દેવાની ધમકી મળતા સમગ્ર રાજ્યના પોસ્ટ વિભાગમાં સાવચેતીના પગલાં લેવામાં આવી રહ્યા છે. જેના ભાગરૂપે શુક્રવારે આણંદના જૂના બસ સ્ટેન્ડ પાસે આવેલી મુખ્ય પોસ્ટ ઓફિસમાં સ્થાનિક પોલીસ અને બોમ્બ ડિસ્પોઝલ ડોગ સ્કોડ દ્વારા ઝીણવટભરી તપાસ હાથ ધરવામાં આવી હતી.
આણંદ – નડિયાદની મુખ્ય પોસ્ટ ઓફિસમાં એકાએક પોલીસ અને ડોગ સ્કોડની હાજરી જોઈને ગ્રાહકો અને સ્થાનિક નગરજનોમાં ચિંતા પ્રસરી ગઈ હતી. પોસ્ટ ઓફિસને પણ ધમકી મળી હોવાની અફવાઓએ જોર પકડ્યું હતું, પરંતુ તપાસ બાદ સ્થિતિ સામાન્ય જણાઈ હતી.
આણંદના પોસ્ટ માસ્ટર સમીરકુમારે જણાવ્યું હતું કે, આણંદ પોસ્ટ ઓફિસને કોઈ પણ પ્રકારની ધમકી મળી નથી. સુરતની હેડ પોસ્ટ ઓફિસને મળેલી ધમકીના સંદર્ભમાં વિભાગની સૂચના મુજબ સાવચેતી અને સુરક્ષાના ભાગરૂપે જ આ સર્ચ ઓપરેશન કરવામાં આવ્યું હતું. પોલીસ દ્વારા સમગ્ર પરિસરમાં ખૂણે ખૂણે તપાસ કરી કોઈ પણ શંકાસ્પદ વસ્તુ ન હોવાની ખાતરી કરવામાં આવી હતી, જેનાથી લોકોએ રાહતનો શ્વાસ લીધો હતો.
