93.302 કિમી લાંબા સમગ્ર રૂટ માટે DPR તૈયાર કરવા NHAI દ્વારા ટેન્ડર મંગાવાયા
વડોદરા:
અમદાવાદ–વડોદરા એક્સપ્રેસ હાઇવેને 6 લેન રોડમાં રૂપાંતરિત કરવાની દિશામાં મહત્વપૂર્ણ પગલું ભરાયું છે. નેશનલ હાઇવે ઓથોરિટી ઓફ ઇન્ડિયા (NHAI)ના નવી દિલ્હીસ્થિત મુખ્ય મથક દ્વારા 12 ફેબ્રુઆરી, 2026ના રોજ Notice Inviting Tender (NIT) જાહેર કરવામાં આવી છે, જેમાં સમગ્ર 93.302 કિમી લાંબા એક્સપ્રેસ હાઇવે માટે Detailed Project Report (DPR) તૈયાર કરવાની પ્રક્રિયા શરૂ કરવામાં આવી છે.
NIT મુજબ, DPRમાં કિલોમીટર 0.000 થી કિલોમીટર 93.302 સુધીનો સંપૂર્ણ એક્સપ્રેસ હાઇવે આવરી લેવામાં આવશે. હાલ ચાર લેન તરીકે કાર્યરત અમદાવાદ–વડોદરા એક્સપ્રેસ હાઇવે પર વધતા વાહન વ્યવહાર અને ટ્રાફિક દબાણને ધ્યાનમાં રાખીને તેને 6 લેન બનાવવા માટેની યોજના તૈયાર કરવામાં આવી રહી છે.
NHAI દ્વારા જાહેર કરાયેલા શેડ્યૂલ અનુસાર, ટેન્ડર સંબંધિત પ્રશ્નો (Queries) રજૂ કરવાની છેલ્લી તારીખ 3 માર્ચ, 2026 રાખવામાં આવી છે. ત્યારબાદ પ્રી-બિડ મીટિંગ યોજાશે, જેમાં ટેન્ડર પ્રક્રિયા, ટેકનિકલ વિગતો અને પ્રોજેક્ટના વ્યાપ અંગે સ્પષ્ટતા કરવામાં આવશે.
આ પ્રોજેક્ટ પૂર્ણ થયા બાદ અમદાવાદ અને વડોદરા વચ્ચેની મુસાફરી વધુ સુરક્ષિત, ઝડપી અને સુગમ બનશે. સાથે જ, ઔદ્યોગિક, વ્યાપારી અને લોજિસ્ટિક પ્રવૃત્તિઓને પણ વેગ મળશે. NHAIના આ પગલાંને ગુજરાતના ઇન્ફ્રાસ્ટ્રક્ચર વિકાસ માટે મહત્વપૂર્ણ માનવામાં આવી રહ્યું છે.
