ભારતીય જનતા પાર્ટીના પૂર્વ નેતા અને વાજપેયી સરકારમાં કેન્દ્રીય પ્રધાન રહી ચૂકેલા યશવંત સિંહા પશ્ચિમ બંગાળની ચૂંટણી પૂર્વે ટીએમસીમાં જોડાયા છે. યશવંત સિંહા પાર્ટી ઓફિસમાં ગયા હતા અને સભ્યપદ લીધું હતું અને પાર્ટીનો ધ્વજ લહેરાવ્યો હતો. યશવંત સિંહા વાજપેયી સરકારમાં નાણાં પ્રધાન અને વિદેશ પ્રધાન રહી ચૂક્યા છે.
ટીએમસીમાં સામેલ થયા પછી, યશવંત સિંહાએ ભાજપ પર પ્રહાર કરતાં કહ્યું કે, અટલ બિહારી વાજપેયીના સમયમાં, ભાજપ સંમતિમાં વિશ્વાસ કરતો હતો પરંતુ આજની ભાજપ કચડી નાખવામાં અને જીતવામાં વિશ્વાસ રાખે છે. તેમણે કહ્યું કે આજે અકાલી દળ અને બીજેડીએ ભારતીય જનતા પાર્ટી છોડી દીધી છે. યશવંત સિંહાએ પીએમ મોદી અને અમિત શાહ પર આરોપ લગાવ્યો કે તેઓ ચૂંટણી જીતવા કોઈપણ હદ સુધી જઈ શકે છે.
તેમણે કહ્યું કે શિવસેનાએ ભાજપ છોડી દીધો છે. તમે મને કહો કે આજે ભાજપ સાથે કોણ ઉભું છે? ટીએમસીમાં જોડાયા પછી, યશવંત સિંહાએ કહ્યું કે આજે દેશ અભૂતપૂર્વ પરિસ્થિતિનો સામનો કરી રહ્યો છે. તેમણે વધુમાં કહ્યું કે લોકશાહીની તાકાત લોકશાહીની સંસ્થાઓની તાકાતમાં રહેલી છે. યશવંત સિંહાએ વધુમાં કહ્યું કે ન્યાયતંત્ર સહિત આ સંસ્થાઓ નબળી પડી છે.
ઉલ્લેખનીય છે કે મોદી વડાપ્રધાન બન્યા ત્યારથી યશવંત સિન્હાને સરકાર કે સંગઠનમાં કોઇ સ્થાન આપવામાં આવ્યું ન હતું અને તેઓ સતત મોદી સરકારની ટીકા કરતાં રહ્યા છે. ઘણાં મુદ્દાઓ પર તેમણે સરકાર વિરૂદ્ધ અદાલતનો દરવાજો પણ ઠોક્યો હતો. તેમના પુત્ર જયંત સિન્હા ભાજપની ટિકિટ પર હજારીબાગથી લડીને 2014માં સાંસદ બન્યા હતા અને સરકારમાં પણ તેમને વિશેષ દરજ્જો પ્રાપ્ત હતો. 2019માં પણ જયંંત સિન્હા તેમના પિતા યશવંત સિન્હાની પરંપરાગત બેઠક પરથી ચૂંટાયા હતા.
