બોલીવુડના સુપરસ્ટાર Akshay Kumarએ પોતાની આવનારી ફિલ્મ Bhoot Banglaના પ્રમોશન દરમિયાન એક એવો ચોંકાવનારો અનુભવ શેર કર્યો કે જે સાંભળીને દરેકના રુંવાટા ઉભા થઈ જાય. અક્ષયે પોતાના જૂના ઘરમાં બનેલી એક રહસ્યમય ઘટના વિશે વાત કરતાં કહ્યું કે તે સમયે તેમને ખરેખર લાગ્યું કે “ઘરમાં કંઈક ગડબડ છે.”
અક્ષયે જણાવ્યું કે તેઓ પોતાની પત્ની Twinkle Khanna અને દીકરા Aarav Kumar સાથે મુંબઈના Juhu વિસ્તારમાં રહેતા હતા. આ ઘરમાં ઘણી વખત અજીબ ઘટનાઓ બનતી હતી. ટ્વિંકલને વારંવાર એવું લાગતું કે ઘરમાં કોઈ અજાણી હાજરી છે. તેમને ઘણી વખત કોઈ મહિલાના ચાલવાના અવાજો સંભળાતા હતા. જોકે અક્ષય શરૂઆતમાં આ વાતોને હળવાશથી લઈને અવગણતા હતા.
પરંતુ એક દિવસ એવી ઘટના બની કે અક્ષય પણ ચોંકી ગયા. તેમણે કહ્યું કે તે સમયે આરવ માત્ર 4-5 વર્ષનો હતો. એક દિવસ તે બેડ પર સુતો હતો અને અચાનક કોઈ અદૃશ્ય દિશામાં જોઈને બોલવા લાગ્યો, અહીંથી જાઓ… અહીં ન રહો.” આ જોઈને અક્ષય અને ટ્વિંકલ બંને આશ્ચર્યચકિત થઈ ગયા, અક્ષયે તરત જ આરવને પૂછ્યું કે તે કોના સાથે વાત કરી રહ્યો છે, પરંતુ તેનો જવાબ તેમને વધુ હચમચાવી ગયો.
ટ્વિંકલે તરત જ કહ્યું, “હું તો પહેલા થી જ કહેતી હતી કે ઘરમાં કંઈક તો છે, હવે જુઓ, તમારો દીકરો પણ કોઈ સાથે વાત કરી રહ્યો છે.” આ ઘટના બાદ અક્ષયના મન પર ઊંડી અસર પડી અને તેમણે સ્વીકાર્યું કે કદાચ ઘરમાં કોઈ નેગેટિવ એનર્જી હોઈ શકે.
અક્ષય કહે છે કે તેઓ આજે પણ વિજ્ઞાન અને તર્કમાં વિશ્વાસ રાખે છે, પરંતુ આ અનુભવ પછી તેઓ માને છે કે દુનિયામાં કેટલીક એવી શક્તિઓ હોય છે જેને સંપૂર્ણ રીતે સમજવી સરળ નથી.
ઉલ્લેખનીય છે કે Bhoot Bangla 10 એપ્રિલે રિલીઝ થવાની છે. આ ફિલ્મમાં Paresh Rawal, Rajpal Yadav, Asrani અને Wamiqa Gabbi જેવા કલાકારો નજરે પડશે. ખાસ વાત એ છે કે આ ફિલ્મ દ્વારા અક્ષયની Priyadarshan સાથે 16 વર્ષ બાદ ફરી જોડી થઈ રહી છે.
