ઈરાન અને અમેરિકા વચ્ચે ચાલી રહેલા તણાવ હવે માત્ર શસ્ત્રોની લડાઈ પૂરતો સીમિત રહ્યો નથી. હવે આ સંઘર્ષ સાયબર જગતમાં પણ પહોંચી ગયો છે. ઈરાન સાથે સંકળાયેલા એક હેકર ગ્રૂપે અમેરિકાની મેડિકલ ટેક્નોલોજી કંપની પર મોટો સાયબર હુમલો કર્યો હોવાનું સામે આવ્યું છે. રિપોર્ટ્સ મુજબ 11 માર્ચે અમેરિકાની ‘Stryker’ કંપનીના સર્વર અને આઈટી સિસ્ટમને નિશાન બનાવવામાં આવ્યા હતા. આ હુમલાના કારણે 2 લાખથી વધુ કમ્પ્યુટર સિસ્ટમ, સર્વર અને મોબાઈલ ડિવાઈસ પર અસર પડી છે, જેના કારણે કંપનીના કેટલાક વૈશ્વિક આઈટી ઓપરેશન્સ પણ થોડા સમય માટે ઠપ્પ થઈ ગયા હતા. હેકર ગ્રૂપે દાવો કર્યો છે કે આ હુમલો અમેરિકાની મિસાઈલ હુમલાની કાર્યવાહીનો “બદલો” છે. તેમના કહેવા મુજબ, ફેબ્રુઆરીમાં મિનાબ વિસ્તારમાં થયેલા અમેરિકી હુમલા પછી આ સાયબર હુમલો કરવામાં આવ્યો હતો. હેકર્સે દાવો કર્યો છે કે હુમલા દરમિયાન કંપનીનો લગભગ 51 ટેરાબાઇટ જેટલો ડેટા ચોરી લેવામાં આવ્યો છે અને ઘણી સિસ્ટમને નુકસાન પહોંચાડવામાં આવ્યું છે. આ હુમલામાં એક પેમેન્ટ એપ્લિકેશન ‘Verifone’ પણ અસરગ્રસ્ત થઈ હોવાનું જણાવાયું છે.
સાયબર સુરક્ષા કંપનીઓ અનુસાર આ હેકર ગ્રૂપને “Handala” અથવા “Void Manticore” નામથી ઓળખવામાં આવે છે. આ જૂથને Red Sandstorm, Banished Kitten, Karma અને Homeland Justice જેવા અન્ય નામોથી પણ ઓળખવામાં આવે છે. નિષ્ણાતોના મતે આ ગ્રૂપ ઈરાનની જાસૂસી સંસ્થાઓ સાથે સંકળાયેલું હોઈ શકે છે. આ હેકર્સ સામાન્ય રીતે ‘Viper Attack’ ટેકનિકનો ઉપયોગ કરે છે, જેમાં કમ્પ્યુટર અને સર્વરમાં રહેલો ડેટા નષ્ટ કરી દેવામાં આવે છે. ઘણી વખત તેઓ નકલી ઈમેલ અથવા સોફ્ટવેર અપડેટ મોકલીને કંપનીના કર્મચારીઓને ભ્રમિત કરે છે અને પછી સિસ્ટમમાં પ્રવેશ મેળવી લે છે. ‘Handala’ નામ ફલિસ્તીની એક કાર્ટૂન પાત્ર પરથી લેવામાં આવ્યું છે, જેને પ્રતિકારનું પ્રતીક માનવામાં આવે છે. વર્ષ 2023ના અંતમાં પ્રથમ વખત આ ગ્રૂપ સામે આવ્યું હતું. શરૂઆતમાં તેને પેલેસ્ટાઈન સમર્થક હેક્ટિવિસ્ટ જૂથ માનવામાં આવતું હતું, પરંતુ હવે સાયબર નિષ્ણાતો તેને ઈરાન સાથે જોડાયેલા મહત્વપૂર્ણ સાયબર નેટવર્ક તરીકે જોતા થયા છે.
