ભારતીય ક્રિકેટના બે દિગ્ગજ બેટ્સમેન વિરાટ કોહલી અને રોહિત શર્મા વનડે ક્રિકેટમાંથી નિવૃત્તિ લઈ રહ્યા છે એવા અહેવાલો પર અંત આવ્યો છે. બીસીસીઆઈના ઉપાધ્યક્ષ રાજીવ શુક્લાએ સ્પષ્ટતા કરી છે કે બંને હજુ વનડે રમવાનું ચાલુ રાખશે અને નિવૃત્તિની કોઈ યોજના નથી.
છેલ્લાં કેટલાક દિવસોથી મીડિયા અને ક્રિકેટ જગતમાં ચર્ચા ચાલી રહી હતી કે વિરાટ અને રોહિત ટૂંક સમયમાં વનડેમાંથી નિવૃત્તિ જાહેર કરી શકે છે. બંનેએ ગયા વર્ષે ટી20 અને આ વર્ષે મે મહિનામાં ટેસ્ટ ક્રિકેટમાંથી વિદાય લીધી હતી. હાલમાં તેઓ ફક્ત વનડે ફોર્મેટમાં જ ટીમ માટે રમી રહ્યા છે. આવી સ્થિતિમાં નિવૃત્તિની અફવાઓએ ચાહકોમાં ચિંતા ઊભી કરી હતી.
પરંતુ હવે રાજીવ શુક્લાએ સ્પષ્ટ કર્યું છે કે આ અહેવાલોમાં કોઈ સત્ય નથી. તેમણે જણાવ્યું કે વિરાટ કોહલી અને રોહિત શર્મા બંનેએ તાજેતરમાં પ્રેક્ટિસ શરૂ કરી છે. આનાથી સાબિત થાય છે કે તેઓ ટીમ ઈન્ડિયા માટે વનડેમાં રમવાનું ચાલુ રાખશે.
શુક્લાએ એક ટોક શોમાં સ્પષ્ટ કર્યું છે કે “લોકો આ બંને વિશે આટલા ચિંતિત કેમ છે? તેમણે ક્યારે નિવૃત્તિ જાહેર કરી? રોહિત અને વિરાટ બંને હજુ વનડે રમશે. જો તેઓ રમી રહ્યા છે તો વિદાયની વાત કરવી જરૂરી નથી.”
શુક્લાએ વધુમાં જણાવ્યું કે નિવૃત્તિ લેવાનો નિર્ણય ખેલાડીનો વ્યક્તિગત હોય છે. BCCI ક્યારેય કોઈ ખેલાડીને નિવૃત્તિ લેવાનું કહેતી નથી. “અમારી નીતિ સ્પષ્ટ છે. કોઈ ખેલાડીએ નિવૃત્તિ લેવી કે નહીં તે તેનો પોતાનો નિર્ણય છે. બોર્ડ તરફથી આવું દબાણ નથી.”
આ નિવેદનથી કોહલી અને રોહિતના ચાહકોમાં ખુશી છવાઈ ગઈ છે. હવે સ્પષ્ટ થઈ ગયું છે કે બંને હજુ કેટલાક સમય સુધી વનડે ક્રિકેટમાં ભારતીય ટીમનું પ્રતિનિધિત્વ કરતા રહેશે. ભારત માટે આવનારા મોટા ટુર્નામેન્ટ્સમાં તેમનો અનુભવ અને કુશળતા ટીમ માટે મહત્વપૂર્ણ સાબિત થશે.
