ઉત્તરાખંડના નૈનીતાલ જિલ્લામાં ગત રોજ તા. 1 નવેમ્બર શનિવારે મોડી રાત્રે એક ગંભીર માર્ગ અકસ્માત બન્યો હતો. કૈંચી ધામથી પરત ફરી રહેલા પ્રવાસીઓથી ભરેલો ટેમ્પો ટ્રાવેલર 60 ફૂટ ઊંડી ખીણમાં પડી ગયો. આ અકસ્માતમાં બે લોકોના મોત થયા છે જ્યારે 15 પ્રવાસીઓ ગંભીર રીતે ઘાયલ થયા છે. બધા લોકો દિલ્હીના બદરપુર વિસ્તારના રહેવાસી હોવાનું જાણવા મળ્યું છે.
જ્યોલિકોટ નજીક થયો અકસ્માત
માહિતી મુજબ રાત્રે લગભગ 10:47 વાગ્યે ટેમ્પો ટ્રાવેલર જ્યોલિકોટના મટિયાલી બંધ પાસે પહોંચ્યો ત્યારે ડ્રાઇવરે અચાનક વાહન પરથી કાબુ ગુમાવ્યો. વાહન રસ્તાથી ખસી જઈને લગભગ 60 ફૂટ ઊંડી ખીણમાં પડી ગયું. અકસ્માત એટલો ભયાનક હતો કે વાહનના ટુકડા થઈ ગયા અને મુસાફરોને ગંભીર ઈજાઓ પહોંચી.
પોલીસ અને SDRFની તરત કાર્યવાહી
અકસ્માતની જાણ થતાં જ જ્યોલિકોટ ચોકીના ઇન્ચાર્જ સબ-ઇન્સ્પેક્ટર શ્યામસિંહ બોરા પોલીસ ટીમ સાથે સ્થળ પર પહોંચ્યા હતા. થોડીવારમાં SDRF ટીમ, સર્કલ ઓફિસર અમિત કુમાર અને તલ્લીતાલ SHO મનોજ નાયલ પણ સ્થળે આવી પહોંચ્યા. રાત્રિના અંધકાર વચ્ચે અને ખીણની મુશ્કેલ સ્થિતિ હોવા છતાં સ્થાનિક ગ્રામજનોની મદદથી બચાવ કામગીરી બે કલાક સુધી ચાલી.
બધા ઘાયલોને ખીણમાંથી બહાર કાઢી 108 એમ્બ્યુલન્સ દ્વારા હલ્દવાનીની સુશીલા તિવારી હોસ્પિટલ, ચંદન હોસ્પિટલ અને સેન્ટ્રલ હોસ્પિટલમાં ખસેડવામાં આવ્યા.
મૃતકો અને ઘાયલોની ઓળખ થઈ ગઈ છે
મૃતકોમાં ગૌરવ બંસલ (26) અને સોનુ કુમાર (32) સામેલ છે. બાકીના 15 ઘાયલોમાં મહિલાઓ, બાળકો અને પુરુષોનો સમાવેશ થાય છે. ઇજાગ્રસ્તોમાં અંશિકા (21), સોનિયા (32), સુશાંત (8), દિશા (5), નિકિતા (20), શ્વેતા (25), પૂર્વા (8 મહિના), યશી (2), અજય (34), શિલ્પી (28), શ્રુતિ (28), વિજય (30) સહિત અન્ય લોકો સામેલ છે.
ઘણાની હાલત ગંભીર-તપાસ ચાલુ
હોસ્પિટલ પહોંચ્યા બાદ ડોક્ટરોએ ડ્રાઇવર સોનુ સિંહ (રોહતક, હરિયાણા) અને પ્રવાસી ગૌરવ બંસલને મૃત જાહેર કર્યા. બાકીના ઘાયલોની હાલત ગંભીર છે. નૈનીતાલના SSP ડૉ. મંજુનાથ ટી.સી. રાત્રે હોસ્પિટલ પહોંચી ઘાયલોની મુલાકાત લીધી અને જરૂરી સારવારની વ્યવસ્થા અંગે ડોકટરો સાથે ચર્ચા કરી.
પોલીસે પ્રાથમિક તપાસમાં જણાવ્યું કે રસ્તાનો ઢાળ અને ડ્રાઇવરની કાબુ ગુમાવવાની ભૂલ આ અકસ્માતનું મુખ્ય કારણ હોઈ શકે છે.
