વંદે ભારત એક્સપ્રેસમાં પીરસાતા ખોરાકની ગુણવત્તા અંગે ઉઠેલી ફરિયાદ બાદ રેલવે તંત્રે કડક પગલાં લીધા છે. પટના-ટાટાનગર રૂટ પર ચાલતી ટ્રેનમાં એક મુસાફરે દહીંની ગુણવત્તા અંગે ફરિયાદ નોંધાવી હતી, જેના કારણે સમગ્ર મામલો ચર્ચામાં આવ્યો હતો. આ ફરિયાદને ગંભીરતાથી લેતા Indian Railwaysએ તાત્કાલિક તપાસ શરૂ કરી હતી. તપાસ દરમિયાન ખોરાકની ગુણવત્તામાં ખામી જણાતા IRCTC પર 10 લાખ રૂપિયાનો દંડ ફટકારવામાં આવ્યો છે. સાથે જ, ટ્રેનમાં ભોજન પૂરો પાડતી કેટરિંગ કંપની પર 50 લાખ રૂપિયાનો ભારે દંડ લગાવવામાં આવ્યો છે. આ ઉપરાંત, કોન્ટ્રાક્ટરનું લાઇસન્સ રદ કરવાની પ્રક્રિયા શરૂ કરવામાં આવી છે અને તેને બ્લેકલિસ્ટ કરવાની કાર્યવાહી પણ હાથ ધરવામાં આવી રહી છે. આ ઘટનામાં દેશની જાણીતી ડેરી કંપની Amulનું નામ પણ સામે આવ્યું છે. મુસાફરે ખાસ કરીને અમુલના દહીંની ગુણવત્તા અંગે ફરિયાદ કરી હતી. આને પગલે IRCTCએ અમુલને નોટિસ મોકલીને આ મામલે સ્પષ્ટતા માંગેલી છે.
રેલવે દ્વારા જણાવાયું છે કે મુસાફરોને ગુણવત્તાયુક્ત ખોરાક આપવો એ તેમની પ્રથમ પ્રાથમિકતા છે અને તેમાં કોઈ પણ પ્રકારની બેદરકારી સહન કરવામાં આવશે નહીં. રેલવે તંત્રે આ ઘટનાને ધ્યાનમાં રાખીને ફૂડ સેફ્ટી અને ક્વોલિટી ચેકને વધુ કડક બનાવવાનો નિર્ણય લીધો છે. આવનારા સમયમાં આવી ઘટનાઓ ન બને તે માટે નિયમોમાં વધુ સખતાઈ લાવવામાં આવી રહી છે. મુસાફરોને સલામત અને સારો ખોરાક મળે તે માટે સતત મોનિટરિંગ પણ વધારવામાં આવશે. આ ઘટના એ પણ દર્શાવે છે કે મુસાફરો હવે પોતાની ફરિયાદો અંગે વધુ જાગૃત બન્યા છે અને સોશિયલ મીડિયા તથા સત્તાવાર માધ્યમો દ્વારા અવાજ ઉઠાવી રહ્યા છે. રેલવે દ્વારા લેવામાં આવેલી આ કાર્યવાહીથી એક સ્પષ્ટ સંદેશ જાય છે કે મુસાફરોની સુરક્ષા અને સંતોષ સાથે કોઈ સમજૂતી નહીં કરવામાં આવે.
