દુબઈ સ્થિત વિશ્વની સૌથી ઊંચી ઇમારત Burj Khalifa પર ભારતના તિરંગા રંગોની રોશની કરવામાં આવી હતી, જે India AI Impact Summit 2026 ની સફળતાની ઉજવણી તરીકે જોવામાં આવી રહી છે. આ અનોખી લાઇટ શો ભારત અને યુએઈ વચ્ચે વધતા ટેકનોલોજી, નવીનતા અને આર્ટિફિશિયલ ઇન્ટેલિજન્સ ક્ષેત્રના સહકારનું શક્તિશાળી પ્રતિક માનવામાં આવે છે.
યુએઈમાં સ્થિત ભારતીય દૂતાવાસે સોશિયલ મીડિયા પ્લેટફોર્મ X પર આ દ્રશ્યનો વીડિયો શેર કર્યો હતો. આ લાઇટ શોમાં Burj Khalifa પર “The Future of AI” અને “Led by India” જેવા સંદેશો પ્રોજેક્ટ થયા હતા. દૂતાવાસે લખ્યું હતું કે, “વિશ્વની સૌથી ઊંચી ઇમારત India AI Impact Summit 2026 ની ઉજવણી કરી રહી છે. આ ભારત-યુએઈ ભાગીદારીને વધુ મજબૂત બનાવવાનો પ્રતિક છે.”
આ પગલું બંને દેશો વચ્ચે મજબૂત બની રહેલા આર્થિક અને ટેકનોલોજીકલ સંબંધોને પણ દર્શાવે છે. ખાસ કરીને 2022માં થયેલ વ્યાપક આર્થિક ભાગીદારી કરાર (CEPA) હેઠળ બંને દેશો 2030 સુધીમાં દર વર્ષે 100 અબજ ડોલરના વેપારનો લક્ષ્યાંક હાંસલ કરવા તરફ આગળ વધી રહ્યા છે. ઉપરાંત યુએઈ દ્વારા ભારતીય AI સ્ટાર્ટઅપ્સમાં રોકાણ અને સંયુક્ત પહેલો પણ ઝડપથી વધતી જોવા મળી રહી છે.
સોશિયલ મીડિયામાં આ ઘટનાને લઇને ભારતીયો તરફથી ગર્વ અને ખુશીની લાગણી વ્યક્ત કરવામાં આવી હતી. કેટલાક યુઝર્સે તેને “ભારત માટે વૈશ્વિક મંચ પર ગર્વનો ક્ષણ” ગણાવ્યો, જ્યારે અન્યોએ ભારતની AI ક્ષમતાઓને વિશ્વને માર્ગદર્શન આપનારી ગણાવી.નવી દિલ્હીના Bharat Mandapam ખાતે 16 થી 21 ફેબ્રુઆરી દરમિયાન યોજાયેલ India AI Impact Summit 2026 ગ્લોબલ સાઉથમાં યોજાયેલો પ્રથમ વૈશ્વિક AI સમિટ. અગાઉ આવા સમિટ યુકે (2023), દક્ષિણ કોરિયા (2024) અને ફ્રાંસ (2025)માં યોજાયા હતા. આ સમિટમાં 110થી વધુ દેશો, 30 આંતરરાષ્ટ્રીય સંસ્થાઓ અને અનેક મંત્રીઓ તથા વૈશ્વિક નેતાઓએ ભાગ લીધો હતો.
સમિટ દરમિયાન ભારતના વડાપ્રધાન Narendra Modi એ “MANAV Vision” રજૂ કરી હતી, જે AIના નૈતિક, જવાબદાર અને સર્વસમાવેશક ઉપયોગને પ્રોત્સાહિત કરે છે. સાથે જ અનેક મોટી કંપનીઓએ ભારતના AI ક્ષેત્રમાં વિશાળ રોકાણની જાહેરાત કરી હતી, જેના કારણે ભારત વૈશ્વિક AI કેન્દ્ર તરીકે આગળ વધી રહ્યું હોવાનું માનવામાં આવી રહ્યું છે.આ સમગ્ર ઘટનાએ ભારત-યુએઈ વચ્ચેની મિત્રતા અને ટેકનોલોજી ક્ષેત્રમાં વધતા સહકારને નવી દિશા આપી છે.
