Suratના ઉધના વિસ્તારમાં બનેલી ચોરીની ઘટનાનો પોલીસએ ચોંકાવનારો અને ઝડપી ઉકેલ લાવી દીધો છે. એક વકીલની ઓફિસમાં થયેલી ચોરીનો ભેદ CCTV ફૂટેજના આધારે ઉકેલીને ઉધના પોલીસ સ્ટેશનની સર્વેલન્સ ટીમે આરોપીને ઝડપી લીધો છે. પોલીસે આરોપી પાસેથી ચોરી કરાયેલ સી.પી.યુ. અને કી-બોર્ડ સહિત અંદાજે ₹30 હજારનો મુદ્દામાલ પણ કબજે કર્યો છે.
પોલીસ પાસેથી મળતી માહિતી મુજબ, 23 ફેબ્રુઆરી 2025ની મોડી રાત્રે ઉધના રોડ નંબર-3 વિસ્તારમાં આવેલી વકીલ એસોસિયેટની ઓફિસને નિશાન બનાવવામાં આવી હતી. અજાણ્યા શખ્સે ઓફિસનું શટર ઊંચું કરી અંદર પ્રવેશ કર્યો અને કેબિનમાંથી કમ્પ્યુટર સાધનો ચોરી કરી ફરાર થઈ ગયો. સવારે ઘટના સામે આવતાં જ ફરિયાદી દ્વારા તરત પોલીસનો સંપર્ક કરવામાં આવ્યો હતો.
ફરિયાદ મળતાં જ પોલીસ હરકતમાં આવી ગઈ. ઉચ્ચ અધિકારીઓના માર્ગદર્શન હેઠળ સર્વેલન્સ ટીમે આસપાસના વિસ્તારોના CCTV કેમેરાની ચકાસણી શરૂ કરી. કલાકોની મહેનત બાદ એક શંકાસ્પદ વ્યક્તિની ઓળખ કરવામાં સફળતા મળી. તપાસ આગળ વધતા રીઝવાન ઉમર મોહમ્મદ શેખ નામના આરોપીને ઝડપી લેવામાં આવ્યો.આરોપી મજૂરી કામ કરે છે અને ઉધના વિસ્તારમાં સંજયનગર જુપડપટ્ટી રોડ પાસે રહે છે. પોલીસ પૂછપરછ દરમિયાન તેની પાસેથી ચોરી કરાયેલ સી.પી.યુ. અને કી-બોર્ડ સહિતનો મુદ્દામાલ રિકવર કરવામાં આવ્યો. સમગ્ર મામલે ભારતીય ન્યાય સંહિતા, 2023ની સંબંધિત કલમો હેઠળ ગુનો દાખલ કરી વધુ તપાસ હાથ ધરાઈ છે.
પોલીસની ઝડપી અને ટેકનિકલ આધારે કરાયેલ કાર્યવાહી શહેરમાં ચર્ચાનો વિષય બની છે. CCTV ટેક્નોલોજી ફરી એકવાર ગુનેગારો માટે પડકારરૂપ સાબિત થઈ છે.
