વિધાનસભા ચૂંટણી પૂર્વે પશ્ચિમ બંગાળમાં મતદાર યાદી અંગે મહત્વપૂર્ણ અપડેટ સામે આવ્યું છે. ચૂંટણી પંચે શુક્રવારે મોડી રાત્રે મતદાર યાદીની બીજી પૂરક યાદી જાહેર કરી છે. રાજ્યમાં ચાલી રહેલી સ્પેશિયલ ઇન્ટેન્સિવ રિવિઝન (SIR) પ્રક્રિયા અંતર્ગત આ યાદી બહાર પાડવામાં આવી છે. જોકે, ચૂંટણી પંચે આ યાદીમાં કેટલા નવા નામ ઉમેરાયા અને કેટલા નામ કાઢી નાખવામાં આવ્યા તે અંગે કોઈ સત્તાવાર આંકડા જાહેર કર્યા નથી.
ચૂંટણી પંચના એક અધિકારીએ જણાવ્યું કે બીજી યાદી વેબસાઇટ પર બૂથવાર ઉપલબ્ધ કરાવવામાં આવી છે, પરંતુ ઉમેરા અને કાપછાંટ સંબંધિત વિગતવાર ડેટા પેજમાં ટેકનિકલ ખામીઓ સર્જાતા તે માહિતી લોકો માટે ઉપલબ્ધ થઈ શકી નથી. જેના કારણે મતદારો અને રાજકીય પક્ષોમાં ગૂંચવણનું વાતાવરણ સર્જાયું છે.
આ પહેલા પણ પ્રથમ પૂરક યાદી જાહેર કરવામાં આવી હતી, જેમાં ‘અન્ડર એડજ્યુડિકેશન’ મતદારોના નામો સામેલ હતા. ત્યારે પણ કેટલા કેસોનું નિરાકરણ આવ્યું અને કેટલા નામો કાઢવામાં આવ્યા તેની સ્પષ્ટ માહિતી આપવામાં આવી નહોતી, જેના કારણે ચૂંટણી પંચની પારદર્શિતાને લઈને પ્રશ્નો ઊભા થયા હતા.
SIR પ્રક્રિયા દરમિયાન રાજ્યમાંથી અંદાજે 58 લાખ મતદારોના નામ કાઢી નાખવામાં આવ્યા હતા. તેમાં મૃત્યુ, સ્થળાંતર, ડુપ્લિકેશન અને સરનામું ન મળવા જેવા કારણો દર્શાવવામાં આવ્યા હતા. જેના પરિણામે રાજ્યના કુલ મતદારોની સંખ્યા 7.66 કરોડથી ઘટીને 7.08 કરોડ થઈ ગઈ હતી.
ત્યારબાદ 28 ફેબ્રુઆરીએ જાહેર થયેલી સુધારેલી યાદી મુજબ માન્ય મતદારોની સંખ્યા વધુ ઘટીને 7.04 કરોડથી થોડું વધુ રહી હતી, જેમાંથી 60 લાખથી વધુ નામો હજી ન્યાયિક તપાસ હેઠળ હોવાનું જણાવાયું હતું. પશ્ચિમ બંગાળની 294 બેઠકો માટેની વિધાનસભા ચૂંટણી 23 અને 29 એપ્રિલે યોજાશે, જ્યારે મતગણતરી 4 મેના રોજ હાથ ધરાશે. આવી સ્થિતિમાં મતદાર યાદી અંગેની અનિશ્ચિતતા ચૂંટણીના માહોલને વધુ ગરમાવી રહી છે.
