જમ્મુ-કાશ્મીર પોલીસને એક મોટી સફળતા મળી છે. પોલીસે હરિયાણાના ફરીદાબાદ વિસ્તારમાંથી ૩૦૦ કિલો RDX, એક AK-47 રાઇફલ અને મોટી માત્રામાં દારૂગોળો જપ્ત કરીને સંભવિત આતંકી હુમલાનું કાવતરું નિષ્ફળ બનાવ્યું છે. આ કાર્યવાહી કાશ્મીરમાં ધરપકડ કરાયેલા આતંકી ડૉક્ટર આદિલ અહેમદ રાથરની માહિતીના આધારે કરવામાં આવી હતી.
પોલીસ સૂત્રો અનુસાર ડૉ. આદિલ રાથર હાલ જમ્મુ-કાશ્મીર પોલીસની કસ્ટડીમાં છે અને તેની પૂછપરછ દરમિયાન અનેક ચોંકાવનારા ખુલાસા થયા છે. પૂછપરછમાં જાણવા મળ્યું કે ફરીદાબાદમાં છુપાવવામાં આવેલો વિસ્ફોટકોનો જથ્થો એક મોટો આતંકી હુમલો કરવા માટે તૈયાર કરવામાં આવ્યો હતો.
જમ્મુ-કાશ્મીર પોલીસે આ માહિતીના આધારે તાત્કાલિક ટીમ બનાવી અને ફરીદાબાદમાં દરોડા પાડ્યા. તપાસ દરમિયાન એક ફાર્મહાઉસ જેવી જગ્યાએથી ૩૦૦ કિલો RDX, એક AK-47 રાઇફલ તથા મોટી માત્રામાં દારૂગોળો મળી આવ્યા હતા.
વધુ તપાસ કરતાં ખુલ્યું કે કાશ્મીરનો બીજો ડૉક્ટર મુઝામિલ પણ આ ગઠબંધનમાં સામેલ હતો. મુઝામિલે ફરીદાબાદ વિસ્તારમાં વિસ્ફોટકો અને શસ્ત્રો છુપાવ્યા હતા. હાલ બંને ડૉક્ટરો આદિલ અહેમદ રાથર અને મુઝામિલ પોલીસ કસ્ટડીમાં છે અને તેમની સામે આતંકવાદી ગતિવિધિઓમાં સંડોવણી અંગે તપાસ ચાલુ છે.
પોલીસ અને તપાસ એજન્સીઓનું માનવું છે કે આ જથ્થો કોઈ મોટા શહેરમાં આતંકી હુમલાને અંજામ આપવા માટે તૈયાર કરવામાં આવ્યો હતો. હાલ સુરક્ષા એજન્સીઓ સમગ્ર નેટવર્કના અન્ય સભ્યોની શોધમાં લાગી છે.
આ કાર્યવાહીથી એક મોટો આતંકી હુમલો અટકાવી શકાયો છે અને દેશની સુરક્ષા એજન્સીઓ માટે આ મોટી સિદ્ધિ ગણાય છે.
