ઇઝરાયલ અને ઈરાન વચ્ચે વધતા સંઘર્ષ વચ્ચે રવિવારે તેહરાનમાં ભયાનક પરિસ્થિતિ સર્જાઈ હતી. ઇઝરાયલી હુમલાઓ બાદ તેલ સંગ્રહ સુવિધાઓમાં લાગેલી આગથી શહેર ઉપર ગાઢ કાળા ધુમાડાના વાદળો છવાઈ ગયા હતા અને ઘણા વિસ્તારોમાં સૂર્યપ્રકાશ પણ બંધ થઈ ગયો હતો. અહેવાલ મુજબ ઇઝરાયલી સૈન્યએ ઉત્તરપૂર્વ તેહરાનના અઘદાસીહ તેલ વેરહાઉસ, શહેરના પશ્ચિમમાં આવેલા શાહરાન તેલ ડેપો તેમજ કારાજ શહેરની તેલ સુવિધાઓને નિશાન બનાવ્યાં હતા. હુમલા બાદ ત્યાં ભડકેલી આગમાંથી ઘાટા કાળા ધુમાડા આકાશમાં ઉછળતા જોવા મળ્યા હતા.
સોશિયલ મીડિયા પર શેર થયેલા વીડિયોમાં તેહરાનના આકાશમાં જ્વાળાઓ અને ધુમાડાના મોટા ગોટેગોટા દેખાતા હતા. સ્થાનિક રહેવાસીઓના જણાવ્યા મુજબ ધુમાડો એટલો ગાઢ હતો કે સવારે પણ શહેર અંધકારમય બની ગયું હતું અને લોકોને લાઈટો ચાલુ કરવી પડી હતી. આ હુમલાઓ બાદ શહેરમાં ગેસોલિન પાઇપલાઇનમાં વિસ્ફોટ થયા હોવાના પણ અહેવાલો સામે આવ્યા છે. કેટલાક વીડિયોમાં શહરાન બુલવર્ડ વિસ્તારમાં થયેલા વિસ્ફોટોથી નજીકની ઈમારતોની બારીઓ તૂટી ગઈ હોવાનું દેખાય છે, જોકે આ વીડિયોની સ્વતંત્ર પુષ્ટિ થઈ શકી નથી.
AFPના અહેવાલ મુજબ તેલ ડેપોમાં લાગેલી આગ 12 કલાકથી વધુ સમય સુધી ભડકતી રહી. આ કારણે 10 મિલિયનથી વધુ વસ્તી ધરાવતા તેહરાન શહેરમાં ધુમાડો ફેલાઈ ગયો હતો. સ્થાનિક લોકોનું કહેવું છે કે આગ બાદ પડેલો વરસાદ “કાળો અને તેલયુક્ત” લાગતો હતો. ઝેરી ધુમાડાને કારણે શ્વાસ લેવામાં તકલીફ અને આંખોમાં બળતરા થવાની શક્યતા હોવાથી અધિકારીઓએ લોકોને ઘરની અંદર રહેવાની સલાહ આપી છે. શહેરમાં સુરક્ષા દળોએ ખાસ માસ્ક અને પ્રોટેક્ટિવ કોટ પહેરીને ટ્રાફિક નિયંત્રણ સંભાળ્યું છે. અધિકારીઓએ જણાવ્યું છે કે હુમલાઓને કારણે તેહરાનમાં બળતણ વિતરણ પણ અસ્થાયી રીતે ખોરવાયું છે.
