સુરત : ભરીમાતા રોડ ઉપર રહેતો યુવક કામ (Work) કરતો નહી હોવાથી તેની પત્ની (Wife) સાથે વારંવાર ઝઘડા થતા હતા. તામશી સ્વભાવના પતિએ (Husband) પત્ની સાથે ઝઘડો કરીને તેનું ગળુ દબાવી હત્યા (Murder) કરી નાંખી ફરાર થઇ ગયો હતો.
પ્રાપ્ત વિગતો મુજબ ફૂલવાડી ભરીમાતા રોડ ઉપર મન્નત એપાર્ટમેન્ટમાં રહેતા ઇરફાન શેખ ઇશાક શેખના લગ્ન સલાબતપુરામાં ભાઠેના પાસે રઝાનગરમાં રહેતા આફરીન ઇરફાન શેખની સાથે થયા હતા. ઇરફાન કોઇ કામધંધો કરતો નહીં હોવાથી પત્ની આફરીન સાથે વારંવાર ઝઘડા થતા હતા. આફરીન ઇરફાનને કામધંધો કરવા માટે કહેતી હતી, પરંતુ ઇરફાન કામે જતો ન હતો અને આફરીનની સાથે ઝઘડો કરી મારઝુડ કરતો હતો. બંને વચ્ચેનો ઝઘડો વધી જતાં પરિવારના સભ્યોએ સમાધાન પણ કરાવ્યું હતું. ત્યાં બે દિવસ પહેલા ફરીવાર કામધંધાની બાબતે પતિ-પત્ની વચ્ચે માથાકૂટ થઇ હતી. તામશી સ્વભાવના ઇરફાને આફરીનનું ગળુ દબાવીને હત્યા કરી નાંખી હતી. ઘરમાં ઝઘડાનો અવાજ આવતા પાડોશમાં રહેતા આફરીનના ફોઇ તાત્કાલિક ઘરે આવી ગયા હતા. આફરીનના ફોઇ અને ઇરફાન બંને આફરીનને નજીકની પ્રાઇવેટ હોસ્પિટલમાં સારવાર માટે લઇ ગયા હતા, જ્યાં ડોક્ટરો આફરીનને મૃત જાહેર કરી હતી. મોત શબ્દ સાંભળીને તરંત જ ઇરફાન ત્યાંથી ભાગી છૂટ્યો હતો. આફરીનના ફોઇએ આફરીનના માતા-પિતાને જાણ કરીને તેઓને હોસ્પિટલ બોલાવ્યા હતા. આફરીનની ડેડબોડીનું પોસ્ટમોર્ટમ કરવામાં આવતા તેણીને ગળુ દબાવીને હત્યા કરાઇ હોવાનું બહાર આવ્યું હતું. બનાવ અંગે ચોકબજાર પોલીસમાં ફરિયાદ કરવામાં આવતા પોલીસે ઇરફાન શેખની સામે ગુનો નોંધી તેને પકડવાના ચક્રો ગતિમાન કર્યા છે.
ઉધનામાં દંપતિ વચ્ચે ઝઘડો થતા પતિનો આપઘાત
સુરત : ઉધના કૈલાશનગરમાં રહેતા વાળંદે ગત મોડી સાંજે ફાંસો ખાઇ લીધો હતો. પોલીસના જણાવ્યા અનુસાર ઘરકંકાશને કારણે વાળંદે આ પગલું ભર્યું છે. નવી સિવિલ હોસ્પિટલ સુત્રો પાસેથી મળતી વિગતો અનુસાર કૈલાશનગર હનુમાન મંદિરની બાજુમાં રહેતા પ્રમોદ નિમ્બાભાઈ ભદાણે (ઉ.વ.32) પાર્લે પોઈન્ટ ખાતે વાળંદની દુકાનમાં કામ કરતા હતા. દરમિયાન ગઈકાલે મોડી સાંજે તેમણે પોતાના ઘરે પંખા સાથે સાડી બાંધી ફાંસો ખાધો હતો. મૃતક પ્રમોદને ત્રણ વર્ષનો પુત્ર છે. પત્ની સાડીમાં સ્ટોન ચોંટાડવાનું કામ કરે છે. ગઇકાલે પત્નીની તબિયત સારી ન હતી અને રસોઈ બનાવતી હોવાથી પુત્રને રાખવા બાબતે તેમજ દવા લેવા મુદ્દે પતિ-પત્ની વચ્ચે બોલાચાલી થઇ હતી. આ બોલાચાલી બાદ પ્રમોદ ભદાણેએ આત્યંતિક પગલું ભરી લીધું હતું.
