સુરત: ચેમ્બર ઓફ કોમર્સમાં સુરત એરપોર્ટના ડેવલપમેન્ટ (SURAT AIRPORT DEVELOPMENT) અને પ્રશ્નો અંગે યોજાયેલી ઉદ્યોગકારો સાથેની સંવાદ બેઠકને સંબોધતા સુરત એરપોર્ટના ડાયરેકટર (SURAT AIRPORT DIRECTOR) અમન સૈની (AMAN SAINI)એ જણાવ્યું હતું કે, સુરત એરપોર્ટ ખાતે ફયુલ ટર્મીનલ કાર્યરત થઇ ગયું છે. આખા એરપોર્ટને સીસીટીવી હેઠળ આવરી લેવાની પ્રક્રિયા પૂર્ણતાને આરે છે. જેથી સુરત એરપોર્ટ હાલ વિકાસના એક ચોક્કસ સ્તર પર પહોંચી ગયું છે, અને આ એરપોર્ટને વધુ સારી રીતે વિકસિત કરવાના હેતુથી એરપોર્ટ ઓથોરિટી હવે ચેમ્બર ઓફ કોમર્સ સાથે એક ચોક્કસ કામગીરી અને સ્નયુક્ત હેતુ પાર પાડવા માંગે છે.
20 ફેબ્રુઆરીથી 22 માર્ચ 2021 સુધીમાં સુરતથી ચેન્નાઇ, જયપુર, જોધપુર અને પટના માટે નવી ફલાઇટ (NEW FLIGHT) શરૂ થઇ જશે. તે સિવાય પણ સુરતને નવી ફલાઇટ મળશે. આખા એરપોર્ટની સફાઇ અને કામગીરીની દેખરેખ માટે મેકેનાઇઝ્ડ સપોર્ટ સિસ્ટમ માટે ટેન્ડર ખૂલી ગયું છે અને વર્કઓર્ડર આપવાની તૈયારી છે. જેથી એરપોર્ટ ડિરેક્ટરે ચેમ્બરને હાકલ કરી છે, અને ચેમ્બર થકી વિવિધ કોન્ટ્રાકટર મેળવવાની દિશામાં એક બેઠકનું આયોજન કરવામાં આવ્યું હતું.
ચેમ્બરે સુરત એરપોર્ટના રનવેની પહોળાઇ 45 મીટરથી વધારીને 60 મીટર કરવાની દરખાસ્ત કરી હતી. તે અંગે એરપોર્ટ ડાયરેકટરે કહ્યું હતું કે, હાલમાં જે 45 મીટરની પહોળાઇ છે તે દુનિયાની સૌથી મોટામાં મોટી ફલાઇટ લેન્ડ થવા માટે પૂરતી છે. એટલે રનવેની પહોળાઇ વધારવાની કોઇ આવશ્યકતા જ નથી. તેમણે વધુમાં કહ્યું કે, એરપોર્ટ ખાતે ટર્મિનલ એકસપાન્શન (TERMINAL EXPANSION) અને પેરેલલ ટેકસી વેનું કામ પણ પૂરજોશમાં ચાલી રહ્યું છે તથા આ બંને કામ ડિસેમ્બર 2021 થી માર્ચ 2022 સુધીમાં પૂર્ણ થઇ જશે.
કાર પાર્કિંગ માટે અને રેઇનબો કલબનું હેન્ગર ભાડે આપવા માટે એરપોર્ટ ઓથોરીટી દ્વારા ટેન્ડર મંગાવવામાં આવ્યા છે પરંતુ આ બાબતે કોન્ટ્રાકટર મેળવવા માટે ચેમ્બર દ્વારા પણ પ્રયાસ કરવામાં આવે તેવી તેમણે વિનંતી કરી હતી. ચેમ્બર દ્વારા ખાસ કરીને ડોમેસ્ટીક કાર્ગો(DOMESTIC CARGO)ની કેપેસિટી ડબલ કરવા તથા ઇન્ટરનેશનલ કાર્ગો વહેલી તકે શરૂ થાય તે અંગે રજૂઆત કરવામાં આવી હતી. મિટીંગમાં સુરત એરપોર્ટના ડાયરેકટર અમન સૈનીને ચેમ્બરના ઉપપ્રમુખ આશિષ ગુજરાતી, માનદ્ મંત્રી નિખિલ મદ્રાસી તેમજ ચેમ્બરની એરપોર્ટ કમિટીના ચેરમેન મનોજ સિંગાપુરીએ સુરત એરપોર્ટ સંબંધિત વિવિધ મુદ્દાઓની રજૂઆત કરી હતી.
